《情圣》粤语全剧本

导游：ok! everybody come out! here is stanley bay. let take pictures here.

（程胜着住解放军军装喺对面岸游紧水过嚟）

导游：hey, everybody come here. look at the illegal immigrant come from mainland china. come on! come on! follow me! follow me!

鬼佬（拉住程胜膊头）：hey, don't go away.

程胜：唔好拉我！唔好拉我！唔好拉我！

（鬼佬争相同程胜影相）

程胜：唔好！唔好影！唔好拉我哩！

（左右腾）

导游：哎呀，唔系拉你，畀啲鬼佬影张相啫。

程胜：有钱畀冇呀？

导游：有嘅。

程胜：喂！

导游：咩呀？

程胜：我重带咗啲中国嘅出土文物落嚟㖞。问佢有冇兴趣？（喺腰间嘅袋入便扐咗啲假嘢出嚟）

*导游：喂！卖到你抽啲佣畀我呀。

导游（手揸假嘢）：wei! everybody, look at the antique.

*程胜：七千几年历史架，呢啲古董呀。（提导游）同佢哋讲吖，有美金畀美金，冇美金畀英镑吖。碌卡都有办法架。

另一班人：鬼佬！very cheap! very cheap!

程胜：喂！你……

条友：阿胜，你都算卑鄙喇，噉呃鬼佬？

程胜：呢啲唔系叫呃，呢叫食脑。你抢我生意呀，僆仔？

条友：黐线！鬼佬你嘅？（继续叫卖）very cheap! very cheap!

差人甲（行过）：喂！有冇搞错呀？当呢度街市呀？

尖叫声：走鬼呀！

*条友：快啲走呀！匿埋！

差人乙：哎！由佢啦，总台call喇！哎，行啦！

（程胜吓到舂个头入去啲沙里便）

导游：everybody!……

（程胜上到岸）

程胜：好彩头先匿得快，唔系断正。

士多佬：喂！有电话，程胜！

几条友（异口同声）：我系情圣，边个揾我呀？

程胜（举手）：喺度！揾我嘅。

李力持（喺度搞搞震）：我系情圣，揾我嘅吓哗？（接过电话）喂！

程胜：死开你呀，四眼仔！性病有你性！

*士多佬：喂！程生，你重咁滋阴，你条女话要飞你喇。

李力持：家阵我唔够quali做情圣咩？（拧转头，李力持即刻走夹唔唞）

程胜：从来只有我阿胜飞人架啫。

士多佬：哦！噉即系话连阿珍嘅电话都唔使听啦。

程胜（抢过电话，扮晒嘢）：喂！阿珍呀，咩事呀？

阿珍：阿胜呀，我而家要嫁人呀！

程胜：唔系啩？！喂，我爱你架㖞，你傻咗呀？

阿珍：唔系呀，阿妈话，要揾个有钱老公嫁先得架，讲感情系冇用架！

程胜：你讲笑咋吓哗？喂！有事慢慢讲，阿珍。我而家即刻嚟揾你呀。你喺边呀？啊？阿珍呀！

旁人（催促阿珍）：快啲啦！快啲啦！

阿珍：我而家要去教堂行礼呀，系噉吖，拜拜！（收线）

程胜（跪地）：阿珍，求吓你你！唔好呀，阿珍！

（程胜飞奔）

（程胜同几个人争的士）

程胜：的士！的士！

甲：做咩呀？

程胜：大佬呀，大佬，我赶住去结婚呀，大佬，喂！

的士司机（吓一跳）：哗！

细路（无端端戙咗喺程胜面前，重满面笑容）：哥哥！哥哥！

程胜：咩事呀，小朋友？

细路：同我开罐汽水吖，唔该。

程胜：冇问题。暂停呀。（开汽水，点知畀汽水喷咗一面）

细路：死喇！妈咪快啲呀，抢到的士喇！

细路妈咪（一脚踢开程胜）：（普通话）走开啊！

（的士开走咗）

*甲：噉样死喺条细路仔手上，你真丢架！呸！

乙：呸！

丙：呸！

（程胜参加跑步比赛）

啦啦队：快啲呀！快啲呀！

程胜：有冇红豆冰呀？

啦啦队：冇呀，黐线！

（终点）

计分员：快啲呀！快啲呀！

（程胜攞咗第一名）

程胜：阿珍，等埋我呀！

（婚礼现场）

程胜：唔该借歪！阿珍，唔好嫁畀佢呀！

阿水：做咩呀喂，嗰条友？

程胜：阿珍！

新郎哥：唔好理佢，上车。够钟喇。

（程胜畀几条友捉实） 大话 周星驰站 zhouxingchi

程胜：行开呀！阿珍！

（程胜扑上架车）

其他人：快啲上车追佢哋啦。

程胜（猛咁拍车窗，猛咁嗌）：阿珍！阿珍呀！

新郎哥（惊到飞起）：唔好停车呀，呢条友癫架！

（程胜擒上车顶）

（程胜倒竖个头喺司机面前）

司机：走呀！走开呀！快啲走开呀！走呀！走呀！

程胜：我叫你停车呀！

（架车突然减速，程胜中晒招，撞亲嗰度，痛到反艇）

程胜：你咁阴毒！

（程胜打烂车顶车窗，成半个身钻咗入去）

新郎哥：出返去！出返去呀！快啲出返去呀！出返去呀！

（司机急速掟弯，以为卖甩咗程胜，点知重未完。）

（程胜好顽强地喺车底爬返起身）

（程胜为咗避开啲垃圾筒，无奈跳落车）

（程胜爬返起身，奋力喺后窗飞入架车，果然好身手。）

新郎哥：出去！出去呀！

程胜：阿珍！阿珍！你唔好咁冲动呀！你听我讲，你唔可以嫁畀佢架！

阿珍：点解你唔畀我同佢结婚㖞？

新郎哥：点解你要拆散我哋吖？

新郎哥（落车）：傻佬！你揾错教堂嘞！

程胜（心知大事不妙，猛咁赔罪）：对唔住，老世！我错呀，老世！我祝两位白头到老，永结同心。

（新郎哥马仔即时赶到）

新郎哥：我唔想再见到佢！同我打到佢不似人形！

某君：tiger，咬佢！

（程胜惨遭皮肉之苦）

（拳头如雨点）

*程胜：哎呀！哎呀！打好喇！只狗唔好咬呀！

*阿珍：咪打！等我嚟！

程胜：畀次机会我！

*阿珍（加入战圈，打埋一份）：仆你个街呀！

（程胜去师父屋企拜访，带埋两樽水做手信。）

程胜（敲门）：师父！

师父（扭衫）：你唔死我死！我同你死过！

程胜：搞咩呀？（用力拉门，师父翻咗个身，然之后仆倒）

师父：哎呀！

程胜：师父你做咩呀？

*师父：乜水呀？你做乜呀？

程胜：哦，抹紧地。

（四位师母喺度打紧雀）

一师母：放心啦，唔死得嘅。

其他三师母：喂！阿胜！

程胜：早晨，几位师母！

程胜（行埋去师母嗰度）：哗！自己洗衫呀？洗衣机坏咗咩呀？

师父：有人整紧呀。

（条友失精无神喺个洗衣机里面钻个头出嚟，吓得我）

*条友：啊，兄台呀，唔该帮手攞啲士巴拿嚟吖。

（程胜递士巴拿畀佢）

条友：唔该呀。

三师母：喂！阿胜呀，乜咁耐唔见你上嚟嘅？

二师母：系呀。

四师母：唔使啦。

程胜（笑口噬噬）：所以咪即刻蒲头吖。

一师母（见到程胜拎住两樽水，重以为系咩郇嘢）：哗！有好嘢呀？

程胜：有呀。

二师母：啱唔啱我哋使呀？

程胜：二师母你真醒目呀。嗱，我喺大陆经过蜀山买咗两樽神仙水。

二师母：系咩牌呀？

程胜：专畀女人用嘅。可以滋阴养颜。

三、四师母（惊诧）：啊！

*程胜：男人重好呀！专治肾亏不举，起死回生呀。

四师母（异口同声，异常兴奋）：哎呀！真嘅？

*师父：我唔需要呀，留返畀你自己用啦，死仔包！

三师母（声大夹恶）：你试吓唔用喇。

四个师母（齐声）：我哋一定唔放过你呀！洗衫啦！

程胜：我都系为你哋着想架啫。

*二师母：喂喂喂！几多钱啫？我哋畀你呀。

*程胜（推搪）：唔好！唔好！千祈唔好呀！两三毫子唔好计佢，大家自己人。

一师母：哎呀！

*程胜：唔好！千祈唔好呀！两三毫子呢啲无谓呀。

*一师母：噉两三毫子都系钱嚟架嘛。大家自己人，唔好客气。（畀咗三毫子程胜）袋返佢喇吓。继续打啦。

三师母：好呀。

四师母：系呀。

程胜：我话两三毫子呢，其实就即系两三千。

一师母：得架喇。得架喇。都话大家自己人喇，袋咗佢啦。袋咗佢啦。唔好客气㖞。

（程胜冇好气噉行开咗）

师父（拉住程胜衣领）：死仔包，屈得咁辛苦呀，先屈得个三毫子？

程胜（摊开手板）：要啦。

师父：成日都唔使嚟揾吓师父，梗系成日挂住沟阿珍啦。

程胜：唔好再喺我面前提阿珍，我已经飞咗佢。

师父：点解呀？

程胜：飞佢唔起呀？呢啲噉嘅女仔，贪慕虚荣，水性杨花，下流贱格！

四个师母（齐声）：边个讲我哋呀？

程胜（拉师父出嚟顶，指住师父）：佢呀。

师父：唔系呀，我哋讲紧楼下只狗乸咋嘛。

四师母（同三师母讲）：系呀，只狗乸成日勾狗公架。好咸架！

（师父欲举拳打程胜，程胜喺个袋度扲出一张一千文纸塞入师父袋，师父停晒手）

程胜：悭啲使吖。

师父：噉多谢呀。

（二人出咗房间）

程胜（递烟）：师父，咪话我话，我喺孤儿院出嚟跟到你而家。

（师父问程胜借火）

程胜：冇，我冇火架。你硬系唔肯过你最精嗰瓣沟女桥过我架。

师父：沟女？你提都唔好提呀。你师父当年就系为咗情仙呢个绰号呀，搞到今时今日咁折堕呀。当年湾仔四大公主我一日就沟到，而家做埋我老婆啦，喺入便打埋牌呀，噉又点样得架？

程胜：好吖。

师父：好？好话？好我让晒畀你。

程胜：我意思系好惨呀！

师父：你知咪好啰。所以我哋食脑之人呀，绝对唔可以提个情字，只有一个字，就系钱。为咗钱，我哋一定要做到绝情绝义。

程胜：唔使吓哗？

师父：你想唔想出人头地吖？

程胜：想呀！

师父：想你就要听师父讲，要绝情绝义！

程胜：我明嘞，师父。

师父：你明就最好喇。

（程胜反转猪肚，攞返一千文）

*师父：你做乜咋？

程胜：重有嗰三毫子呢？

师父：吖！你个死仔！

程胜（两头望）：速磅，唔好两头望呀，僆仔！

师父：我冇两头望吖！

*程胜：哎吔，你窜我，光头佬？！快啲开返三毫子嚟，快啲呀！（左右caau3，卒之caau3到嗰三毫子，仓促离开）

*师父（揸住栏杆）：好呀，好呀，令代，你已得到我嘅真传喇。他日必成大气呀！

（程胜想截的士，畀几个人抢先）

甲：的士！的士！

甲：喂喂！

乙：我截先架。

甲：我截先架。

*阿婆：喂，我截先架。作死呀？你虾我阿婆吓哗？

（又有一个师奶仔加入战圈）

师奶仔：我截先架！行开呀！

……

大话 周星驰站 zhouxingchi

（程胜计上心头，啪断咗街边嘅一支铁枝，揸住佢扮盲。）

（五个人争到头崩额裂）

……

程胜：救命呀！唔该，有冇人可以救吓我呀？唔该。

（程胜扮跌亲）

（几个人停止争斗，走去扶起程胜）

甲：你冇事嘞嘛？

师奶仔：真系可怜呀！

阿婆：有冇嘢可以帮到你架？

*程胜：冇事！冇事！你哋真系好心呀，唔该晒。哦，我盲嘅，噉我赶住去医院呢就系做眼角膜移植手术吖嘛。（行去车尾）点知又揾极都揾唔到车㖞。（开车门）哎，呢架系咪的士嚟呀？（正想钻入去之际）

五人：的士？！唔系呀！（将佢掹返出嚟）

*甲（恶扬扬）：盲佬都够胆同我争的士？未死过！

（五人打到程胜应应）

甲：插爆佢只眼。

（师奶仔坐收渔翁之利，上咗车）

师奶仔：司机，快啲开车！

乙：哎呀，畀个八婆上咗车添。

甲：真系唔抵呀。

丙：噉又系。

阿婆：噉而家点呀？

乙：点呀？点呀？自己截过啦。（趸低程胜，散水）

（毛毛见到有机可乘，即刻开架车埋去程胜身边。）

*毛毛：喂！眯埋眼先生，系咪想截车呀？我车你一程吖。

程胜（面露喜色）：噉，噉点好意思呀？

（车内）

程胜：喺香港地真系好难揾到啲咁有同情心嘅人。

毛毛（食住香口胶揸车）：呢度好难截车嘅。帮吓伤残人士都好应该架。

程胜：多谢。

毛毛：去边呀？

程胜：港澳码头吖。

毛毛：接人呀？

*程胜：玩玩两手噉啦。

毛毛：识听骰嘅？

程胜（大笑）：啊，赌圣咩你估？

（撞啱红灯，架车停咗落嚟）

（毛毛喐手挞程胜身上啲钱）

（程胜忽然拧转头，毛毛吓咗一跳）

（毛毛揾只手喺程胜面前抰吓抰吓，证实程胜系盲嘅，睇唔到嘢嘅。噉就继续做嘢。）

程胜（突然弹起只手）：啊，而家几点呀而家？请问。

毛毛（睇表）：两点半。

程胜：哦，重赶得切。重赶得切。

（转咗绿灯，后面架车嘟嘟声噉嚟催促毛毛开车）

程胜（大嗌）：哎呀！架车系咪开紧架？

毛毛：系呀。

程胜：我多口问句咋嘛。

毛毛：开紧架。

程胜：快啲得嘛？

毛毛：好呀。好呀。

程胜：唔该。

（毛毛开动架车）

（毛毛将架车怼去行人道嗰度，然之后停低架车，搞到好似撞车噉嘅样。）

毛毛：哎吔！

程胜：what happen呀？

毛毛：我车到人㖞。

毛毛（落车）：点呀？你见点呀吓？（一个人做晒两个人嘅戏，又扮自己又扮阿婆）哎呀，阿婆，你见点呀？

*“阿婆”：好痛呀，你又车断我只脚，一地都系血，快赔钱来。

毛毛：哎呀，我唔够钱添。你等等吓。先生，你可唔可以借住少少钱畀我赔畀人呀？

程胜：配畀边个呀？

毛毛：我车到嗰个阿婆啰。

程胜：我睇睇佢。（落车）

毛毛：吓？

程胜：阿婆！阿婆！你喺边呀？

毛毛（扮阿婆）：好辛苦呀，好辛苦呀。赔钱呀！快赔钱呀！

程胜：阿婆！阿婆，你见点呀？

“阿婆”：好辛苦呀！哎呀！

程胜（掴咗毛毛一巴）：使死唔使呀？

*“阿婆”：快呀！快呀！你快啲赔钱呀，我揾差人拉你架！

程胜：系㖞，差人都未嚟呀，等差人嚟至算啦。

*“阿婆”：差二！差二！有差二来呀。差二呀！差二！

程胜：喺边呀？

毛毛（又扮差婆）：我系差人！阿婆，点解你断手断脚一地都系血架？盲佬，你车到人快赔钱嘞㖞。

程胜：唔赔得嘛？

“阿婆”：唔赔我拉你架，你唔惊呀？

程胜：拉我唔惊架㖞，唔使死啫。你唔会即刻枪毙我吓哗？你估你解放军呀？你揾解放军嚟我就惊嘞。

毛毛：咁啱，解放军嚟添。

程胜：唔系哗？

毛毛（扮解放军）：（普通话）他xx的，盲佬，你在这里干什么？

*毛毛（做返自己）：个盲佬车倒人哋唔赔钱㖞。

毛毛（扮解放军）：（普通话）赔钱！他xxxx的，不赔钱一枪baang6瓜你！

程胜：我唔识听国语架㖞。

*毛毛（扮阿婆）：个解放军话叫你赔钱，唔赔钱一枪baang6瓜你话！

毛毛（扮解放军）：（普通话）干你娘的！快赔钱！不赔钱一枪baang6瓜你！

*程胜：都唔惊架㖞，你一枪打我即死都冇乜所谓架㖞。除非你揾只狗嚟慢慢咬死我我就怯嘞。

毛毛：有头狗！

程胜：冇咁跷啩？

（毛毛扮狗）

程胜：讲咩呀，狗？

毛毛（扮狗）：我话叫你快啲赔钱，如果唔系就咬死你呀。

程胜：唔好啩。（除咗副眼镜）监生畀你咬死好凄凉架噃。

*毛毛（恍然大悟）：哦，原来你扮盲嘅嚟呃我！

*程胜：系呀。我只系识扮盲架咋，其他狗呀噉嘅嘢，蛇虫鼠蚁呀全部都唔晓嘅。（撑住根盲公竹走咗去）

毛毛（追上）：先生，既然大家都系扮嘅，噉即系大家都系食脑架啦。

*程胜：我就食脑嘅，你就扮狗嘅。大家分清楚条界线好。

*毛毛（拉住程胜）：先生，我欠咗班贵利好多数呀。如果我重唔还钱畀佢哋，佢哋揾人嚟拉我架嘞。

（毛毛喊咁口）

程胜：揾滴眼泪睇吓有冇呀？

毛毛：有架。你等等呀。

程胜：等到几时呀？

*毛毛：等阵就有嘞。

*程胜（笑毛毛唔够水准）：你噉嘅程度去考艺员训练班都唔收你。噉样学人出嚟揾食？有冇搞错呀？使唔使我过条靓桥过你呀？阴功！

毛毛：好呀。

程胜：嗱！而家呢条马路啦，你求祈揾架车，冲出去诈假意畀架车撞倒。（走去马路中央）跟住乘机有得屈啰。（咁啱畀架车撞到）

毛毛：小心呀！

（架车撞烂咗，程胜冇事）

毛毛（走去马路中央）：你见点呀？

程胜：学嘢呀，细佬。

程胜（大喝一声）：喂！我只脚断咗㖞。点解救呀？

（个司机落车，身材魁梧到高程胜半个身位咁多）

司机：靓仔，我架车都撞烂咗㖞。噉又点计呀？

程胜：好易计啫。（喺个袋度攞咗两千文出嚟）呢一千文系我赔畀你架车。（畀咗一千文佢）呢一千文系我仰慕你请你买嘢食。（畀多一千文）

司机：噉你只脚都断咗㖞。

*程胜（笑）：傻啦，我唔小心过马路，应该畀你车死架嘛。你净系车断我只脚，我都唔知点感激you。扶我去医院。

（架车开走咗）

程胜：辛苦晒喇！一路顺风！

毛毛：头先嗰条桥好似好似好似好似……

程胜：好嘢哩？

毛毛：啊？

*程胜：又过多招畀你喇。钟意可以揸架车喺马路度，睺吓睇吓有冇戆居佬，盲舂舂舂出马路嗰啲呀。一架车就怼埋去，怼完佢重要屈。你见我头先畀人屈得几成功呀。就知系旷世绝桥嚟吖。

毛毛（万分仰慕）：啊，阿哥，你用桥真系出神入化，佩服佩服！

程胜：佩服就交学费呀。头先口述五千，亲身示范一万，加埋万七。

毛毛：加埋好似万五咋㖞。

程胜：咪即系我畀人屈嗰两千唔计呀？你唔好诈诈谛呀！

毛毛：冇钱呀。

程胜：冇？

毛毛：我冇钱架，我真系冇钱架！

程胜：唔好扮嘢呀！唔使畀钱呀？快啲呀！

（程胜攞咗毛毛个包出嚟，caau3匀都揾唔到钱）

毛毛：冇哩，唔使caau3，我真系冇钱架。

程胜：住喺边呀？返屋企攞呀。 大话 周星驰站 zhouxingchi

（背景音乐略带悲伤）

*毛毛：我冇屋企架，冇人理我，我条仔又撇我，剩返我孤苦伶仃咩都要靠自己架。我剩返一只表，系我妈临死之前留畀我嘅。（除低手上只表）我当畀住上期先啦，我屈到再畀你吖。我屈到以后赎返架。

程胜：过主！过主！当我唔好彩！（程胜冇好气噉行开咗）

毛毛：唔该晒呀！唔该晒呀！

（程胜听到身后有架嘎然而止，原来就系毛毛嘅贵利佬）

马仔甲：死八婆！我揾你好耐喇。你好还钱喇！

（毛毛吓到冇鞋挽屐走）

马仔甲：咪走呀！喂！

马仔乙：企喺度呀！

（毛毛畀班友迫到入一个倔头巷里面）

马仔甲：重捉唔到你？

毛毛：唔好吖！

马仔乙：咪嘈呀！

马仔丁：老世！

*排骨（揢住只脚）：戆居！

马仔甲：行快啲！

排骨：死八婆！唔还钱，重想走？教训佢！

程胜（又试扮盲）：你哋做咩呀？喂！好放咗我女朋友咯㖞。唔系我报警架！

排骨（笑）：揾个盲佬做你条仔？你cheap唔cheap啲呀？（走去对付程胜）玩嘢吓哗？你个死盲佬！（扑空）

程胜：嗱，唔好再嚟喇！

排骨：ada! 企喺度！唔好喐！ada! ado! ada! ado! ada! ada!

（程胜避过晒啲拳脚）

（排骨一个起飞脚误中自己友）

（程胜副眼镜跌咗落地）

排骨：噉你都避到？好嘢吓！死盲佬，有啲料到噃！

大话 周星驰站 zhouxingchi

（程胜转身，翻白眼）

排骨：唔通你就系……

程胜：冇错，（摆个谰潇洒嘅姿势出嚟）我就系盲侠。

马仔乙：盲侠？

排骨：你好嘢，盲佬！撇嘞！（撤退）

（点知马仔乙一个屈尾十，返转头将程胜ung2落地，搞到程胜穿晒煲，今次断正。）

*马仔乙：去死呀！哦！好大嘅眼呀！大佬，佢睇到嘢架。

毛毛：做乜今次避唔到架？

*程胜：挂住扮吖嘛。

排骨：返去等大佬慢慢搞掂。

（贵利公司）

（贵利王揸住把日本武士刀，一下将马仔头上嘅苹果切开两半，马仔吓到标晒汗。）

马仔（猛咁擦鞋）：哗！老世，好犀利呀！老世，好嘢！真系刀法如神，出神入化，佩服呀，老世。好嘢！好嘢！做咩呀，老世？

贵利王：使乜咁惊呀？抹吓啲汗啦。

马仔：头先真系有少少惊呀，噉都畀你睇得出呀？老世，好嘢！

贵利王（走去门后面）：呢把刀，系三岛由纪夫曾经切腹用过。切腹，系需要无比嘅勇气。（度门突然畀人打开，贵利王一声惨叫）

（排骨同几个马仔带住程胜、毛毛入咗嚟。）

排骨：大佬呢？

马仔：喺嗰便呀。

（贵利王扮嘢）

排骨：啊？大佬！边个怼冧你？讲畀大佬听，等大佬同你报仇。讲畀大佬听，边个怼冧你？

（贵利王慢慢抽出把刀，原来冇事。）

排骨（笑）：连大佬都玩㖞。衰仔呀，同我开玩笑。（同贵利王搭晒膊头）

贵利王（咬耳仔）：如果你唔系我亲大佬，我早就怼冧你嘞。

*贵利王（见到程胜同毛毛）：呢两条友又系做咩架？

排骨：条八婆唔肯还钱，重揾条仔出头添。

毛毛：随便坐呀，随便坐呀，唔好客气。

程胜：唔好客气。

毛毛：坐呀。坐呀。

程胜：其实呢我……

（两个人畀马仔乙扚返起身）

程胜：其实我就唔系佢条仔嚟嘅，大家误会啫。

贵利王：我唔理你边个打边个，噉有冇钱还吖？

毛毛：有，我有，我迟啲还畀你啰。

贵利王：即系冇啦。扚佢去影相。

马仔乙：去影相呀。

*程胜：你而家算点先？呢啲唔关我事架嘞。无端端拖埋我落水。

马仔：望镜头吖。

（程胜同毛毛摆咗谰型嘅姿势）

程胜：无端端拖埋我落水。累死呀，呢镬真系！

毛毛：你听我讲，我真系冇哩。

*贵利王：八婆！我畀多七日时间你，如果冇钱还嘅。（将幅相切开两半）就好似呢幅相噉，好自为之呀！

毛毛：张相影得好靓呀，睇吓。睇吓。

程胜：甫士摆得几好呀。

*毛毛：系呀！系呀！

贵利王：赶佢哋走！走啦！

马仔乙：行呀！

程胜：咪住，其实噉呀，我唔识，我唔识佢架喂。

排骨：走！走！走！

贵利王：你都走！

（排骨走埋）

马仔：大佬呀，里便条友肯认嘞。

贵利王：扚佢出嚟吖。

发哥：哗！焗死人咩？（坐低）

贵利王：整容都整得几掯架㖞，焗咗成三个钟头都冇走样？而家肯认嘞咩？

发哥：认！认！认！我认呀。

贵利王（睇凌万峰张相）：以前个样咪几好？做乜整到而家噉嘅衰款呀？

发哥：我都系走头无路，焗住噉做啫。笔数就有呀。

贵利王：噉即系冇得还啦。

发哥：哦，唔系，我实有得还嘅。大弟哥呀，通融多几天啦。

贵利王（搭住膊头）：嗱，大家咁熟，咪话我唔关照你呀。而家有单郇嘢益你嘅。

贵利王：呢间屋嘅屋主去咗度假，要成个月先返嘅。

（凌万峰翻睇本书）

贵利王：你就同我入去攞晒啲古董畀我。

发哥：喂喂喂！噉点得呀？噉咪即系叫我偷嘢？我……我系食脑架嘛。

贵利王：同我扚佢入去焗多几个钟。

*马仔：系嘅。等我嚟。

凌万峰（耍手拧头）：唔好！唔好！大弟哥，有商量！有商量嘅。

贵利王：系咯，啲古董就归我，啲家私就归你，你卖咗出去咯，噉咪有钱还返畀我啰。

发哥：不过，间屋咁大，一定有宾妹架㖞。

贵利王：你食脑架嘛。你得架啦。掂呀！一于系噉呀。

（街边）

程胜：我做错咗啲乜嘢？我做好心啫，都要搞成噉？

*毛毛：对唔住呀，我有机会报答你吖。

程胜：我唔想再见到你，你同我弹开。弹开！即刻弹呀！弹快啲呀！

毛毛（转身走）：哦！哦！哦！

程胜：喂！

（毛毛停晒脚）

*程胜：死八婆，你咁冇义气呀哗你？你够胆就噉走咗咩你呀？你帮我搞掂返佢呀。而家你冇钱还，斩你斩埋我架，大佬呀。

毛毛：我对你唔住呀，我将功赎罪吖。

程胜：你点将功赎罪呀？

毛毛：我明嘞。

程胜：你明乜嘢呀你？

毛毛：我识做架。

程胜：你识做乜嘢吖？

毛毛：我即刻做吖。

程胜：喂！

（毛毛企喺马路中央，搞到啲车连环相撞）

（毛毛爬上顶头架车）

司机甲：喂！你有冇搞错呀？你点揸车架？

*司机乙：我都唔想架。系无端端舂出嚟㖞。

……

*毛毛：哎呀！撞断人只脚呀。赔钱呀！快啲赔钱呀！断咗只脚呀！落咗落地喇！哎呀！赔钱呀！快啲呀！

司机甲：八婆，你做咩呀？

毛毛：赔钱呀！赔钱呀！

程胜：赔咩呀？（一把拉咗毛毛走夹唔唞）

司机甲：咪走呀！追佢呀喂！我架车够烂晒啦。

程胜：虽然你系蠢，低b，戆居，发型又老土，着衫不知所谓。重要冇波冇身材。但我念在你几有姜呀，个鼻又几高。畀你跟我学吓嘢呀。

毛毛：多谢！多谢！

程胜：记唔记得头先同你讲嘅计划？（戴返顶帽）

（两个人鬼鬼鼠鼠）

毛毛：喂！喂！噉我哋入去偷嘢，算唔算系做贼架？

*程胜：屋里面冇人呢就系做贼，有人就系叫食脑。嗱，做任何嘢呢，至艰难嘅就系第一步嘅，而家我哋点样令到人哋肯畀我哋入去屋里便呢？呢下就讲求高度嘅智慧同无比嘅勇气呀。

毛毛：我有呀。

程胜：呢两样嘢就系你最缺乏嘅。睇我点做。揿钟。

（毛毛揿门钟）

程胜：睇做戏吖。

（有人应门）

条友（一身住家男人打扮）：入嚟呀，入嚟呀，嚟呀，嚟呀。

程胜：我哋嚟……

条友：嘘！——

条友：快啲吖！入嚟呀！

（两个人入去间屋）

条友：你哋嚟做咩呀？

程胜：我哋接到投……

条友：嘘——，（条友个肥老婆食食吓嘢瞓着咗，成身污糟邋遢）千祈唔好嘈醒我老婆呀。

程胜、毛毛：哦！

毛毛：我哋接到投诉话你呢度好似系漏煤气㖞，系咪呀？吓？吓哗？

（程胜造马，喺条友身后喷嘢，条友木知木觉。）

条友：系呀，系呀，系呀，好大朕味呀，跟我入厨房呀。

程胜（吩咐毛毛）：睇吓周围有冇值钱嘢吖。

毛毛：哦，知道。

（厨房）

条友：个掣喺度呀。

程胜：系吗？

条友：点呀？情况点呀？

程胜：帮我揿住先。

条友：哦，好呀。

程胜：听唔听到吱吱声？（喺条友身后喷嘢）

条友：系呀，系呀。重好大朕味添呀。

程胜：漏气嘅情况好严重，我要即刻班救兵嚟。（出门）千祈唔好放手呀！

（毛毛好心做坏事，畀程胜误会咗佢，以为毛毛杀咗条女。）

程胜：喂！你唔系？

*毛毛：哎！头先好危险呀。佢拎住把刀呀。噉我哋呢……

（程胜吓到揞住块面）

毛毛：唔使惊，趁而家未有人发觉，我哋快啲揾啲嘢走喇吓。

程胜：你都唔使杀佢架。

（毛毛突然间傻笑起上嚟）

*程胜：你重笑得落你？你咁狼毒你！我畀你累死嘞，死八婆！

（程胜将毛毛ung2埋一便，咁啱撞晕咗条友）

（程胜重以为条友死咗）

毛毛：哎呀，我点会……

程胜：你有冇搞错呀？连续怼冧两件？我要报警。

毛毛：哎！哎！哎！你合埋口听我讲先啦。

程胜（猛掴毛毛）：重有乜嘢好讲呀？你重有乜嘢好讲呀？你系咪重累我唔够呀你？

*毛毛：我揸住把刀架。

程胜：你重想杀埋我？

（程胜叉住毛毛条颈）

（挣扎中程胜唔小心踹到电视遥控器，开咗电视机，电视声嘈醒咗个肥婆）

肥婆：你两个做咩呀？老公，佢两个入嚟做咩架？

条友：佢哋嚟整……整煤气架。

程胜：啊，系呀，我哋整煤气嘅，我哋。

肥婆：噉整好未呀？

程胜：我整好嘞，你呢？

（毛毛点头）

（毛毛摆低把刀）

程胜：噉走嘞。打搅晒呀，唔该。（走）

条友：唔该。

肥婆：你个衰佬吖，无啦啦放两条友入嚟？你作死呀？死呀！

（程胜揸车）

程胜：点解头先你唔同我讲呢？

毛毛：你一路叉住人条颈㖞，合唔埋口点讲啫？

程胜（口唔喐都讲到嘢）：边个话讲唔到嘢呀？唔好话你蠢？又少日时间扑水呀。睇嚟都要落啲本。听日嗱嗱声去买两张叶倩文演唱会飞吖。

毛毛：点用呀？

程胜：攞嚟摆落人哋嘅信箱度，啲人梗系贪小便宜架嘛。见到无端端有飞咯，重唔成家人扑晒去睇演唱会咩？噉间屋就变咗冇人，冇人就系我哋世界喇。

毛毛：间屋冇人咪即系做贼？

程胜；噉系我食脑令到间屋冇人吖嘛。所以依然都系食脑。

毛毛：目标呢？

程胜：就呢间呀。（生滋猫入眼）

（两个宾妹畀个宾仔使咗去旅行，搞到间屋冇晒人。）

（发哥出现，攞起宾仔摆喺门口嘅锁匙，一架车随即赶到，车身写住：誠信清潔服務公司）

甲（落车）：发哥呀，啊，条宾仔几醒㖞，噉样搞掂啲宾妹？

发哥：唔好讲咁多喇，入去先。

（推开门，三人畀眼前嘅景象吓咗一惊）

发哥：哗！

甲：哗！间屋好大呀！

乙：哗！好靓呀！

发哥：哎，唔好挂住睇喇。嚟嚟嚟，照单执药，爽手啲。

（三人分头偷古董）

（电话铃响）

电话录音：呢个系电话录音，请你喺嘟一声之后留低说话。（嘟）阿陈呀，我识得个大商场嘅太子爷jackie，大后日呢会由美国嚟香港搞啲投资，你好好哋招呼佢，到时实有你着数架。系噉吖。

乙（放低心头大石）：好彩冇事。

发哥（脑筋一转）：咪住先！你哋摆返好啲嘢。我谂到条发达桥呀。快啲！快啲！

（仁爱财务有限公司） 大话 周星驰站 zhouxingchi.cn

发哥：嗱，屋主下个月先返……

排骨：噉我哋就有大把时间set个局……

发哥：我扮屋主，跟住呃埋嗰个jackie……

发哥：所有嘅古董全部落晒我哋袋，跟住呢再呃埋嗰个jackie。

排骨：大佬呀，咁大条水鱼食得唔好嘥呀。大佬呀，我呢条桥正呀哩？

发哥：我都系噉谂。

贵利王：我大佬谂到嘅桥就唔系咩发达桥啦。不过噉，大家咁熟，我帮返你一次呀。

发哥：噉呃到嗰啲钱……

贵利王：咪五五分账咯。

发哥：真架？

*贵利王：啲古董我借埋畀你又点话啫？

发哥：大弟哥，你真系好人呀，我一定唔会令你失望架。

贵利王：畀心机做喇。

发哥：（上海话）谢谢侬！我一定会努力做架。

（满心欢喜噉出去）

排骨：细佬呀，点解五五分账咁益佢啫？

贵利王：吓！唔畀啲甜头佢呀，佢点会努力做呀？

排骨：噉都唔使五成咁多架？

贵利王：嗰五成？系古董啲租嚟咋。

排骨（终于都开窍喇）：呀，系㖞，噉咪即系全部都落晒我哋袋？（笑）细佬真系好嘢！

（发哥扮到成个老爷噉款慢慢行落楼）

甲、乙、丙：发仔！

发哥：叫老爷呀！

甲：啊，系呀，叫老爷。

丙：老爷。

乙（揸住程胜塞落信箱度嘅嗰两张演唱会飞）：啊，老爷呀，我喺信箱度揾到几张演唱会飞。

发哥：哎呀，唔好贪小便宜呀，因住因小失大！记住，要准时返工哦。

甲、乙：系。

丙：系，老爷。

（甲乙丙离开）

发哥（细思量）：而家重争个老婆。

（夜总会）

（萍姐同大只佬拗手瓜）

某甲：咩料呀喂？

*某乙：哗！大只佬同条女

萍姐：嚟吖。

某丙：肥仔，我买重你架。

*裁判：一二三，去！

（萍姐输咗）

*某丙：哗！好嘢，又抵我赢钱嘞，今次赢

萍姐：搞错呀你？

某丙：咩呀？唔顺呀？

萍姐：唔顺呀。

某丙：噉咪再嚟过啰。

肥仔：再嚟过？

*某丙：

萍姐：再嚟拗过，嚟吖。

（原来肥仔同某丙佮埋嘅）

*肥仔：萍姐呀，

*某丙：今日好难揾架噃。

萍姐：算喇，收工呀。

肥仔：噉我哋走先架咯㖞。嚟，行呀。

某丙：萍姐，走先喇。

（发哥将一个银仔抌入萍姐件衫里面）

萍姐（恶扬扬）：边个玩嘢呀？边个？边个玩嘢呀？

发哥：系我呀。

萍姐（笑咁口）：原来系你呀。

发哥：咪就系我啰。

萍姐：真系你？（掴发哥）老娘今日心情唔好，你重玩嘢？

发哥（揞住半边面）：哎呀！你唔认得我呀？我系发仔呀。

萍姐：你真系发仔？

发哥：系呀。

（萍姐大打出手）

*发哥：唔好呀！唔好呀！你睇清楚个胸里面先啦。入便有个银仔架，你送畀我嗰个银仔呀。嗰个法国银仔呀，你要揾清楚呀。

（萍姐喺件衫里面揾到个银仔）

萍姐（喜出望外）：发仔！你真系发仔？

发哥：系呀，我咪系发仔啰。

萍姐：早啲讲吖嘛。（喝班围观嘅人）望咩望呀？（戏散场）

萍姐：乜你搞成噉嘅衰样架？

发哥：改头换面都系想避吓风头啫。

萍姐：咁好死嚟揾我做咩呀？

发哥：我今次嚟揾你，其实我系想……

萍姐：哎！哎！哎！借钱呢就免问喇。我自己都唔掂呀。

发哥：唔系噉吓哗？咁多年交情。

萍姐：嗨嗨，以前你靓仔大家讲交情啫。依家你噉嘅样呀，除非我哋讲生意。

发哥：哎，我真系有单生意揾你吖。信我吖，郇嘢嚟架。

萍姐：你真系发仔呀？

（程胜同毛毛趁住夜色实行佢哋嘅计划。）

（两个一摇一摆，扮醉酒）

毛毛：都话唔饮咯。

（毛毛揿钟）

毛毛：哎呀！哎呀！都话唔饮。哎呀！好衰架！人哋都话唔饮咯。

程胜：你话我好衰？

*毛毛：

程胜（揸实毛毛嘅头猛咁撞门）：衰吖嗱！衰吖嗱！衰吖嗱！……

*程胜：间屋应该冇人啩？

（毛毛瞓着咗）

程胜（扶起毛毛）：喂！点呀？死唔死得？

毛毛：唔死得。

程胜：你有冇金卡呀，银卡呀嗰啲之类？

*毛毛（递张卡畀程胜）：有，用嚟做咩呀？

*程胜：用嚟开锁啰，好高技巧架。手要定，重要揸得稳。

（张卡畀度门食咗）

毛毛：我张卡呢？张卡系我辛苦执返嚟架。

程胜：执嘅？唔怪得啦，你畀张流嘅我。

毛毛：你点知呀？

程胜：畀度门食咗，你话系坚定流呀？重有冇呀？

毛毛：噉，地铁飞！

程胜：坚定流架？

毛毛：坚架。

程胜：坚嘞吗？（一下开咗度门）嗱，系坚嘅实开到架嘛。 大话 周星驰站 zhouxingchi.cn

（二个人鬼鬼鼠鼠噉）

毛毛（一下揽住碌葛噉嘅嘢）：发达喇。发达喇。

程胜：你做咩你？

毛毛：呢件咁大一定好值钱架喇。嚟吖。

程胜：喂！不如揾件搬得喐嘅好吗？

毛毛（揾过第二样嘢）：呢件搬得喐呀。嚟！嚟！

程胜：喂！你揾件摆得落个袋度嘅先啦。（拎起一只金马）即系譬如好似呢啲噉呀。攞个袋嚟吖。

（程胜揾极都揾唔到个口喺边）

毛毛（拉开袋口）：哩，哩，哩，呢度。

程胜：我唔系话暗袋呀，我系话上便呢……

毛毛：系得呢两个竉架咋。

程胜：呢两个竉？咩袋嚟呀？

毛毛：呢个唔系袋嚟架。呢个系锁匙包。呢便装锁匙，呢便装碎纸嘅。

程胜：孭个锁匙包出嚟？

毛毛：型哩？

（入极都入唔到去）

（程胜心情好低落）

毛毛：你做咩呀？有心事呀？

*程胜（深呼吸）：ok.而家时间无多呀，即刻去周围(目及)(目及)。睇吓有啲咩可以装得落个咁大嘅袋度。

毛毛：我明，我明。例如呢？

程胜：啲名贵嘅笔呀，打火机呀，烟灰缸呀嗰啲呀。

毛毛：我明，我明。

*毛毛（揾到一个超大嘅烟灰缸，真系蠢到死）：揾到喇，揾到喇，哩！哩！哩！揾到个好名贵嘅烟灰缸呀。嚟，擘大个袋摆佢落去先喇。嚟！嚟！嚟！擘大啲！擘大啲！擘大啲！差唔多！差唔多！差唔多！嚟！嚟！嚟！

（程胜非常失望，抌低个包，沉思状）

毛毛：做咩呀？又有心事呀？

程胜：系。

毛毛：讲嚟听吓。

程胜：我唔想讲。

*毛毛：有冇其他表达嘅方法呀？

程胜：有！（又试猛掴毛毛）

（两个人周围caau3嘢）

程胜：死唔信成间屋都冇一件可以摆得落个袋。

毛毛：系咯，系咯，揾吓添呀。揾吓添呀。

程胜（揾到个遥控器，唔觉意开咗个电视机）：咦，呢件得㖞。

(电视声)

李修贤：举手！

（毛毛同程胜即刻举高手）

程胜：我偶像㖞。

毛毛：李sir吖嘛。

程胜：梗系唔系啦，大傻呀。

毛毛：李sir。

程胜：大傻劲啲。

毛毛：好咯！好咯！大傻就大傻吖。

李修贤：你两个仆街再讲多次？

（落楼）

毛毛：噉而家点呀？

程胜：而家梗系谂办法揾个大啲嘅袋先啦。

（电话响）

*电话：呢个系电话录音，请你听到嘟一声之后留低说话。阿陈呀，上次同你讲嗰个jackie呢要迟一个礼拜先嚟得呀。定实到时间我再call你啦吓。

毛毛：哎呀！死喇！

程胜：又关你事？

毛毛（扚起台面嗰两张演唱会飞）：你睇吓。啲演唱会重喺度嘅？

程胜：即系啲人随时会返嚟。撇嘞。

毛毛：吓？

（有人揿钟）

（程胜同毛毛喺闭路电视度睇到出便门口有两个差人喺处）

差人：黄太！

毛毛（手足无措）：噉点算呀？去边度揾黄太呀？啊？

程胜：黄太？

毛毛：边度揾黄太呀？

程胜：扮呀，扮呀。

毛毛：边个扮呀？

程胜：梗系你啦。

（门口）

差人甲：唔知系咪有啲唔妥？

差人乙：系呀，等我call返去总台先啦。

（度门卒之都开咗）

毛毛（扮黄太，块面搽满晒啲白蒙蒙嘅嘢，一路刷牙一路讲嘢）：咩事呀？啊？

差人甲：阿……阿黄太吓哗？

毛毛（含糊其词）：系。

差人甲：唔好意思呀，头先呢就有人投诉你嘅电视机呢声浪太大。

程胜（大声嗌）：老婆……

差人甲：噉我哋希望你……

程胜：喂！重唔嚟瞓觉？

*差人甲：唔好意思呀，噉你第二晚就就咯吓。唔阻你唞嘞。拜拜！

（发哥揸紧车，隔篱做住萍姐）

发哥：阿萍呀，做埋呢单呢，我哋可以上岸嘅。

萍姐：我哋？边个我哋呀？

发哥：哎哟，我同你最佳拍档吖嘛。

萍姐：哦，以前咋嘛。好耐咯噃。

发哥：我知你份人口硬心软嘅，所以几大都留返个银仔。我知你唔认得我呀，但系你一见到个银仔唔知几开心呀。你一定好挂住我嘅。

萍姐（喺个袋度caau3出个银仔）：系咪呢个呀？

发哥：系，系，系，咪就系啰。

（萍姐抌咗个银仔佢）

发哥：做咩呀？你做咩抌咗佢？

萍姐：我点知你有咗钱之后会变成点样架？我抌咗个银仔一了百了呀，费事第日认返你呀！

发哥：唔系呀哗？你咁唔信我？

萍姐：系呀，系呀，我真系唔信你系发仔呀！

（程胜同毛毛谂住撇）

程胜：快啲呀。

毛毛：得喇！得喇！抹干净先得架！

（程胜开门，见到有架车行紧嚟，吓到飞起，即刻闩门，将毛毛韫咗喺里面。）

程胜：唔好出嚟住。

毛毛：哎呀，唔好抌低我吖。

（架车停低咗）

发哥（见到程胜企喺门口，以为佢就系jackie）：唔通就系佢？

毛毛（喺里面）：出得嚟未呀？

程胜：咪嘈吖！

大话 周星驰站 zhouxingchi.cn

（程胜扮揿钟）

发哥：揿钟嘞！系佢喇！jackie呀！

萍姐：jackie？

发哥：快啲呀，落车扮啦。

萍姐：点扮呀？我屋都未入过呀。

发哥：执生啦。

萍姐：点扮呀？

（发哥同萍姐落咗车）

毛毛：出得未呀？

程胜（惊到抖抖震）：等多阵添啦。啲人就走架嘞嘛。

发哥：吓！（程胜高举双手）你……（双手扒住扇门）梗系嚟咗好耐喇。

程胜（脚震）：我嚟咗半个钟架咋。我冇呀。（无辜状）

发哥（同程胜拍掌）：hello，jackie，welcome you！

程胜：thank you！

*发哥：radom！

发哥：哎，老婆呀，快啲同jackie打个招呼啦。用美国式嘅。

萍姐：hello，jackie！welcome！

程胜：多谢！

发哥：搭咗咁耐飞机一定好攰架喇。入嚟坐呀。

萍姐：入嚟坐！入嚟坐呀！

发哥（开门）：点解会提早返嚟？

程胜：我……我……

萍姐：梗系想畀个惊喜我哋啦。

程胜：系呀。

发哥：随便坐，唔好客气吖。（同萍姐讲）老婆，我要打个电话，你招呼jackie。吓。（上咗楼）

萍姐：jackie呀，坐，坐，随便坐呀。

程胜：好呀，好呀。

萍姐：坐，坐坐坐，随便坐！

毛毛（匿喺程胜坐紧嗰张咕辰后面）：我喺你后便呀。

程胜：呢度都好大地方噉呀。

萍姐：算系噉啦。

毛毛：噉而家点呀？

程胜（细细声）：我引开佢，你自己走吖。

程胜：auntie呀，可唔可以带带我去洗手间吖？

萍姐；洗手间？

程胜：系咯。

萍姐：得！得得得得得！过嚟呀，我带你去。

程胜：好呀，唔该晒！（起身跟萍姐走）

（毛毛趁机走）

发哥（打电话）：喂！janet妈咪呀，apple点呀？唔好甩我底㖞。嚟紧喇？好，好，好，唔该。冇问题，第日呢一定嚟捧场。

萍姐：厕所呀，厕所就到架喇。

萍姐（带咗程胜去到一间卧室）：终于嚟到厕所，就系里便。（开门）请！

（萍姐显得好尴尬）

程胜：呢度系厕所？

萍姐：我……我唔知呀。

程胜：你唔系唔知边度系厕所吓哗？

萍姐：我唔知……

发哥（及时赶到）：佢嘅意思系话唔知你未见过咁先进嘅厕所。

程胜：吓？

萍姐：等我解释。

（萍姐出咗去）

发哥（呃程胜）：我特登揾人设计到好似睡房噉样，其实呢张唔系床，下便系精密嘅排水系统，自动冲厕，直出太平洋。

程胜：系哗？（正想掂吓张床，畀发哥阻止）

发哥：哎，因住跌落屎坑。我哋去过第二间。

程胜：呢啲咁先进嘅嘢，我真系未试过架㖞。

发哥：噉一齐啦，试试吖。

程胜：好呀。好呀。

（发哥同程胜小解）

程胜：咦？果然系好方便㖞。科技先进，真系令我叹为观止。阵间唔争在大多个便。

发哥：吓？

程胜：世伯咁好火力嘅？

（毛毛正想爬出墙之际，见到有架车喺门口停低，唯有踎低。）

的士佬：小姐，多谢！三十五文啦。（想博懵，点知畀apple喷咗一面嘢。）

*apple（饮到晕吓晕吓）：衰佬想博懵。（揿门钟）开门呀！

发哥：来日方长，第日有机会先大便啦。我要介绍个人畀你识。

萍姐：哎，哎，哎，出便呀有个女……

发哥：哦，我哋个女返嚟吓吗？快啲去开门啦。

萍姐：女？

发哥：去呀。佢啱啱开完party。

程胜：咁架势？

发哥：我介绍畀你识。

程胜：好呀。

（萍姐开门）

apple：女人我唔接架。

萍姐：咩话？你做我嘅女？哎呀，入嚟啦。

发哥：佢学过啲特别嘅仪态架。

发哥（迎接apple）：hi，apple，返嚟喇？快啲同jackie打个招呼喇！

（apple扑埋去揽住程胜索吻，将啲嘢呕晒落程胜嘅口中）

（程胜喺厕所搞掂完啲嘢出嚟）

毛毛（爬咗上程胜间房）：hi!

程胜（弹起）：hi! 你做咩呀？

毛毛：我觉得我噉样走咗实在太冇义气，所以特登返嚟救你嘅。嚟吖。

程胜：边个话畀你听我要走啫？

*毛毛：哦，你梗系贪佢大波所以你唔走系咪呀？

*程胜：你吹呀？我一睇个大波妹就知佢冧我。所以我而家决定扮嗰个jackie。如果畀我搞掂咗佢，多多钱都有呀。

毛毛：你唔怕人哋认得你呀？

程胜：你头先冇听电话录音嘅咩？话明嗰个jackie一个礼拜后至返嚟吖嘛，所以我哋重有时间。

毛毛：好呀，噉我哋再次合作吖。

程胜：喂！我思疑你返屋企瞓吓晏觉好过㖞。

毛毛：点解？你嫌我阻埞呀？

程胜：唔系，我觉得你太辛苦嘞。你太落力嘞，所以你应该返去唞唞。

毛毛：噉我有咩地方需要改善呢？

*程胜：冇，我认为你经已完美。

毛毛：其实我有今日都捱咗唔少日子架。不过我觉得我重有少少瑕疵架。

*程胜：知道自己有瑕疵就梗系改改佢啦。

毛毛：我明，我明。（弹起身，离开）

程胜：好行夹唔送咯㖞。

程胜：点解我头先唔摙死佢？点解呀？太心软嘞！

（洗手间）

发哥（氹apple）：醒啦。醒啦。醒啦。

apple：饮酒呀。

发哥：哎呀！乖啦。乖啦。快啲醒啦。醒啦。醒啦。

萍姐：有冇搞错呀你？揾只醉鸡返嚟扮我嘅女？

发哥：你知唔知呀？我几难先揾到一个呀，企喺度好似瞓喺度，有着衫好似冇着衫嘅女人呀。

萍姐：你讲嘢呀？你行开呀！等我嚟呀！（揾花洒冲醒apple）

萍姐：醒呀！醒呀！……

发哥：唔好啦。唔好啦。唔好啦。hello，apple.

apple：哎呀，发仔，你做乜咁耐都唔嚟捧我场啫？

发哥：哎呀，今次好喇。醒喇。醒喇。

发哥：喂！apple，我见到嗰条僆仔好似好冧你噉㖞。你扮我个女，如果氹定嗰条僆仔，我哋大把钱揾架。

apple：要我扮小姐咋嘛。易吖。

萍姐：易，易，易乜嘢呀？叫你扮千金小姐唔系舞厅小姐噃。

apple：喂！八婆，你咩料呀？

*萍姐：八婆？你话我八婆？

发哥：哎，哎，哎，哎哟，好喇，阿萍呢佢就扮我老婆，你就扮我个女，我哋大家一家人。

发哥：apple呀，你要氹掂嗰条僆仔，要几多时间呀？

apple：一个礼拜。

发哥：哗！好似耐啲㖞。可唔可以快啲呀？

apple（除衫）：三日吖。（萍姐畀apple嘅身材吓亲，睇到呆晒）

发哥：重可唔可以快少少？

apple（又除一件，净系得个bra）：一日啰。

发哥：哗！好！好！（拉萍姐出间房）嚟呀！嚟呀！（企喺门口）重可唔可以快啲添？

apple：哦，易啦。（除埋个bra）

（萍姐揞实发哥对眼出间房）

（第二朝）

（程胜刷紧牙嘅时候行去窗边，见到apple喺泳池里面游紧水，好似条件反射噉样即刻扑到去楼下，做咗一个好型嘅跳水动作，结果都系撞咗喺块玻璃门上面。）

（程胜拉开度门，谂都唔谂就跳咗落去泳池里面） 大话 周星驰站 zhouxingchi.cn

程胜：等埋我呀！

（程胜大失所望，原来游水嗰个唔系apple系发哥）

发哥：游水呀？早晨，jackie！乜咁早嘅？

程胜：uncle，你好吗？食咗早餐未呀？

萍姐：jackie，爹哋，嚟食早餐喇。

程胜：auntie，早晨！

萍姐：快啲吖。

萍姐（喝工人）：喂，快啲叫嗰个女人起身，如果唔系冇得出粮呀。

发哥：今次返嚟，有咩搞呀？

程胜：哦，喺个新机场嗰度我就负责啲保安呀，防盗嗰啲噉嘅……

发哥：捉贼呀？

程胜：唔关我事架！

发哥：重话唔关你事？嗰啲咩保安呀，防盗呀咪用嚟捉贼咯？

程胜（响指）：系呀，啱呀，啱呀。

发哥：哦，大生意㖞。

程胜：uncle，你呢？

发哥：哦，搞一啲保险噉啦。

程胜：即系呃钱吓哗？

发哥：呃钱？你点知呀？

程胜：氹人买保险嗰啲咪同呃钱咁上下？吓哗？

*发哥：哦，系呀，噉你又唔好讲得咁衰。

程胜：梗系啦，讲笑咋嘛。喂！好揾架㖞。

萍姐（迎面）：喂！快啲过嚟坐低，慢慢讲吖嘛。爹哋呀，公司打电话催你返去签张五百万嘅合同呀。

发哥：几百万，湿湿碎，唔好烦我啦。个女呢？

萍姐：啱啱叫咗佢架喇。

apple（着住三点式）：hi，爹哋。

（发哥同程胜睇到流晒口水）

（apple唔小心sin3亲脚）

*发哥：冇事吖嘛？

程胜（行上前）：你冇事吖嘛？

*apple：冇事，好在笪地都唔系好硬。

程胜：系？真系几腍㖞。挞多次玩吓咯。

apple：对唔住呀，jackie，寻晚真系唔好意思哩。

程胜：傻啦，系我失礼就真。

发哥：可能呢啲系你哋嘅缘分呀。

apple：好衰架，爹哋呀，你重喺度笑人。人哋好丑吖嘛。

发哥：佢好怕丑架。

程胜（仰天长笑）：香港地而家重有啲咁怕丑嘅女仔，真系难得。

apple：好衰架，噉话人。

发哥：佢唔止怕丑呀，重有啲嘢要话畀你知。

程胜：重有，咩嘢？（唔觉意打翻apple嘅早餐）

apple：哎呀，人哋最钟意食肠仔架嘞，嘥晒添。

发哥：哎，嚟！嚟！嚟！

apple：噉点呀？

程胜：对唔住，对唔住，我帮你抹。

程胜：为咗表示我对你嘅歉意。（除咗件衫，将两只荷包蛋贴喺身上以示歉意）

apple：你噉做，又何必呢？

程胜：只要你唔怪我，就算赴汤蹈火我都在所不惜。

（发哥同萍姐起身拍掌）

apple：傻嘅，我又点会怪你呢？

程胜：噉就太好嘞，我上去换件衫先。失陪一阵。（去换衫）

apple：喂！条僆咁戆居架？

发哥：戆居先至易呃啦嘛。头先佢都唔知几冧你呀。

apple：使乜讲？

发哥：好嘢！好嘢！

萍姐：哼！两个嘅衰样好似去club叫鸡噉。

apple：喂！你讲咩呀？惨得过我冧得掂条僆啫。唔抵得你上吖。

萍姐：哼！上咪上啰。

发哥：哎，唔好吵。唔好闹交。一人少句。apple呀，你上去换过件衫先。喂！记住唔好饮酒呀。

（程胜带住apple入咗间餐厅食嘢，好多人都畀apple呢个大波妹吸引住）

程胜：就呢度嘞好吗？

apple：唔该。

程胜：想揾啲咩食住先噉呢？

apple：我想食雪糕呀。（有一个麻甩佬埋去apple想zong1吓apple对波）

程胜：好呀。

apple：哎，我要食雪糕车嗰啲。

程胜：又得啫。我出去买。

apple：唔该。

程胜（见到条麻甩佬）：先生，你喺度做咩呀？

麻甩佬：摘树叶啰。

程胜：你重讲大话？你zong1呢位小姐嘅胸吖嘛。

（条麻甩佬无地自容，耷低头听教）

先生，你有冇廉耻架？我思疑你冇。喺啲咁高尚嘅餐厅里头你做出啲噉嘅所为。我哋中国传统嘅道德观念去晒边度？

麻甩佬：我……

程胜：你唔系人嚟，更加冇资格做中国人。

麻甩佬：我……

程胜：我以后都唔想再见到你，你扯。扯啦嘛。

（麻甩佬畀程胜润到喊咁滞）

（成班麻甩佬走埋去gab9嘢）

apple：waiter!

（程胜重上树gab9添，gab9到流晒口水）

apple：你喺度做咩呀？

*程胜：哦，我睇吓上便啲有冇雪糕卖咋嘛。

apple：哦。

程胜：apple，你小心啲。我发觉呢度好多贱格佬呀，狗公呀，都好想zong1你呀。

apple：唔该。唔该晒。

程胜：我去买雪糕。（爬树）

apple：上面有雪糕卖嘅咩？

程胜：啊，头先揾过嘞，冇。出去出便揾吓。

apple：waiter!

侍应生：小姐要啲咩呀？

apple：有冇火呀？

侍应生（挞着火机同apple点烟）：有。

*巫婆：你听我讲啦，我啲降头术个好劲架。首先呢，你返去剪咗嗰个男人左脚嗰啲脚甲㖞，然后加埋佢啲眼泪，然后呢就再捞埋在一齐，再加埋我特制嘅神油。只要佢饮咗呢，佢就会听晒你嘅说话，你要乜都得啦。

萍姐：畀佢饮？

巫婆：系呀。

萍姐：如果捞唔齐呢？

巫婆：哎呀，噉就大镬咯。如果净系饮神油呀，佢就会变成一个女人架喇。

萍姐：会变女人？

巫婆：佢饮咗之后呢，你再叫佢三声佢嘅名。噉呢个男人呢好快就会变成个女人架嘞。

巫婆个徒儿：师父。

*巫婆：系呀，系呀，呢啲呢，解药嚟嘅。你唔掂至可用㖞。

萍姐：我得架喇。多数唔使用嘅。

巫婆：噉咪好啦，你唔使惊个大波妹嘞。

萍姐：多谢你。

巫婆：自己人使乜客气㖞。

（某诊所）

毛毛：医生，唔该你帮我搞搞佢呀。

*医生：不过，我谂你谂清楚架㖞。我睇你都唔蠢架。呢一个手术呀，会影响你一生架。

毛毛：实不相瞒，医生，我系靠食脑为生架。所以样嘢对我嚟讲好紧要架。唔该你帮帮我吖。

医生：好喇，好喇，我即管试试吖。

（毛毛开门出嚟，对波变到劲大）

医生：我一早都话咗你顶唔顺架啦。香港人至劲呀都去到三十八吋。

毛毛：

医生：你系都要五十九吋点得架？哎呀，好彩揾个假嘅同你试试啫，如果唔系呀冇得man1啰。

毛毛：我知错喇。

程胜：apple呀，我成日有种感觉，我哋以往好似系相识嘅噉。

apple：系呀，我都有呢个感觉呀。

程胜：呢啲缘分嚟嘅。

apple：系呀。系呀。

程胜：apple，其实……其实我好喜欢你嘅。不如今晚你嚟我房……

apple：好呀。好呀。好呀。

程胜：我可以用人格保证，今晚只系想倾吓心事噉解嘅啫。

apple：唔系呀？净系倾心事？

程胜（好大反应）：唔系你想点呀？

apple：睇吓电视都得啩？

程胜：哦，得，睇电视，得。

apple：我可以用人格保证，净系倾偈同埋睇电视。

程胜：噉我就放心喇。（见到毛毛嚟咗餐厅）我去去洗手间先。

apple：好呀。

（程胜走去招呼毛毛）

apple：正傻仔。

毛毛：call人食饭唔早啲嘅？

程胜：几时轮到你呀？

毛毛：吓？

程胜：我已经冧掂咗个大波今晚再嚟我房度，你而家即刻去预备架相机，今晚爬上嚟我房度匿埋嚟偷影。

毛毛（响指）：哦，我明。

程胜：有咗呢啲相之后，我哋就可以勒索佢老窦老母呀。

毛毛（响指）：哦，我明。

程胜：即刻准备吖。

毛毛：o.k.（“雪”一声松咗去）

程胜：apple呀，我哋走先喇，好吗？

毛毛：其实要偷影你哋啲咩嘢呢吓？

（apple晕咗）

程胜：apple!

（程胜将毛毛拖埋一便）

程胜：你死架？

毛毛：咩呀？

程胜：好彩佢咁易醉啫？如果唔系你一句咪穿晒煲？

毛毛：你求先真系冇话畀人听影啲咩㖞。

程胜：梗系影我同佢喺床上面嗰啲噉嘅嘛。

毛毛：我明。（转身走）

程胜：过嚟，佢而家醉成噉，今晚嚟唔到我房添呀。噉喇，听朝九点正，改为喺佢间房度等呀。

毛毛：我明！我明！

*程胜：喂。攞住五呀文散纸嚟先啦。

毛毛：冇五呀文散纸㖞。得返大纸啫。

*程胜：有冇搞错呀？怕咗你，攞嚟顶住先。弹开。

毛毛：哦。

发哥：apple，apple，快啲啦。起身啦。

apple：做咩呀？

发哥：我都叫咗你唔好饮酒架啦。嘥咗一晚时间喇。你真系。

萍姐：发仔，我谂到条好桥呀。

*发哥：等等先。

萍姐：真系……

发哥：你而家即刻过去同佢上床，我就偷影。ok? 搞掂佢。

apple：哎呀，咁早？人哋都唔知制唔制。

*发哥：哎呀，唔制你都要想吓办法啦。夹硬去啦。快啲！快啲！快啲去洗面呀！

萍姐：发仔，你听我讲吖。

发哥：有一件事好紧要，不过唔知你做唔做得嚟。

萍姐：得。冇问题。

发哥：每一个细节都要记得好清楚。四瓣牛扒三分熟，番茄薯仔做配料。罗宋汤唔要洋葱，餐酒呢就要1941年。ok？去。搞掂佢！咪住……你想同我讲嘢？

萍姐：系呀，系呀，我想讲呢……

发哥：咪住，搞掂咗呢件事，再返嚟同我讲。快啲。快啲。

发哥（催apple）：喂！咁耐呀？得未呀？ 大话 周星驰站 zhouxingchi.cn

apple：哎呀，唔好催啦。

萍姐（切洋葱）：我一个人都可以搞掂条僆仔。攞佢啲眼泪，易过借火呀。

（程胜应门）

萍姐（托住盘洋葱）：早晨！

程胜：早晨！auntie，你做乜流眼泪呀？

萍姐：哦，冇，我惊你唔钟意食我煮啲早餐之嘛。

程胜：傻啦，点会呢？（食生洋葱）我最钟意食生洋葱架添呀。

*萍姐：你唔怕yip9眼咩？

程胜：话明最钟意，点会yip9眼呢？你唔好喊喇，唔系你喊我喊架嘞。

萍姐：唔系吖嘛？

程胜：系哩。

（萍姐大喊）

程胜（大笑）：auntie，你真系幽默，畀你玩死呀真系。（嘭一声闩埋度门）

发哥：嚟呀，嚟呀，嚟呀，快啲啦。靠晒你嘞，执生呀。

（发哥同apple嚟到程胜间房门口）

apple：hi，早晨呀。

程胜：hi，apple！

apple：jackie……jackie……

程胜：apple!

apple：唔好意思呀，我寻晚饮醉咗唔嚟得。我而家同你倾心事吖。

（apple一路将程胜ung2到张床上便）

程胜：我始终都系客人嘅身分嚟，噉样做，恐防会对唔住你父母亲。

apple：点会呢？我爹哋妈咪当正你系自己人一样嘅。

程胜：噉又系。但系呢度始终都系客房嚟吖嘛，硬系冇乜亲切感噉。不如过你间房哩？好吗？

apple：好呀！好呀！即刻去呀。

大话 周星驰站 zhouxingchi.cn

（毛毛爬上apple间房）

毛毛：冇人嘅？（匿埋）

（apple间房）

程胜：不如我哋换位嘞好吗？

apple：不如我哋换位嘞好吗？

程胜：好呀，好呀。

程胜：咪住。我突然醒起呀，我今日原来有事嘅。

apple：我都系呀。

程胜：系咩？

apple：系呀。

程胜：噉……你急唔急呀？唔急就留返第二晚先。

*apple：哦，唔急，迟吓先啦。

程胜：好呀！好呀！好呀！

（程胜间房）

程胜：auntie，你喺度做咩呀？

萍姐：我……帮……帮你执床之嘛。

*程胜：咁多谢呀。

萍姐：唔使客气啦。

程胜：噉麻烦你帮我洗埋个厕所佢。

萍姐：得，得，得，就嚟喇。就嚟喇。

程胜：唔该你。

萍姐（配制神油）：名垂千古就靠呢一剂。僆仔，你唔好怪我，系你唔好彩。

发哥（揸住几张相）：流芳百世都系靠呢铺。呢次唔使惊条僆仔唔畀钱。

程胜（又系揸住几张相）：有咗呢啲相，我呢个咁精密嘅计划就简直系话天衣无缝。一个钟头之后，如果你重未见我出嚟嘅话，就即刻入嚟搞破坏。

毛毛：我明！我明！

程胜：无论发生咩事，你都一定要拖我走。

毛毛：搞破坏我至叻嘅。

程胜：扬名立万都系靠呢剂。

程胜：今次我要话畀全世界嘅人听，乜嘢先谓之食脑！

发哥：今次我要话畀全世界嘅人听，乜嘢先谓之食脑！

萍姐：今次我要话畀全世界嘅人知，乜嘢先谓之食脑！

（几个人一齐落楼食早餐）

apple：hi!

程胜：hi!

程胜、发哥：今日嘅天气……（笑）

（四人皆大笑）

发哥（一面严肃）：难为你重笑得落？

程胜：笑得落。

发哥：世侄，枉我对你咁好，你居然强奸我个女？

apple：爹哋！

程胜：世伯，乜你噉讲嘢呀？

发哥：重想唔认？（将啲相摊喺程胜面前）有相为证，睇吓你嘅淫相呀！有证有据，唔到你抵赖。快啲赔偿我个女嘅损失，如果唔系，我拉你上差馆。

程胜：哈哈哈！世伯，呢张相你净系影到你个女个样咋嘛，我个样你影唔到呀。点睇呀？

发哥：系㖞。

程胜：哈哈哈！

萍姐：哈哈哈！大家唔好讲啲噉嘅嘢喇。嚟！嚟！嚟！饮杯吓。

发哥：饮杯！唔好讲啲衰嘢。

程胜：你重饮得杯落？

发哥：饮得杯落。

程胜：你个女污辱我嚟。

发哥：啊？

apple：啊？

程胜：睇吓呢啲相。（将啲相摊喺发哥面前）

发哥（质问apple）：点解你做啲噉嘅嘢呀？

程胜：你个女今朝污辱咗我，呢啲相就系证据。若然我公开出去，包保你名誉扫地嘅。问你以后重点见人？除非，你肯赔偿我嘅损失。哈哈哈！

发哥：哈哈哈！世侄，呢张相净系影你嘅样。我个女嘅样你影唔到呀。

程胜：系㖞。

萍姐：我哋唔好讲啲噉嘅嘢啦。饮杯吓。

发哥：唔好讲啲衰嘢。

程胜：噉又系。

发哥、程胜：饮杯。

程胜（摆低酒杯，拎起两张相）：而家两张相都喺我手，怕且都证据确凿嘞啩。

（发哥想抢返）

程胜：哎，唔好乱嚟吖，想攞返呀？快啲畀钱咪有啰。哈哈哈！（饮咗杯神油）

萍姐（大笑）：哈哈哈！你中咗我嘅计喇。僆仔，你死梗喇。

程胜：点解噉讲呢？

萍姐：嗰杯果汁里便喇，我落咗马来西亚最毒嘅降头，如果我叫三声你嘅名，你就变咗女人。

程胜：你咁阴毒？！

萍姐：你快啲赔钱，如果唔系我唔畀解药你。

程胜：钱一定冇得赔，你快啲攞畀解药我，如果唔系公开你个女啲相。

发哥：你够胆公开，我就叫佢嗌你个名。

萍姐：我就嗌你嘅名。

程胜：你试吓嗌我公开啲相。

发哥：你够胆公开就即刻嗌。

萍姐：我即刻嗌你个名！

程胜：我即刻就公开！

发