食神粤语全剧本

（庙街）

相士：先生，你额有朝天骨，眼中有灵光，仙人托世，神仙下凡，终于畀我等到你。

（史提芬周欲走）

相士：咪喐，虽然我泄露天机，灾劫难免，但系我命中注定，就算我冒再大嘅危险，我都要同你睇个全相嘅。

（史提芬周仍然不理）

相士：先生！先生！先生！先生！

（史提芬周帮衬火鸡嘅面档）

史提芬周：唔该畀碗嗱喳面呀。

史提芬周：碱水面冇过冷河，所以成碗汤有碱水味。鱼蛋亦都冇鱼味，但系你为咗掩饰，专登加啲咖喱汁将佢做成咖喱鱼蛋，但系噉做太天真嘞，因为你煮嘅时间唔够，咖喱味根本只系喺表面，而冇入到里便，掂到汤之后重要冲走埋。好好哋一粒咖喱鱼蛋，畀你整到冇鱼味亦都冇咖喱味，失败！萝卜冇拣过啦，太多渣，失败！猪皮又煮得太腍，冇咬口呀，失败！啲猪红松泡泡，一夹就散，失败中嘅失败！最惨系啲大肠，里面都未通干净，重有嚿屎，你有冇搞错呀？（火鸡唔理佢）

史提芬周：喂！屎呀喂！（火鸡唔理佢）

史提芬周：喂！屎呀喂！（嗌多次）

史提芬周：喂！屎呀喂！（嗌得重大声）

火鸡：攞去抆咗佢吖！（递厕纸畀史提芬周）

史提芬周：唔好咁幽默好㖞！我四围唱你有屎架㖞！

火鸡：唱乜鬼嘢呀！话明嗱喳面有两嚿屎有几咁奇呀？廿三文呀！

史提芬周：你畀我呀？

火鸡：嘘！

史提芬周：嘘！讲咗咁耐嘢畀返卅文嚟睇医生啦！

火鸡：嘘！

史提芬周：畀吓面啦！话晒都食神呀！

火鸡：食神？

史提芬周：食神！

（两人对望良久）

（另一边厢）

相士：你额有朝天骨，眼中有灵光，仙人托世，神仙下凡，终于畀我等到你嘞。

神仙：我神仙喺呢区都起晒朵架啦！使咩你讲呀？死婆！

相士：喂！揾食啫，唔使咁hurt我呀哗？

神仙：死婆！

相士：死佬！

神仙：死婆！

相士：死佬！

……

（全港至尊名厨大赛）

司仪：全港至尊名厨大赛，现在开始！

（众参赛者向史提芬周鞠躬）

司仪：有请我哋今晚嘅评判——食神！！

（啲记者争相影相）

司仪：食神首先要品评嘅，就系大龙凤酒楼嘅总厨，戴龙师傅嘅“皇帝炒饭”。

史提芬周（食咗一啖）：好！居然将啲米酿喺箕围虾里便嚟蒸熟，再用原只吉品鲍鱼榨汁，加上极品官燕嚟炒，表面上睇起上嚟平平无奇嘅炒饭，其实金雕玉砌，高深莫测。不愧有炒王嘅称号。

戴龙：哈…哈…哈…

史提芬周：可惜，水分太多，饭粒太软影响口感，因为你连炒饭最基本嘅常识都忽略咗。要用隔夜饭炒呀炒王！零分！

戴龙：啊！

司仪：跟住要试食嘅就系锦江饭店大厨刘三师傅嘅“锦绣多味鱼”！

史提芬周：哗！居然用苏眉头、星斑背、三刀腩、lap9鱼身、奀哥尾嚟重新砌成一条鱼，重要一边蒸一边炸，每种鱼两种食法，总共十种唔同味道，条鱼真系……真系受咗辐射噉㖞！睇见就想呕喇，你重话叫我食？！零分！返屋企自己检讨吓！

刘三：我……

史提芬周：你咪就系多嚿鱼啰你！

厨师甲：唔系多嚿鱼，你系多咗几嚿鱼呀！你呀！你呀！你多咗几嚿鱼呀！

司仪：即刻要试食嘅就系御善坊陈东师傅嘅素菜“金缕佛衣”！

史提芬周：咦！呢味斋菜，材料变化丰富，刀工细腻，造型突出，连最难雕嘅豆腐都畀你雕到十分精细㖞！雕咗几耐呀？

陈东：雕咗成日架啦！

史提芬周：噉咪得个雕字！臭晒啦！你闻到吗？

陈东：闻到。不过，主要呢个菜式呢，显示我快刀手嘅刀工啫！

史提芬周：唔该伸出你嘅左手。突出你嘅中指。（陈东嘅中指粘咗胶布）

史提芬周：快刀手，就切损手，好嘢！（畀陈东零分）

司仪：而家只系剩得五羊酒家大厨杨震天嗰味“乾坤烧鹅”啫，睇嚟今次要攞冠军佢好稳阵啦！

史提芬周（用手掂烧鹅）：冻晒嘞！零分！收工！

杨震天：咪住！叫得“乾坤烧鹅”，当然内有乾坤喇。其实，我系食里便啲禾花雀咋！啲禾花雀吸收烧鹅嘅香味，而且保温，喺呢个时间食，啱啱好呀！每一个细节，我都计算埋架！食神，你无话可说啩！

司仪：精彩呀！今届嘅至尊名厨终于诞生嘞！

史提芬周：咪住！都系零分！

杨震天：吓！

司仪：喂！唔系呀哗？

杨震天：点解呀？

史提芬周：因为太丑样嘞。

杨震天：冇可能嘅，我啲禾花雀系百中选一，无论身材、样貌都系一等一㖞！

史提芬周：我并唔系指啲雀，系指阁下！

*杨震天：我丑样！（问旁人）喂！丑样关餸咩事呀？

史提芬周：关事，试问见到阁下个样，重边有胃口食。所以我都唔敢望你。

杨震天：丑样冇罪架！

史提芬周：有罪，作为一个厨师，应该考虑到食客最细微嘅心理，等于三级片嘅女星，都要去隆胸嚟取悦观众，你有啲潜质嘅，不过整咗容先讲！

杨震天：呀！（双手掩面痛哭）

记者：擘开佢只手啦！

司仪：估唔到食神对菜式嘅要求系咁严格架！究竟点先可以煮到个无懈可击嘅餸出嚟呢？

史提芬周：其实煮食之道，最紧要系一个字——（划咗个“心”字出嚟）

史提芬周：呢味“彩虹鲜花拔丝”，系我送畀大家嘅甜品。

司仪：吓！系个心字？！

史提芬周：冇错，只有用心，先可以做到最好嘅菜！

杨震天：（食咗一啖）好好味呀！

司仪：佢高傲，但系宅心人厚；佢低调，但系受万人景仰；佢可以将神赐畀人类嘅火运用得出神入化，可以煮出堪称火之艺术嘅超级菜式！佢究竟系神仙嘅化身，定系地狱嚟嘅使者呢？冇人知，但系可以肯定，每一个人都畀佢一个称号──食神！（畀史提芬周掴咗一巴）

史提芬周：你就噉神仙嘅化身咪得啰！你讲乜嘢地狱嘅使者呀！地狱关我咩事呀？

司仪：我谂住加少少神秘感畀你咋嘛！

史提芬周：你谂住？噉几时轮到我谂呀喂？神秘感！神你老母！黑晒画面一眼spotlight打落嚟打到你条粉肠成只鬼噉呀，你重嫌唔够神秘感？我而家唔系拍恐怖片呀大佬！

司仪：导演叫架！

史提芬周：嗰个导演你同我揾人买起佢，跟住你再同我揾人买起你。有啲噉嘅废柴导演呀！要有你啲噉嘅废柴司仪大家配合埋一齐先嚟sin3到我咋嘛！你而家系咪玩我吖？

司仪：对唔住呀！我保证下次执好啲稿佢吖！我而家去改一改佢。

史提芬周：废柴！你条废柴！你记住呀你系一碌废柴，你唔好行返去，你碌返去好呀你。

史提芬周（走去另一边）：各位师傅，辛苦晒！

各师傅（拍手）：应该嘅！应该嘅！

（史提芬周同各师傅逐一扼手）

戴龙：心照啦食神！

史提芬周：唔好噉讲！唔好噉讲！

史提芬周（同刘三扼手）：刘师傅，多谢晒！跟你学嘢。跟你学嘢。

刘三：应该嘅！

史提芬周：多几嚿鱼呀你！

刘三：练咗好耐架喇。……

*陈东：有咩需要帮手开声呀你。

史提芬周：一定！一定！

杨震天：多谢你封大利市就真！

史提芬周：你知道收咗我大利市嘅咩？你知收到我钱架吓哗？噉你唔好成场鬼杀咁嘈啦！

杨震天：我好投入好大声嚟讲架喇！

史提芬周：唔系大声就好戏架杨师傅！你尤其是最lau1尾嗰句“好好味呀”嗰句呀，你嗌到几硬几假呀！盲嘅都知道你做紧戏啦！你有冇职业道德架你呀？

杨震天：当时含住你整嘅水晶胶加双氧水……

史提芬周：噉梗系水晶胶加双氧水啦！唔系我撩到个字出嚟！你一早知架嘛呢啲嘢！

杨震天：好难顶吖嘛！

史提芬周：噉梗系难顶啦！而家就系要你难顶咋嘛！你重喺度驳嘴，你以为真系有料呀？有料你企喺度插我唔系我企喺度插你啦！你啲噉嘅死蠢！你畀着我两年前唔好老脾，我一脚踭你落下便花园道呀，再挂喺皇后像广场嗰度嚟鞭尸呀！你啲噉嘅……（揦起一堆烟头塞落杨震天口中）即刻同我含住啲烟头企喺角落头呀，嗌“好好味呀”，嗌到我满意为止呀！

史提芬周：阻唔阻你哋呀？

其他几位师傅：我哋走先喇。

史提芬周：喂！好呀！好呀！好呀！唔该！唔该！唔该！多谢！

（史提芬周电话响，又走去另一边）

（财团老板抛一根烟畀史提芬周。）

史提芬周：喂！你只大快乐升咗几个价位架㖞！你唔通知我嘅？

财团老板：系咩？我唔知㖞！我自己都唔知！我发誓自己都唔知！倾返生意先，我有嚿嘢，谂住借助你嘅大名睇吓大家有冇得合作吓。

richard：即食碗面。

史提芬周：maggie。

maggie：而家市面上流行嘅“即食面”呢系有五十三种。一年嘅营业额系有十三亿，即食碗面占其中嘅三十三个percent，竞争都好大。

史提芬周：包装唔错呀！

财团老板：个细侄负责搞嘅，佢好崇拜你架！richard，叫史提芬哥啦！

richard：史提芬哥。

史提芬周：咦！richard，好richard㖞！受过高等教育定嘞！

richard：系呀！美…美…美国哈佛大学。

史提芬周：美…美…美国哈佛大学。（众人笑）

richard：重有英国剑…剑…剑桥大学。

史提芬周：剑…剑…剑桥大学。（众人大笑）

richard：双硕士学位。

（史提芬周拍手大笑）

richard：或者等我讲吓呢个产品嘅设计吖！（走向史提芬周）

史提芬周：你做咩呀？你行过嚟做咩呀？你喺嗰便讲你咪讲啰！呢度系你行埋嚟嘅咩？你边度乡下呀？

richard：潮州。

史提芬周：（潮州话）pu你阿母！你晓唔晓规距嘅啫？唉！你真系，重话硕士学位，食屎学位咋啩！

财团老板：你行过去做咩啫？人地叫你喫屎呀！听唔听到呀你呀？

史提芬周：喂！算啦，唔好吓亲啲细侄啦！

财团老板：噉系吖嘛！呢个细侄我唔教，边个教佢啫。

史提芬周：定啲嚟呀你，唔好手震呀！嚟！乖啦！奀姑！奀姑！笑返。（richard笑返）呀！！

史提芬周：喂！你呢碗嘢呢，我睇啲鱼蛋曳啲㖞！松泡泡冇弹力嘅！

财团老板：爱嚟食啫！要咁弹做咩呀？打兵乓波呀？哈…哈…哈…

史提芬周：边个话……唔可以……打兵乓波啫？（鱼蛋打中财团老板块面三次）原来都几弹㖞！

（财团老板企起身，睥住史提芬周）

史提芬周：饮杯先啦衰鬼！

财团老板：衰鬼！喂！呢剂嘢你几时有兴趣几时揾我！赴汤蹈火。

史提芬周：上刀山落油镬。

二人：好兄弟！

史提芬周：真系好兄弟呀！

财团老板：睇住我呀大佬！

史提芬周：靠你啦大佬！合卺交杯！

（大厦内）

财团老板：喂！有批牛肉好抵架，有需要咪打呢个电话啰。（畀卡片史提芬周）

史提芬周：鲍鱼唔见你益吓我。

唐牛：借借唔该！（阻喺史提芬周面前）阻大家一阵呀！我叫做唐牛，我系中国厨艺学院一百零五届毕业生，我煮嘢好好食架。

史提芬周：啱啦！煮嘢好食咪终须乞食啰！喂你请埋晒啲傻仔唔掂架㖞！

财团老板：我唔识佢架大佬，唔系你啲人嚟咩？

史提芬周：阿肥牛，你边个部门架？

唐牛：唔关事嘅，我行过架咋！

史提芬周：吓！

唐牛（跪地）：其实我系好仰慕食神你，所以想睇吓食神你有冇可能畀个机会我，或者……畀我跟住你执头执尾呀！

史提芬周：仆你个街呀！

财团老板：secu！

史提芬周：做咩啫？

财团老板：锁佢啰！

史提芬周：我有话锁佢咩？

史提芬周：你好想跟我咩？

唐牛：系呀！你叫我做乜都得架！

史提芬周：即刻喺电梯口屙涿屎嚟睇吓先讲啦！

（唐牛喺电梯口踎低除裤，口担厕纸）

史提芬周：得嘞！呢条肥仔几掂㖞！哈哈！听日九点钟，上四十一楼揾amy啦！

财团老板：喂！唔系吖嘛！

史提芬周：咩呀？我钟意呀！

财团老板：钟意点就点！嗱！呢啲就power呀喇！

唐牛：多谢！多谢晒！（财团老板眼神诡异）

（另一日）

职员甲：哎呀！（箩柚插住一支叉）

众人：做乜事呀？做乜事呀？

职员甲：老世今晚留喺度食饭，我攞错咗支红酒上去，而家佢发晒脾气呀！

职员乙：你攞错咗边支上去啫？

职员甲：佢要八二啰。

唐牛：我呢支咪八二啰！

职员甲：我攞错咗支八三吖嘛！

职员乙：噉重唔嗱嗱声攞上去？

唐牛：系咯！系咯！系咯！

众人：你去啦！

大话周星驰站zhouxingchi.cn

（天台）

唐牛：周生，你支八二年呀！（唔小心kik7倒，支酒跌碎）

史提芬周（用毛巾替唐牛抹咗啲鼻血）：肚唔肚饿呀？坐低食嘢啦！

唐牛：点解会噉嘅？

史提芬周：我其实系个好人嚟架。我都有同情心架。你哋估我唔到架嘞。快啲食嘢啦。

唐牛（耷低头谂住食嘢，畀史提芬周一手揿落喺蛋糕上面）：点解又会噉嘅？

史提芬周：兜口兜面同你讲咗架喇。你估我唔到架嘛。快啲食嘢啦。

唐牛：吓？一次咪够啰，重想整多次？！

史提芬周：哗！畀你估到我想嚟多次我重有面嘅？！噉重得了嘅？！

唐牛：系㖞，我真系戆居呀！

（耷低头谂住食嘢，又畀史提芬周一手揿落喺蛋糕上面）

唐牛：我真系估你唔到呀！

史提芬周：兜口兜面讲咗两匀架啦！畀你班蛋散估到我就唔系食神啦！

唐牛：食神好嘢！

史提芬周：使乜讲呀！掂呀！

唐牛：食神好嘢！

（唐朝分店开张日）

史提芬周（向手下交带啲嘢）：张台有咁窄得咁窄，张凳有咁迫得咁迫咪等啲友坐得咁舒服，食完嗱嗱声好走。饮管有咁粗得咁粗，冰有咁大嚿放咁大嚿，杯汽水咪雀一声饮完买过第二杯啰。你系咪新嚟架？呢啲嘢要我教，你唔好一味得个岌，做啦仆街！

女职员：周生，可以剪彩咯㖞！

史提芬周：好！嚟！准备好未？准备好未？预备！（剪完彩）好！

鬼佬：congratulation！

史提芬周：thank you！入去食啲嘢！

财团老板：喂！你间分店又开正喺我大快乐对面，认真唔话得喇！

史提芬周：frien唔frien呀？

财团老板：衰鬼！

阿水：周生，恭喜！恭喜！

史提芬周：多谢！多谢！

阿水：饮多啲呀。饮多啲呀。

唐牛：阵间一嚟呢就有fans同你献花，跟住你上台呢……

史提芬周：边个识得请啲fans返嚟献花咁有计呀？

唐牛：唔系请架！真系你fans呀！

史提芬周：啊？

唐牛：女学生，斯斯文文，等你好耐架嘞！

（史提芬周谂返起自己嘅中学时代）

史提芬周（喺块镜前反复练习）：乜咁啱嘅？……

漂亮女生：hi，乜咁啱嘅？拜拜！（史提芬周揽住唐牛，个样冧晒）

唐牛：周生，周生。献花呀！

史提芬周：系呀！我知呀！

唐牛：嚟得未呀？

史提芬周：等你咋嘛！

（一核突女生撩紧鼻屎，扑埋嚟）

女学生：食神！

史提芬周：咦！有飞蝶㖞！（引开众人视线，一脚将女学生踢开）

史提芬周：各位！我哋今日庆祝唐朝第五十间分店开张典礼即刻就开始嘞。

唐牛：时辰亦都择啱晒，可以请阿灶君入厨房嘞！

史提芬周：但系我哋趁住重有些少时间呢，想同大家介绍一下唐朝新推出嘅“刻骨铭心初恋金银情侣套餐”，孔子同耶稣都讲过，“初恋无限美”，所以我哋拣咗呢个题材。加上高贵嘅用料，每个套餐只系卖九十九个九毫九，一嚿水都唔使呀阴功！随餐重要附送印花一个，集齐印花五个，再加九十九个九毫九就可以换到呢个刻骨铭心嘅骨头链嘴，呢个链嘴因为经我食神开光，所以对于青年男女谈恋爱有妙不可言嘅功效嘅。

唐牛：加埋印度神油重如虎添翼添呀！

史提芬周：哈哈哈哈哈！

唐牛：不如请阿食神为大家示范吓点整个套餐呀！

史提芬周：献吓丑就少不免架嘞！但系整得唔好大家唔好hoe1好呀！

唐牛：哎！整得唔好你就唔系食神喇！好嘢！好嘢！好嘢！

史提芬周：首先我哋要重金礼聘一啤热恋中嘅猪，睺佢哋唔为意将佢哋放血。再用佢哋嘅血……

唐牛：即系猪红吖。

史提芬周：哎！系浓情化不开嘅猪红。做咩呀？见到啲同类嘅血，有多少难过呀？哈哈哈！

史提芬周：然之后我再将佢哋嘅皮炸成金黄色。

唐牛：即系猪皮吖！

史提芬周：系情比金坚嘅炸猪皮！

唐牛：即系猪皮啰！（眼中闪出杀气）

史提芬周：再将一生只恋爱一次嘅“巴黎九棍鱼”起肉打成鱼蛋，再放喺印度嘅感情咖喱上便。

唐牛：咖喱鱼蛋？猪红、猪皮、鱼蛋，有冇萝卜添呀？

史提芬周：嗨！呢啲人多事呀！呢度唔使你，出去帮手招呼人客！系！其实梗系唔少得代表天长地久嘅韩国野生萝卜，同埋一条荡气回肠嘅猪大肠，再铺喺蔫韧缠绵嘅生面上便。

唐牛：就一家团聚成为一碗街边嘅嗱喳面。

史提芬周：哎！哎！哎！哎！

唐牛：呢碗嘢卖九十九个九毫九过唔过分呀？

史提芬周：哎！哎！哎！哎！

唐牛：不过！一碗嗱喳面能够整到好食都唔容易㖞！因为越简单嘅嘢越难整吖嘛！

*史提芬周：呀！所以个意义咪止唔系就系噉啰！

唐牛：好！就等我试吓你碗嗱喳面呢！

唐牛：咖喱鱼蛋冇鱼味，咖喱又唔入味，失败！猪皮煮得太腍，冇咬口，失败！猪红松泡泡，一夹就散，失败！萝卜拣都冇拣过一口都系渣，失败中嘅失败！最离谱系嚿大肠，完全冇通干净，重有嚿屎，你有冇搞错

呀？

史提芬周：戙笃笑咩家下叫你做？叻喇！返咗去后台补妆先啦！

唐牛：你噉样做生意？你有冇良心呀？

史提芬周：secu！secu！（唔见啲保安行动）

唐牛：呢嚿骨头呀！我每晚有份喺垃圾筒度执架！你够胆卖成嚿水，你噉样呃啲顾客我实在睇唔过眼呀！我唔会再帮你做啲噉嘅嘢架！你呢啲咩食神呀？除咗呃人重识唔识煮嘢呀？重识唔识揸镬吖？重识唔识揸刀呀？

史提芬周：你顶住，我走先！

保安：人哋问紧你嘢，你答咗人先走得架！

史提芬周：咩话？啊？好嘢！

唐牛：你根本就冇资格叫食神！

史提芬周：我唔会喺度同你撑架！你悭啲呀！

唐牛：你连喺街边卖嗱喳面都冇资格呀！

*史提芬周：对唔住！你已经唔系本集团嘅人。你再喺度发噏疯我叫警察！你冇资格企喺我面前讲嘢，我先系食神！你连同我挽鞋都未够班呀，契弟！你想玩我？！我唔怕瘀架！嚟呀！嚟呀！我买起你全家都重得呀！

唐牛：你恐吓我冇用架！

史提芬周：有人喺度捣乱！唔准影！

唐牛：够胆揦起把菜刀证明畀大家睇你重识煮嘢吖笨！

史提芬周：我唔识？（拿起刀，畀唐牛一羹打飞）

唐牛：身为一个厨师，你连揸刀嘅基本腕力都冇。哗！（爆衫，一身厨师打扮）

（史提芬周呆晒）

唐牛：等我唐牛嚟话你听，点样整一碗靓嘅嗱喳面。

（唐牛整嗱喳面）

唐牛（搞掂）：煮嗱喳面都要心思架，一字记之曰“心”！我先系真正嘅食神！

（史提芬周回忆旧事）

唐牛：我真系估你唔到呀。我系中国厨艺学院一百零五届毕业生。我煮嘢好好食架。

史提芬周：煮嘢好食咪终须乞食。煮嘢好食咪终须乞食。

唐牛：食神好嘢！

（史提芬周唔小心打烂咗灶君，咁啱呢个时候卫生署职员入咗嚟。）

卫生帮（出示拘捕令）：阿周生，有五十几个客人喺你餐厅食咗牛扒餐，感到不适，我哋怀疑你用咗英国嘅走私牛肉，而家请你即刻跟我哋返去协助调查。

（史提芬周谂返起财团老板之前介绍一啲牛肉畀自己）

财团老板：喂！有批牛肉好抵架，有需要打呢个电话吖。好抵架，有需要打呢个电话吖。

（史提芬周畀搭上孖叶，拉去协助调查。）

（史提芬周见到原来财团老板同唐牛系夹埋嘅。）

（史提芬周上晒报纸头条）

（唐牛做咗食神，史提芬周正式破产。）

唐牛：啲凳有咁窄得咁窄，啲饮管有咁粗得咁粗，啲冰有咁大粒得咁大粒，啲薯条有咁热气得咁热气，等啲僆仔食完之后有咁口渴得咁口渴，呢啲嘢你应该知唔使我讲架啦！

厨师：噉样对啲小朋友嘅健康好似唔系几好㖞！

唐牛：以前史提芬周除咗插你哋之外有冇开拖打你哋架？

厨师：冇。

唐牛：吆！吆！吆！吆！（将厨师打倒在地）嬲得我吖！唔好迫我吖嘛！我好人嚟架嘛！拉佢出去吖！

（史提芬周 欠下巨债 无法偿还 宣布破产）

（史提芬周 身败名裂 行踪成迷）

（庙街）

史提芬周：萝卜冇拣过啦，太多渣，失败！猪皮又煮得太腍，冇咬口呀，失败！啲猪红松泡泡，一夹就散，失败中嘅失败！最惨系啲大肠，里面都未通干净，重有嚿屎，你有冇搞错呀？

火鸡：唔奇吖。话明嗱喳面有两嚿屎有几咁奇呀？廿三文呀！

史提芬周：你畀我呀？

火鸡：嘘！

史提芬周：嘘！讲咗咁耐嘢畀返卅文嚟睇医生啦！

火鸡：嘘！

史提芬周：畀吓面啦！话晒都食神啦！

火鸡：食神？

*史提芬周：食神！唔系讲笑架，真系！喂！帮帮手啦！做兄弟，一个几毫都好呀！封返多少吖，真系。拍硬档吖！

(两个人走出嚟将史提芬周拳打脚踢）

火鸡：算啦！算啦！

两人：唔好阻住做生意吖嘛！

火鸡：得啦！点呀你？

史提芬周：冇事！冇事！冇事！咦！见晒红添呀真系！哗！呢镬真系要睇医生㖞！畀返多少好㖞！

瘦骨仙：玩嘢吓哗？

史提芬周：冇嘢！冇嘢！唔好意思，大佬！

瘦骨仙：你玩嘢我同你玩呀！

史提芬周：唔系！唔系！大家好兄弟好唔好呀？好兄弟，我食神呀，畀吓面吖大家。对唔住，对唔住，唔好意思，唔好意思，真系，真系。

（史提芬周畀人当街毒打，火鸡出嚟劝开众人）

众人：打死佢！

瘦骨仙：够胆喺度揾食！斩佢只手落嚟！打佢老母！

（火鸡将史提芬周拖入后巷）

肥雪：咦！咩料呀？畀我舂返槌先啦！唔该吖！

火鸡：走！走！走！走！

（史提芬周一路瞓喺后巷，夜深人静嘅时候火鸡走去睇佢。）

火鸡：肚唔肚饿呀？

史提芬周：麻麻哋吖！

火鸡：食唔食嘢呀？

史提芬周：是但啦！

（火鸡递碗叉蛋饭史提芬周食）

史提芬周：碗饭……好好食！

（将碗饭食到见晒底，一粒米都冇剩，突然听到嘈杂声，出面两帮人准备讲数）

神仙：喂！重唔帮拖！（拉咗史提芬周出去，两帮人对峙，鹅头同火鸡坐喺中央）

*火鸡：鹅头！我系个女人仔嚟啫！你要虾我就虾啦！不过当年昆叔嘅头马饮大咗兜头劈我一刀，畀我揦住两把嘢由西贡街斩到佢落公众四方街，有边个唔识我“双刀火鸡”呀？阿姐十二岁出嚟庙街碌，乜嘢风浪未见过呀？你睇吓你带啲噉嘅二打六嚟踩我场！你吓鬼呀？

鹅头：火鸡，你讲咩呀？我要踩你个场呢，肯定唔止咁少人！我嚟系话声畀你听，以后“攋尿虾”就跟我！

火鸡：你话跟就跟呀！你估你天王老祖呀？“牛丸”单嘢都未同你计呀！

鹅头：噉讲法，食屎都得嘞！总之牛丸呢，就各有各做，攋尿虾我包嚟做！

火鸡：噉唔使讲规矩啦！

鹅头：我依家就系同你讲规矩，总之四四六六倾掂佢！

火鸡：就同你四四六六，你哋四我哋六！

鹅头：唔系吖嘛！我撞聋呀！不如九一，我九你一！（两帮人各自起哄）

瘦骨仙：唔好喐呀！劈你哋架！

神仙：唔好喐呀！

鹅头：我畀晒啲攋尿虾你又点啫！你识整咩？

火鸡：我哋唔识你哋识咩？

鹅头：我哋坚记嘅椒盐攋尿虾，不留都卖到出晒位嘅！重有吖，辣椒同淮盐比例啱啱好，镬油晚晚都换嘅，奉旨冇油膉味呀！火炉呀十足，连啲虾壳都炸到卜卜脆架！

史提芬周：噉搞法，就冇咗攋尿虾嘅鲜味嘞！

鹅头：边个喺度阿吱阿咗呀？

火鸡：总之我哋“白焯攋尿虾”鲜味十足。

鹅头：白焯！去整返你啲一坺屎嘅牛丸喇！

火鸡：你啲牛丸做唔掂，想擸埋我啲攋尿虾咋啩？

鹅头：牛丸你唔做我哋做埋！畀张好牌你，你都唔识上！

史提芬周：争咩呀？两样沟埋变做攋尿牛丸吖，笨！

鹅头：边个？边个又搭嗲？阿大喺度讲紧嘢边个够胆插嘴！

（史提芬周做出手势叫神仙唔好出声）

火鸡：唔好迫我啲僆，系你啲僆讲唔得呀？

鹅头：我啲靓咁有家教，肯定唔系佢哋讲！

火鸡：系咩？

（镜头一转，两班人马一字排开。）

鹅头：逐个讲：“争咩呀？沟埋嚟做攋尿牛丸吖，笨！”

火鸡：有讲个笨字咩？

鹅头：肯定有呀，我出名顺风耳呀！

二人：你讲先！

手下甲：争咩呀！沟埋嚟做……流利牛丸吖笨！

鹅头：唔系！你！

手下乙：争咩呀！沟埋一齐做牛丸……攋尿吖笨！

鹅头：你！

*手下丙：我使唔使ngan3吓ngan3吓先讲呀？

鹅头：随你！

手下丙：沟咩呀？哎！sorry！

鹅头：讲过啦！继续啦！

手下丙：争咩呀？沟佢嚟做攋尿牛丸吖！笨！

鹅头：你！

手下丁：（闽南话）别吵了！做尿尿牛肉丸就行了！笨！

鹅头：你讲咩春呀？

手下丁：（闽南话）闽南话啰！

鹅头：闽南话？！你返去食屎喇！

（鹅头继续听其它人讲，肥雪喺度自己练习。）

鹅头：你！

肥雪：争咩呀？沟埋一齐做攋尿虾啦笨！

鹅头：你！（神仙忍不住笑）笑咩呀？讲呀！

神仙：争咩呀？沟埋一齐嚟做攋尿牛丸啦笨！（一路笑一路讲）

鹅头：你！

史提芬周：争……笨！（含糊其词）

鹅头：你！（史提芬周见成功过关，得意洋洋）

瘦骨仙：争咩呀？沟埋一齐嚟做...

鹅头：咪住！你再讲多次！（指住史提芬周）你呀！

史提芬周：争……笨！（含糊其词）

鹅头：再清楚啲讲多次！

史提芬周：……笨！（含糊其词）

鹅头：冚家铲！重唔系你？

史提芬周：喂！我咁求祈你都认得出？

鹅头：吓！你把声咁jap9，化咗灰都认得啦！火鸡，你嘅人呀！点睇呀？

（史提芬周畀人揿住喺台面。）

*鹅头：架撑！你个烂瘫，成晚窒头窒尾，冇大冇细，想唔爱手指尾定手指公呀？

史提芬周：手指甲啦！

鹅头：吓！（一刀劈吓，火鸡徒手接住）

火鸡：喺我环头边个够胆喐佢！

鹅头：噉你即系算点呀？

火鸡：佢系我嘅人，我唔揽佢我重可以出嚟行嘅！（一手将鹅头把刀擗开）

鹅头：噉即系唔使讲规矩啦！行开！（揦起个台碛向火鸡）仆街！

大话周星驰站zhouxingchi.cn

（火鸡用刀将台劈穿，刀锋停喺鹅头面上，众人乱晒龙。）

鹅头：定啲嚟！鸡姐！我谂过架喇！总之以后攋尿虾、牛丸，乜q都畀晒你做，噉得嘞啩？

（火鸡将刀移开，鹅头等人好唔服气地离开）

史提芬周：唔该晒你呀喂！

火鸡：做兄弟唔使讲嘢！

史提芬周：好似你咁够义气嘅人真系难揾！

火鸡（唱）：情与义，值千金，刀山去地狱去有何憾！为知心，牺牲有何憾！为娇娃，甘心剖寸心！好兄弟！血泪为情流，一死岂有恨，有谁人，敢过问！

（火鸡同史提芬周并排坐，鹅头带住班人嚟寻仇，但冇几耐三人坐埋一齐，望住一粒嘢弹吓弹吓。）

鹅头：攋尿牛丸？

史提芬周：冇错！

鹅头：点解会噉……弹嘅？

史提芬周：因为粒牛丸中间系空嘅，原理就好似而家鞋底有气嘅air波鞋一样！

鹅头：我想整啖得唔得呀？

史提芬周：快啲吖！

鹅头：好爽呀！

史提芬周：爽呀？

鹅头：爽呀！

史提芬周：全靠佢咋！阿火鸡姐嘅腕力惊人，只有佢先可以打出噉靓嘅牛丸，因为平均每底牛肉需要二万六千八百几次不停系噉舂系噉舂。

鹅头：但系“攋尿牛丸”点“攋尿”法呀？

史提芬周：成粒啪落去睇吓点！

（鹅头将成粒“攋尿牛丸”摆入口中，啲水如火山爆发般喷出，鹅头幻想自己喺沙滩上狂奔）

鹅头：从来未试过噉清新、脱俗嘅感觉，牛肉嘅鲜、攋尿虾嘅甜，沟埋一齐嘅味道，居然比老鼠斑有过之而无不及，甚至比我嘅初恋更加诗情画意，所谓“举头望明月，低头思故乡”，好诗！好诗！

喽啰：喂！大佬，冇嘢呀你？

鹅头：行开，呢粒嘢掂呀！

史提芬周：名我都改埋呀，“爆浆攋尿牛丸”！呢剂我睇发达都似呀！

*鹅头：讲呀！你当我kai1架！咁易发达，我够会讲啦！

火鸡：我信佢！应该点做？

史提芬周：梗系开间铺头做旺佢揾咗第一阵钱先啦！

火鸡：哗！噉我咪可以换过部最新嘅卡啦ok！

鹅头：火鸡，讲出嚟都畀人笑啦！梗系买层楼收租吖嘛！噉先至系最高章！

史提芬周：梗系啦！不过如果畀我呢，开分店，一间变两间，两间变四间，四间变八间，八间之后上市，上市咪再集资啰！跟住炒股票啰！搞埋地产呀笨！跟住，再分拆上市，到时净系收股息我都唔知点计呀！哈哈

哈！

鹅头：哈！

火鸡：吓！你笑呀？你明呀？

鹅头：明就唔系好明嘞，不过听落就好有计呀！

（三人大笑，史提芬周望住“食神”唐牛嘅海报苦笑。）

（第二日，众人合力炮制攋尿牛丸，“爆浆攋尿牛丸”正式开张。）

（一名老婆婆行过）

史提芬周：阿婆，整碗攋尿牛丸试吓啦喂！

火鸡：食咗唔会攋尿架！

鹅头：好过瘾架！（阿婆畀吓走）

（攋尿牛丸好耐都冇生意，价钱由廿五文降至免费）

（一肥护士行过）

肥护士：免费唔使钱噉抵！整碗攞走！

史提芬周：噉咪做成第一单生意啰。距离上市集资近咗一大步架啦。

（肥护士将攋尿牛丸带返医院）

一医生：喂！快啲攞份报告畀我吖。

肥护士：哦。（摆低攋尿牛丸）

（碗牛丸畀送去病房畀一个厌食症病人食咗。）

肥护士（异常兴奋）：佢食嘢喇！

（肥护士带住成班厌食症病人去食攋尿牛丸。）

肥护士：系呢度喇！（冲入间铺头）唔使钱架！你哋入嚟食啦！

史提芬周：唔使钱架？你真系吓！做嘢！（价钱升至四十文）

（攋尿牛丸开始大受欢迎，传媒大肆报导。）

*记者：今期嘅城市话题就系连群医都束手无策嘅厌食症，竟然畀一粒叫做攋尿牛丸医返好，而喺短短嘅时间重卖到街知巷闻添，而原来发明呢一粒攋尿牛丸嘅，就系饮食界嘅传奇人物，前唐朝饮食集团主席，曾经有食神称号嘅史提芬周！（走向史提芬周）系啦史提芬周，点解你呢个攋尿牛丸会噉受欢迎啦呵？

史提芬周：吖！我谂问我系唔公平嘅，最好问一问啲顾客为咩事要嚟帮衬我啦！呀，细路！为咩事你要嚟食攋尿牛丸呀？

手下丙（着住校服）：呀！自从我食咗啲攋尿牛丸之后呢！啲脑筋好咗好多呀！次次考试都得一百分添呀！

记者：真系噉劲？

火鸡：哦！我食咗之后咪靓咗啰！哈哈哈！

瘦骨仙：我食咗之后个人明显高咗，大只咗，个自信心返咗埋嚟！呀！

记者：噉你今次重出江湖呢，系咪谂住东山再起呢？

史提芬周：东山再起？哈哈哈哈！

记者：噉你可唔可以总括一下攋尿牛丸嘅成功秘诀呀？

史提芬周：好简单，好食、新奇又好玩！

记者：好玩？点玩呀？

（史提芬周将攋尿牛丸拋向天空，跟住就打起乒乓波上嚟。）

（财团老板同唐牛睇紧电视。）

财团老板：真系要嚟打乒乓波！有冇搞错呀？

*唐牛：呢粒嘢呢真系……抵死得嚟好够噱㖞！我都忍唔住买咗兜！

财团老板：冇理由畀佢……揸住多多嘢嚟发围先得架！

唐牛：唔使咁踌躇！始终细ngai1嘢，发围极有谱吖！

财团老板：至怕佢发围兼起啤咋！

（史提芬周问银行借钱。）

史提芬周：弹牙到可以打乒乓波嘅牛丸㖞！而家全香港边个唔知呀！

经理：系咪食咗真系会攋尿架？

史提芬周：其实会攋屎架！（众人笑）

神仙：奇迹呀。

鹅头：一流呀。

经理：真系奇迹，难得你哋有咁好嘅开始，但系你哋攞晒所有嘢去做抵押，开二十间分店，我就觉得冒险咗啲啰！

史提芬周：你觉得冒险咗啲？

*神仙：不如开住两间先都好啦！（史提芬周将快劳掟向佢）

经理：阿周生，你都既然赢咗第一铺咯！唔使即刻摆晒落去再搏啫！

史提芬周：唔好讲咁多废话啦！你识条春咩？我做生意使你教？！

经理：问题系，周生，以你以前嘅记录，对我哋银行借钱畀你嚟讲呢，系好困难架！

史提芬周：我谂你系对我哋只牛丸冇乜信心啫。

经理：话时话吖！真系未试过呀，我不留都好少食呢啲垃杂嘢嘅！

瘦骨仙：试吓吖！（经理犹疑）试吓呀！

（经理食咗啖）

（镜头一转，银行经理坐喺唐牛同财团老板对面。）

唐牛：你真系借咗钱畀佢？

（经理岌头）

财团老板：唔该晒！

经理：客咩气呀？老世你叫到我哋照做啫！

财团老板：哼！条僆仔趷起条尾我知佢想点喇！开分店㖞！

唐牛：啲分店全部开喺山旮旯，赤腊角、沙头角，最旺嗰间喺牛头角，重要喺地牢㖞！喂！你学过风水未呀？

财团老板：字你识睇嘞啩！（电脑将分店的位置连埋一起，显示个“死”字）睇唔睇到呀！死路一条呀！

唐牛：多多钱都借畀佢呀！等佢死得大镬啲！哈哈哈！

（原来史提芬周唔系开分店而系做罐头）

财团老板：咩呀？讲多次！

职员：佢哋攞晒啲钱去出罐头呀！

财团老板：出罐头？

职员：系吖！全香港二千八百间超级市场、便利店将会有得卖，所有铺头位置嘅分布图我已经set咗入电脑。（财团老板睇电脑，见分布图显示个“掂”字）

唐牛：真系估唔到呀！（脑海浮现出史提芬周讲过嘅说话：“使乜讲呀！掂呀！”）

（香港饮食奇才颁奖典礼）

记者：唔该借借！唔该借借！

记者：史提芬周，噉你今次入选饮食奇才有咩感想呢？

史提芬周：好似发咗场梦噉！哈哈哈！亦都证明香港系一个……一个奇迹嘅地方嚟嘅，只要你努力，梦想会成真！

（财团老板同唐牛迎面行埋嚟）

史提芬周：衰鬼！

财团老板：衰鬼呀！哈哈哈！（拋雪茄畀史提芬周）你去咗边呀？咁耐都唔call吓我，我以为你死咗咯！

史提芬周：我系死咗呀！但系点到你唔服呀！

财团老板：点解我要服呀？

史提芬周：点估到我又返生呀得架！

财团老板：服晒咯！哈哈哈！

史提芬周：喂！唔记得恭喜你添㖞！

*财团老板：哎！我哋大快乐攞奖几咁闲啫！你同班街市烂鬼都攞奖噉至难能可贵吖嘛！

鹅头：讲咩呀？

史提芬周：呢个世界镬镬新奇镬镬金吖嗱！正所谓点到你唔服呀！

财团老板：点解我又要服呀？

史提芬周：如果我唔攞呢个奖，我点有资格参加下个月嘅食神大赛呀？

财团老板：哗！真系服到我双膝跪地，七个一皮咯！

唐牛：叻仔呀！

史提芬周：哎！噉我唔系想话畀人听我叻，而系想话畀人听我冇咗嘅嘢可以攞得返！（攞一张烧着嘅报纸点烟）

（财团老板同唐牛相视而笑）

唐牛：喂！等我讲句真心话吖！周生你得架！但系真系畀啲心机学吓点煮嘢吖！

史提芬周：中国厨艺训练学院，梗记得啦！报名添呀听日！

唐牛：好咯！我见到佢噉我就开心喇！浪子回头呀！嗱！真架吓！无论你以前几咁阴骘嗱喳下流贱格，只要你肯改过，我哋大家一定畀机会你架呵？嗱，嗱，唔好打我吖嗱！我个人讲嘢系咁直架嘞，我个人好真架！我真系为你好架！

*史提芬周：其实我成世人，就系睇漏咗你一眼，（搣甩咗唐牛嘅假须，唐牛露出趣怪嘅表情）你睇吓佢个样，几咁天真可爱呀，几得意，几活泼！（一直把玩唐牛面上嘅肥肉）又识攋屎又醒，点估到原来食屎最叻至得架！（发恶大力扯唐牛块面）

唐牛：吆！（将史提芬周推开，火鸡喺后面揦起个垃圾筒bok7财团老板个头，众人乱作一团，史提芬周一面劝开火鸡，一面用脚踢向财团老板）

史提芬周：唔好打！唔好打！

鹅头：唔好喐！唔好喐！

财团老板：我要个仆街死！我要佢死！

唐牛：好呀！畀佢死啰！

（史提芬周将激动嘅火鸡拖入厕所。）

史提芬周：定啲嚟！定啲嚟！唔好喐呀！唔好喐呀！（火鸡揽实史提芬周，想惜佢块面，史提芬周立即弹开，呢个时候鹅头等人入嚟）

鹅头：喂！喺度！喺度！全部搞掂晒！冇事！

火鸡：咩搞掂晒呀？我话有事呀！我出去刮佢！

史提芬周：你悭啲吖！你呀！喐啲就开拖！我有讲过喐手咩？你睇我头吖大佬呀！你估呢度庙街呀？烂泥扶唔上壁！望咩呀？连我都喐埋呀！

（火鸡愤愤然离开，众人想去劝吓佢）

史提芬周：唔好理佢！

（庙街，史提芬周、鹅头、神仙、肥雪四人一齐食饭。）

史提芬周：兄弟！兄弟！大家都喺庙街起码衬咗十几廿年，跟住就要上轨道、搬架步，祝我哋“攋尿牛丸”生意蒸蒸日上！（干杯庆祝）饮杯！

神仙：嗱！我再祝你听日……返大陆学煮餸，早日学成归嚟，攞返食神个朵！

史提芬周：关你叉事呀？讲笑啫！（众人笑）

鹅头：各位！今晚我哋最后一晚喺呢条街，大家睇清楚，听日我哋杀出庙街，放眼世界！

肥雪：鸡姐话唔走架㖞！

鹅头：火鸡又搞边科呀？

肥雪：鸡姐话“生于斯就长于斯”㖞！

鹅头：从一而终，经典呀。要揾老婆揾呢啲。

史提芬周：知你想“chap”佢好耐架嘞！（众人笑）

肥雪：鸡姐以前好靓女架！

史提芬周：原来佢想“chap”！（众人笑）

鹅头：喂喂喂！讲真呀，三年前火鸡真系嗒得杯落架！不过有一次同人霎气，先搞到破咗相咋！

史提芬周：因咩事同人霎气呀？

鹅头：冇人讲过，真系唔知。

肥雪：呢单嘢，问我啦！嗰日得我见到咋！昆叔嘅头马丧标，嚟鸡姐档嘢食烧夜，搣咗鸡姐支旗。

史提芬周：搣咗佢支旗？

（回忆）

火鸡：边个搣咗我支旗呀？

（丧标攞支旗擤鼻涕）

火鸡：你个仆街喺我档口搣我支旗嚟擤鼻涕！你老味呢度冇厕纸畀你用呀？（将厕纸掟向丧标）你问过我未呀？

丧标：你讲咩呀？我钟意用嚟擤鼻涕呀！你吹呀？（将旗掟向火鸡）吓！你知唔知我边个呀？噉同我讲嘢？！唔好搣佢支旗！全部将个档口扫晒佢！（火鸡以一敌众，丧标揦起刀斩向火鸡）

庙街（现在）

肥雪：兜头一刀，笪la1由额头去到鼻哥竉。呢，就喺佢档口前面咋嘛。跟住尾龙骨再中多刀，插住条孖筋，再搭住条三叉神经线，影响咗大脑中枢系统，连棚牙都爆埋出嚟呀！哎！鸡姐个样噉就一世嘞！支旗仔真阴

功！

史提芬周：咩嘢旗仔呀？

肥雪：咪你支旗仔啰！

史提芬周：我支旗仔？

肥雪：你当年食神支旗仔呀！

（回忆：当年火鸡喺档口以一敌众。）

而家：肥雪带史提芬周睇火鸡啲旗。

肥雪：嗱嗱嗱！真系贴晒你啲公仔海报架！尤其是佢钟意你抱啤啤仔个广告呀！话你好有爱心。真系你天字第一号忠实fans嚟架！大话周星驰站zhouxingchi.cn

（食神谂返起唐朝分店开张嗰日嗰个学生妹。）

鹅头：喂！噉呀真系恭喜晒㖞！

史提芬周：哈哈！

鹅头：哈哈！

火鸡：肥雪！你讲咩呀肥雪？（火鸡打扮野艳噉出现）我问你讲乜嘢呀？叫你唔好讲架嘛！

（史提芬周不断抹汗）

肥雪：其实系佢叫我借啲意讲畀你听架。（细声同史提芬周讲）

火鸡：不过既然讲咗就算喇。又唔系咩丑事，唔……真系好忟嘅啫！（发晒嗲，史提芬周吓到企唔稳）咦！你听日自己一个返大陆架㖞！冇人陪你咩？我陪你吖！（做出很姣嘅动作）

史提芬周：的士！（快快手上咗的士离去，火鸡伤心落泪）

（史提芬周抵达湖南，同鹅头通电话。）

鹅头：你喺边呀？

史提芬周：重有喺边啫，喺大陆啰！

鹅头：唔使鸡噉脚走呀嘛？火鸡话晒对你有情有义吖！

史提芬周：喂！唔好讲咁多无谓嘢！而家我揾唔到中国厨艺训练学院呀！

鹅头：唔你呀嘛？我揾人check过有架㖞！

史提芬周：系呀系呀！乜都有呀呢度，厕所又有呀！少林寺又有呀！系冇中国厨艺训练学院！

鹅头：冇理由嘅！大傻个细妹个老母个大佬个仔话有架㖞！咪喇！你返嚟先啦！

史提芬周：重返嚟！我而家着紧草你知唔知呀？

鹅头：唔使惊㖞！火鸡依家都唔喺度，你走咗之后佢都失埋踪嘞！

史提芬周：去咗边呀佢？

（史提芬周见到火鸡正跑向自己呢便，即刻趸低电话逃走，一轮追逐，卒之畀火鸡捉到。）

火鸡：捉到你喇！终于……捉到你喇！哈哈哈哈！噉都捉到㖞！哈哈！

史提芬周：噉点呀？噉点呀？

火鸡：我买咗好多日用品畀你呀！你上次走得咁快，我都畀唔切你，专登攞上嚟畀你架！既然买咗唔好嘥吖嘛！

史提芬周：多谢晒呀！

火鸡：喂！帮我做返啲嘢㖞！（攞出一张纸卡，喺上面画咗个心）帮我喺旁边画多个心，再揾支箭嘴穿住佢。

史提芬周：唔好搞咁多嘢啦！

火鸡：畀我做个纪念啫。嚟吖！

史提芬周：鸡姐！大家好兄弟，唔怕坦白讲，即系你搞成噉样样呢，其实我都好遗憾，亦都好感动，但系我都唔想架嘛，你明白唔明白啫？

火鸡：明，我梗明啦。嚟吖，帮我画咗先啦。

史提芬周：画冇问题。画个心几咁闲啫，但系大家好兄弟，好多嘢一定要讲清楚。

火鸡：喂，我山长水远嚟到呢度嗌你帮我画个心咋嘛！你噉都诈我型？你唔念吓我为你做咗咁多嘢，都念吓我为你挡咗咁多刀吖！

史提芬周：啲嘢唔系我叫你帮我做架嘛！啲刀又唔系我叫你帮我挡。噉查实关我咩事啫？如果你噉讲，人人走埋嚟话帮我挡两刀，又话要噉，又话要噉，噉我咪好唔掂？！（一人踩住单车慢慢驶近）哎！好多嘢整定架啦！有就有，冇就冇，系冇嘅你挡多廿刀都系冇架啦！你明唔明啫？

（骑单车人落车）

史提芬周：你明唔明呀？

（火鸡留意嗰个人）

史提芬周：喂！明唔明啫？喂！

（火鸡见骑单车人攞出把枪，立刻推开史提芬周，兜头中咗一枪，史提芬周十分惊讶，揦起火鸡手中嘅纸卡，走去路中中央，嗰个人再用枪指住史提芬周，只听见一声枪声，块荧幕黑晒，字幕：一個月後）

（一个月后嘅食神大赛。）

财团老板：掂晒嘞！

唐牛：点会噉嘅呢？百年难逢嘅九星连珠点会咁跷系今晚架？九星连珠必有怪异。

财团老板：放心啦！佢会永远消失。

主持：第二十八届超级食神大赛重有一分钟就开始喇！首先有请今晚嘅评判，国际美食评审主席，有味公主之称嘅薜家燕。重有半分钟，根据大会规定，所有迟到嘅参赛者，一律取消资格，绝对冇情讲，请各位参赛者就位。

（唐牛一直好鬼紧张噉样望住门口，恐防史提芬周会喺最后一刻出现，突然见到伸只脚出嚟，重以为系史提芬周，吓咗一大惊，原来系主持。）

主持：我经已check过晒，真系冇人嚟，比赛即将开始。

唐牛（松咗一口气）：仆街！吓得我吖！

（场外，史提芬周企喺船头向会场进发）

女记者：咦！佢咪系……

史提芬周：阿婶，拍硬档撑快两步吖唔该。

阿婶：最快系噉架喇！

史提芬周：噉冇办法啦！（使用轻功从船上一跃跳入会场，众人惊讶。）

史提芬周：啱啱赶得切。

唐牛：你……

梦遗大师：阿弥陀佛。

主持：请问你系边位呀？

梦遗大师：少林寺方丈，法号梦遗。（这时梦遗大师慢慢升起）阿弥陀佛，我随风而来，随风而去，喂！我系史提芬周老友㖞！畀吓面得啩！喂！唔该吖！唔该吖！（原来升起系由于畀警卫抬起所致）

主持：secu！将啲无谓人掟咗出去之后，顺便闩窗落闸，唔好再畀梦遗嘅人入嚟喇！好喇！最后一位参赛者都经已赶到，比赛正式开始。

（所有参赛者立刻开始工作，唯有唐牛同史提芬周企定对视，唐牛助手想揦起刀，畀唐牛制止。）

唐牛：敌不动，我不动。

（史提芬周回忆当日畀追杀嘅事，原来嗰个杀手正想开枪杀史提芬周时，一架车喺后面高速驶埋嚟，杀手只顾闪避，史提芬周跳上车，不久之后又畀架车拋落山坡。）

（梦遗大师畀警卫拋落楼梯。）

女记者：我想问你呢，史提芬周点解搞成噉嘅？

记者乙：点解会着古装嘅？

记者丙：点解啲头发会白晒架？

女记者：重有呢，见佢又踩水又飞天系咪吊威吔架？

梦遗大师：师主佢已经成为咗少林寺嘅俗家弟子。（众人惊讶）

（当日史提芬周畀拋落山坡之后，无意中嚟到少林寺。）

梦遗大师：阿弥陀佛。一字记之曰缘，佢与佛有缘，老衲本住慈悲为怀嘅心，收留咗佢。

（当日梦遗大师收留史提芬周之后，爬上史提芬周嘅床，除咗佢条裤……）

史提芬周：喂！你！

梦遗大师：哎！咪喐！你呢，就畀啲有毒嘅躝藤呢，就拮亲，而家好在呢，就未落到去百会穴啫，如果唔系呢，你就死梗架嘞！嗱，我呢，已经同你啜啲毒呢，啜到七七八八喇！而家呢就剩返呢度啫，就畀我啜埋先呀唔该呀！

史提芬周：行开啦！（一手推开梦遗大师）

梦遗大师：你既然唔畀我啜，我都唔勉强你。（讲完嘢之后慢慢“飘”走，另一和尚入嚟）

和尚：你大祸喇！方丈份人好小气架！（梦遗大师突然飞入嚟一掌就打死咗个和尚）

梦遗大师：我最憎人喺我背后讲我坏话。（讲完又慢慢“飘”走）

（喺会场，史提芬周同唐牛仍然对视紧，冇行动。）

（参赛者甲见有味公主望着，突然玩起杂技。）

味公主：out！

参赛者甲：啊？

味公主：出局！

参赛者甲：我出局？

味公主：而家系选食神，唔系选马戏班小丑，食神除咗煮嘢好食之外，台型都好重要嘅，你噉就想做食神呀？冇咁易！！！

（史提芬周回忆喺少林寺，佢想偷走，突然见到墙上面出现咗好多高大嘅人影……）

史提芬周：少林寺十八铜人？

十八铜人：冇错！少林寺十八铜人！得罪方丈，你想走？冇咁容易！！

（史提芬周畀狂殴，有铜人重用埋折凳）

（比赛现场）

味公主：out！

参赛者乙：啊！点解呀？

味公主：睇吓你个样。而家死老窦呀？苦口苦面噉，返屋企整苦瓜喇！出局！

（味公主突然跳起舞上嚟，吸引咗众参赛者嘅目光。）

味公主：望咩呀？out！

众参赛者：吓！点解呀？

味公主：作为一个食神，最紧要系专心一致嘅，我只系少少动作啫，你哋就企晒喺度嘞！成何体统？真系令我失望！out！出局！

主持：若然再否人出局，只怕再冇人比赛架嘞！

味公主：我自有分数！全神贯注，气定神闲，由头到尾都冇望过我一眼嘅，只有佢哋两个，至有资格。

史提芬周：点解要杀人？

唐牛：你教我嘅！因为我钟意啰！

史提芬周：放下屠刀，立地成佛。

唐牛：哈哈哈哈哈！今日我佛就系佛，不过整佛跳墙。

史提芬周：咁啱嘅？我又系整佛跳墙㖞。

唐牛：悭啲啦！咪以为染白晒个头，着住套古装就真系有计得架！呀！（又爆衫）我够得咯！想坐食神个位？第二世啦！（二人各自开始煮）

唐牛：倚天切。

史提芬周：屠龙斩。

味公主：好刀法。

唐牛：咁快嘅？降龙十八炒。

史提芬周：打狗铲。

味公主：好铲法。（二人嘅煮法几乎一模一样）

唐牛：抗议，佢抄我！

主持：有啲噉嘅事咩？

唐牛：我做乜佢跟住我做乜。

主持：唔系啩？

（唐牛扮鬼脸）

（史提芬周学佢扮鬼脸）

唐牛：嗱！你见到啦！

味公主：比赛系噉架啦！好似游水跑步噉，又咪系你做乜佢做乜，有乜好抗议呀？抗议无效！

唐牛：死啦！（将镬里面嘅嘢掟向史提芬周）

史提芬周：多谢！（用镬接住佢掟埋嚟嘅材料）

唐牛：吓！

（史提芬周将镬中嘅油洒向唐牛，唐牛揦起有孔嘅铲去挡，块面畀啲油烫到呱呱嘈）

唐牛：呀！仆街！（再将台面几把刀掟向史提芬周，畀史提芬周全部接住。）睇你重有冇手接！（将最后一把掟出，史提芬周跳起将刀踢返，正中财团老板）

财团老板：哎呀！

richard：阿叔！冇事！冇事！刀背嚟咋！刀背嚟咋！

财团老板：刀背嚟咋咩？超！

唐牛：真系去咗中国厨艺训练学院？

史提芬周：唔好扮喇！中国厨艺训练学院即系少林寺嘅厨房。你亦都系少林寺走出嚟嘅叛徒。

唐牛：冇理由嘅！我学艺十年，你只系去咗一个月，冇理由咁劲！

史提芬周：呢啲嘢好讲天分。

（史提芬周回忆喺少林寺再次偷走时）

十八铜人：少林寺十八铜人！

史提芬周：哈！衰鬼！（再度畀毒打）

（冇耐，史提芬周同十八铜人赌钱）

铜人甲：细细哋十吖！

史提芬周：十一只系嘛？

铜人甲：大呀？

史提芬周：哈哈！

铜人乙：囡呀！

史提芬周：囡呀？我几时先可以行出呢笪地方呀，兄弟？

铜人甲：二呀！喂，除非方丈话冇嘢喇！

史提芬周：噉方丈几时先算数得架大佬呀！真系！

铜人甲：你睇吓！（指着扫地名伯）嗰个老嘢呀，十三岁嗰阵时得罪方丈呀！

铜人乙：系咯！咪一直韫到而家都重韫紧咯！

史提芬周：即系点呀？

铜人甲：花大吖嘛！即系点呀？锄大啲呀！炒呀呢铺！

史提芬周：仆街！欺人太甚呀！（翻台）

十八铜人：少林寺十八铜人！

史提芬周：呀！（又畀毒打）

史提芬周（旁白）：我唔单止喺少林寺嘅厨房学会煮餸嘅秘诀，更加喺十八铜人身上学会上乘嘅武功。呢一拃金粉饼果然名不虚传！

唐牛：我唔信！呀！（飞向史提芬周，并一直大叫）

味公主：好轻功，轻功奥妙之处系可以令一个好似海狗咁重嘅人，飞到老年咁高，其间重可以鬼杀咁嘈。

（史提芬周揦起折凳将唐牛打落地，并继续狂殴）

*味公主：好折凳，折凳奥妙之处系可以藏于民居之中，随手可得。吓！重可以坐住佢嚟掩藏杀机，就算畀差人拉到亦都锉你唔入，真不愧为七种武器之首。

主持：喂！喂！打多两下好喇！重有三分钟，因住时间呀吓！（二人又返去继续煮）

大话周星驰站zhouxingchi.cn

（财团老板攞出一个摇控器。）

梦遗大师：咪嘈！弊！（在会场外）

史提芬周：弊？点弊呀？（见唐牛走开，知道事有跷蹊，立刻将手中佛跳墙拋开，畀主持接住，佛跳墙即时爆炸。）

财团老板：哈哈哈哈哈哈哈哈哈！

*主持：佛跳墙整到会爆炸，系唔容许嘅，应该否你出局架喇，不过念在几有创意几够噱，重有两分钟，整过个啦！

唐牛：哈哈哈哈！剩返两分钟你整鱼生就得，认输啦僆仔！（发功令火变大）

味公主：好内功！原来系用内力，加速提高温度，使到原本要炖七七四十九个钟嘅佛跳墙，家下喺两分钟之内就搞掂。

史提芬周：请问大师，一生人食过最好食嘅嘢系咩嘢？

梦遗大师：施主，呢个问题应该要问返你自己。（喺会场外）

史提芬周：问我自己？

梦遗大师：冇错。（喺会场外）

女记者：大师呀大师，你同边个讲紧嘢呀？

梦遗大师：呢啲系千里传音。（喺会场外）

（史提芬周全神贯注整叉蛋饭。）

味公主：吓！呢招系？

唐牛：九阴真经？

梦遗大师：错！呢招系“黯然销魂手”。（在会场外）

女记者：“黯然销魂手”。

梦遗大师：呢招系施主由心而发嘅自创招式，有一日，我见到施主好黯然噉，喺度唱歌……

回忆……

史提芬周（唱）：情与义，值千金，刀山去地狱去有何憾！为知心，牺牲有何憾！为娇娃……（终于忍唔住痛哭起嚟）

（会场外）

梦遗大师：施主佢一夜白发，情深义重，问世间情是何物，直教生死相许，我见施主佢痴心一片，所以我就原谅咗佢。（流泪）

女记者：估唔到大师都系性情中人。（同梦遗大师抹眼泪）

（会场内，史提芬周全力煮叉蛋饭，更将蛋摆喺手掌上煮熟。）

味公主：少林绝学“火云掌”！

主持：够钟，比赛完毕。

味公主（先评唐牛嘅佛跳墙）：好香呀！

戴龙：哗！好香呀呵？

厨师甲：系呀！系呀！系呀！

味公主：呢盅就系……

唐牛：超级无敌海景佛跳墙！

味公主：（试咗一啖）好！好！好！呀！呢盅由内功炖成嘅佛跳墙，不但火侯十足，而且浓得嚟唔滞，胶得嚟又唔腍，九种材料均为极品，足足有九九八十一种变化，不但香味层次不同，而且可以浑然一体，不愧为超级无敌海景嘅佛跳墙！

唐牛：哈哈哈哈哈！

味公主：呢碗系？

史提芬周：黯然销魂饭。

唐牛：你老醒你！叉饭呀叉饭啦！加多只荷包蛋畀尽你咪廿二文碗！黯咩然销咩魂饭呀？咪谰有型呀僆仔！

主持：荒谬！我够胆讲句，喺我面前冇人够胆讲话谰有型！唔该你静啲。

味公主：（试咗叉烧饭）叉烧呀！好叉烧呀！我从来未食过咁好味嘅叉烧呀！救命呀！！！

唐牛：呀！！！！！

*味公主：叉烧嘅肉汁封喺纤维里面，好似江河汇聚噉样，而里便嘅筋脉畀内力打碎，入口极之松化，再配合埋火云掌煎成嘅糖心荷包蛋，嚿叉烧真系好味到尘世间冇嘢可以形容得到架！点解呀？点解呀？点解呀？

点解我食咗碗咁好食嘅叉烧饭？我第日食唔返点算呀！！（晕了在地，突然流出眼泪）咦！系咩嚟架？点解我会流眼泪嘅？有一种哀伤感。

史提芬周：系洋葱！我加咗洋葱！

味公主：呀！实在太点题嘞！原来系洋葱嚟架！唔！呢碗饭食到人感动流泪！呀！唔怪得之叫做黯然销魂饭啦！实在太黯然！实在太销魂！实在太好嘞！可惜……

味公主（心谂）：如果唔系我老公唔生性烂滚，畀佢哋捉咗黄脚鸡。呀！我又烂赌贪心，畀佢哋捉到我打牌出老千。呀！最惨嘅就系……

richard：（带住味公主嘅仔）叫大佬吖！

味公主子：大佬！

味公主（心谂）：连我嘅乖仔都畀佢哋踢埋入黑社会。咁多痛脚畀班衰人揸住嚟要挟我，我……我……

味公主：今晚嘅食神系……唐牛！

财团老板：唐牛至系食神！！！yeah！（众拍手）

唐牛：讲咁多嘢始终咪又要畀我！

史提芬周：根本就冇食神！

味公主：啊！咩话？

史提芬周：或者人人都系食神！

味公主：咩话？

财团老板：唔好讲咁多！颁奖！

史提芬周：老窦老母、阿哥细佬、条女条仔，只要用心……

味公主：咩话？

史提芬周：人人都可以系食神！

唐牛：条友输到黐咗线喇！快啲同佢call白车吖！

（天上突然传出声音：“食神归位！”会场四处爆炸，天上射出一道光柱直入会场，原来系观音下凡！）

观音：食神！你本来系掌管煮食嘅神仙，因犯天条，而被罚落凡间受三十六劫、七十二难，今日你终于领悟到食嘅真谛，真正得道。（施法令史提芬周着上神仙服）刚才你所煮嘅饭真情流露，连玉帝都深受感动。但系你动用咗神心，泄露天机，本应受罚，但姑念你一往情深，故网开一面。（史提芬周叩头）

财团老板：哈哈哈！哈哈哈！史提芬，你都算落本喇！玩到出神仙吓哗！好！出神仙又睇吓点！（攞出长枪对住观音开枪）出神仙吖嗱！出神仙吖嗱！

观音：你只乌嘴狗，偷食唔守门口，而家要将你打回原形！（施法令财团老板变成一只狗）

（唐牛拿住长枪想射观音）

观音：你都想试吓哩？

唐牛：冇冇冇冇冇冇！我唔关事架！我行过架咋！呢！呢度啲人呢，我完全唔熟架！尤其是嗰边揸枪乱咁啡嗰啲呢，我特别唔识架！

观音：废话！狗都不如！（向唐牛施法）

唐牛：呀！呀！呀！呀！（突然一切回复平静）

richard：呀！阿叔真系变咗只狗呀！

唐牛：荒谬！又唔见我有事！幻觉嚟架啫！吓我唔到嘅！

richard：呀！！！！

唐牛：呀！！！！（见到自己身体穿咗个大竉）

（庙街）

相士：咩都有可能嘅！圣诞节吖嘛！额有朝天骨，眼中有灵光，神仙托世呀你！

睇相者：有冇咁多神仙呀？

相士：有！所谓举头三尺有神灵，其实通街都系神仙，呢！圣诞老人呀！都系神仙嚟架㖞！

睇相者：哼！你都越讲越离谱嘅！（动身想走）

相士：咪住！神仙唔啱听咪讲返姻缘，睇过，所谓姻缘天注定……

（另一边）

史提芬周：有噉嘅事？唔系啩？

鹅头：真系呀！我哋唔去睇比赛呢，都系佢叫嘅！惊你分心㖞！

神仙：系呀！

史提芬周：唔系啩？

鹅头：真系㖞！粒子弹呢，畀佢金牙挡住，不得止冇死到，医生重帮佢换埋棚牙，顺便磨埋块面，执返企理个唛头添呀！

史提芬周：唔系啩？

鹅头：真系㖞！呢，都嚟紧喇！（变返靓靓嘅火鸡慢慢行埋嚟）

火鸡：啱唔啱睇呀？（史提芬周默不作声）

鹅头：喂！啱唔啱睇都讲句嘢吖！

史提芬周：事到如今讲多无谓呀！畀返你！（将画咗两个心纸卡飞畀火鸡）