逃学威龙III龙过鸡年（粤语）全剧本

（案发现场，女凶手将一男子在床上杀死）

（医院）

（护士喺度问病人情况）

医生：正经啲啦！我话畀医生知架。你重有冇肚痛呀？

病人：有呀，绞住痛呀，我去咗两次厕所呀。

（周星星睇紧报纸）

陈百祥：哈哈哈！

（周星星将陈百祥推开）

陈百祥（又嚟）：哈哈哈！

（周星星将陈百祥推开）

陈百祥（第三次）：哈哈哈！

（阿敏喺周星星身边出现）

（周星星只手差啲掂到阿敏对波）

（周星星缩手）

阿敏：星星！

周星星（趸低报纸）：喂，阿敏！

阿敏（拍住陈百祥膊头）：表哥呀，你见点呀？

陈百祥：哎，我啲咁身经百战嘅警务人员，啲皮外伤就当生暗疮啦！（指周星星）哎，佢就唔同嘞，佢冇啲机会接触啲咁高级嘅上司。

周星星：你并唔系我上司，甚至乎已经唔系警务人员，你已经畀警务处停咗职。我只系当你系一个普通证人噉嚟保护。

陈百祥：哎，我畀人屈嘅啫，迟早就水落石出。我出返嚟复职你就知。

阿敏：喂喂喂，你两个一人少句啦！唔好嘈啦！

陈百祥：你叫佢有啲志气得唔得？例如做吓卧底噉。

阿敏：卧底？你咪叫佢做卧底添呀。我至憎人做卧底嘅。

阿敏（同周星星讲）：星星呀，你应承过我以后都唔做卧底架呵？

周星星：系，不过做卧底都好过保护呢条茂尼。

陈百祥：我啲噉嘅身手使你保护？

周星星：弊在你由停职到而家已经畀仇家伏咗卅几次度弊哩。

陈百祥（除鞋，想打交）：嚟吖！

周星星：嚟吖！

阿敏：喂喂喂，唔好嘈，唔好嘈，我滗汤畀你哋饮，我滗汤畀你饮吓。

（护士问病人嘅情况）

护士：重有冇边度觉得唔舒服架？

病人：个头赤赤哋，重有少少晕。

阿敏：唔怪之得啦，住极都唔愿意出院，原来呢度啲女护士咁靓嘅！（渌亲手）渌亲只手添。

病人：系喇姑娘，我几时可以出院嗱？

（周星星聚精会神噉望紧嗰个女护士）

阿敏（忟）：喂，唔准望呀！我渌亲只手都唔鬼理我！

周星星：出去捽吓油油吖。

阿敏：唔准望架吓。

周星星：边有望啫？

（阿敏出去捽油）

（陈百祥嘅仇家又嚟伏佢）

（周星星揿低身边个护士嘅头）

护士（嬲）：做咩呀你？

周星星：正话好危险呀，你唔见咩？

护士：咩危险呀？你变态架？

周星星（嚟多镬）：伏低！

护士：喂，好啰喎。

周星星：唔系哩，佢……

护士：你唔好当我好掐呀，你试吓再嚟过吖！

（仇家一个个跨过周星星张床去追陈百祥）

（周星星又一次次将护士个头揿低）

周星星：小心呀！小心！

护士（非常忟）：你个色魔！化咗灰我都认得你吖！

（周星星搞掂咗班友）

周星星（用枪制住班匪徒，然后打电话，用舌尖拨号）：总部，我系周星星，call我吓哗？

另一头：系吖！

周星星：啱喇，我啱啱智破咗一个惊天嘅杀人集团，勇擒咗一班罪有应得嘅歹徒。你即刻嚟锁人啦。

陈百祥：话我有份。

另一头：黎sir叫你即刻赶去现场呀。

周星星：我而家保护紧证人，唔行得开住。

另一头：黎sir叫你擗低晒所以嘢，即刻赶去现场。

周星星：真系要擗低晒？

另一头：系吖。

周星星：噉好啦。（擗低支枪同手提，一支箭噉标出去）

陈百祥：喂喂喂，咪喐呀，等我执返支枪先。

阿敏（周围揾周星星）：星星呢？

陈百祥（搞掂咗班友）：冚棒唥同我一字形趴埋墙。

阿敏：哗！发生咩事呀？

陈百祥：佢畀总部急call咗去喇！

（罪案现场）

化学老师：喂，支试管漏架，帮我嚟只杯嚟顶住档！

工作人员：哦！

手足：我即刻攞去化验啦。

周星星（左右睇）：点呀？咩景况呀？

手足：凶杀案嚟架。

（周星星睇到床上嘅人影多咗条尾，觉得好奇怪）

周星星：借问声，死者系人定系动物？

化学老师：系人。

周星星（指条尾）：系人又点会有条尾喺处嚟呢，请问？（撞正化学老师）

周星星：咦，你咪化学老师？

化学老师：你系边位？

周星星（除咗副超）：我系周星星呀，喺第一集你教我化学嘅呢！

化学老师：我都唔记得我教过化学。我系法医官，（除咗眼镜）你系边位呀？

周星星：周星星呀！

化学老师：你头先问我咩话？

周星星：冇嘢。

化学老师：嘿，混吉嘅。（走开）

周星星（问手足）：有冇见黎sir呀？

手足：你讲边位黎sir呀？

周星星：嗰条茂尼呢，成日自称辣手神探奇连伊士活花名打横嚟嗰条茂尼呀！

黎sir：嗰条茂尼只脚而家畀你踩住。（踩返周星星）

周星星：sorry, sir!

周星星：冇踩亲吖嘛？

黎sir：大庭广众噉踩法，踩到应应啦！

周星星：应呀！

周星星（手指指）：呢单凶案呢吓……

黎sir：嗱，呢单凶案呢就好残忍。死者系个有钱佬叫做王百万。双手畀人绑喺床度，用冰插插死。床上面流咗好多精液喺度。同最近一部电影嘅桥段好相似。

周星星：噉call得我咁急有咩吩咐呢？

黎sir：你睇吓张相先啦。（畀张相周星星睇）

周星星：哎，做乜偷影人啲相喎。我嬲架。

黎sir：呢张系死者张相。个样同你生得一模一样，不过多粒癦。

周星星：居然有啲噉嘅事？你想点呀？

黎sir：梗系有好嘢益你啦。

周星星（打乞嗤）：乞嗤！（喷到黎sir成面口水）

周星星（顺手攞起张厕纸帮黎sir抹面）：对你唔住，抹抹面。

黎sir：哎！啲厕纸边度攞架？

周星星：床边攞嘅……

黎sir：系死者用嚟抹嘢架。

周星星：抹咩呀？

黎sir：你话呢？

周星星（抌咗厕纸）：唔——都冇坏嘅！咪当做吓facial啰。（顺手攞起嗰只装精液嘅纸杯一饮而尽）啱唔啱听呀，黎sir？

化学老师：头先死者嗰杯精液去边啊？（见到纸杯畀周星星揸住紧）哦，喺度。（看杯子）咦，点解冇晒嘅？

（周星星静静噉走入厕所，然后听到呕吐嘅声音）

黎sir：喂，僆仔，你知唔知破坏现场证物系好严重架？除非你听我指示去做，如果唔系炖冬菇！

（黎sir办公室）

黎sir：嗱，你嘅任务就系扮王百万返佢屋企，监视佢嘅老婆汤茱迪同佢一个唔熟唔食嘅老友林大岳。呢两个人杀佢嘅嫌疑最大。

周星星：然则即系要我做卧底噉话嘞喎吓？

黎sir：其实正确嘅名称呢就叫做二五仔、鬼头仔、边缘人、金手指，或者系正衰人都得！

周星星（哭丧着脸）：我求吓你，唔好叫我做卧底啦。我应承咗我条女唔再做啲噉嘅嘢。唔系我连老婆都冇埋！你当做吓好心。你就当我系苏乞儿噉可怜吓我啦！恩公！（双手揸实黎sir嘅脚）

（黎sir踩周星星，行到去门口）

黎sir：你可以唔去呀！（开门）揾个人同我落charge，警务人员蓄意毁坏重要证物。

手足：yeah, sir!

周星星（扮女人发姣）：耶！你咁恶，想吓死人咩？我唔去，一样有第二个人去架啫。至多，你话点咪就点啰！乞人憎！

黎sir：哼！麦当娜好似你噉“口危”我八次我都冇应承啦。何况你？

周星星：麦当熊咋啩？

黎sir：麦当娜！

周星星：噉你当系畀吓面唔使我去哩？

黎sir：唔得！一定要你去！

周星星：噉你即系打横嚟啫！

黎sir：打横嚟就系我花朵！你唔知咩？

周星星（将黎sir“ung2”埋一边）：岂有此理！嗱，做人处世咪话欺人太甚好喎！嗱，我本身系虎鹤双形拳冠军。鬼仔无影手呀，九阴白骨脚呀亦有几十年造诣。好话唔好听，我让你双手双脚，净系揾条脷都得“ faak”得死你噃。你系唔系一定要我去先？（松手，突然转变态度）不过你系要我去，一定有你嘅原因嘅。我谂吓谂吓，都好尊重你嘅决定。好吗？

黎sir：好！

周星星：其实我好钟意鬼头仔呢个名嘅。

（原来黎sir揾只枪指住周星星）

黎sir：系你讲架咋，唔系我屈你吓。

周星星：傻架你！大家自己人你讲啲噉嘅嘢？！你真系……，系咪唔当系friend先？！

（陈百祥周围揾人借钱，冇人睬佢）

陈百祥：一场同事，度住二三十万嚟买层楼哩。（同事唔睬佢）睇你个衰仔就知你冇义气。

（黎sir同周星星行出黎sir嘅办公室）

黎sir：我点都支持你架，你畀心机破案呀吓。

（陈百祥见到周星星，走埋去周星星身边）

陈百祥：未来表妹夫，相请不如偶遇，我请饮茶。不过而家度住两万先。

黎sir：喂，你炖咗冬菇架咯喎。你重嚟拗烂脚？！唔好映衰晒呀！

陈百祥：我嚟报警得唔得呀？我畀女人非礼。

周星星：咪住，咪住。（问黎sir）喂，你头先话点都支持我架吓哗？

黎sir：只要你肯做呀，托塔都得呀。

周星星：噉得喇！我就要佢做我助手！（指陈百祥）

（周星星赶去睇戏）

引座员（睇周星星手中嘅飞）：第三行第四个位。

（戏肉）

（周星星隔篱个猪扒吓到揽实周星星）

周星星：使唔使咁惊呀？

猪扒：你理得我啫。

阿敏（坐喺隔篱）：喂，咁迟架？！

周星星：差馆有嘢做吖嘛。点呀？出戏讲到边度呀？

阿敏：呢，讲到个女人呢同个男人喺床度，嗰个女人用个冰插猛咁插佢。

（猪扒又嚟）

阿敏：喂，我有嘢同你讲呀。

周星星：咩呀？

阿敏：我迟咗学校份工呀，我谂住全力帮我阿妈打理间花店。我谂住攞啲酒店呀，茶楼嘅订单返嚟做呀。噉你话好唔好呀？

周星星：好！非常好呀！我都有啲嘢同你讲喎。

阿敏：咩呀？

周星星：听日开始我又要做卧底。

阿敏：你讲咩？

周星星：我话听日开始我又要做卧底。

阿敏（黑口黑面）：你唔厌嘅咩？

周星星：我厌呀，但系啲老世唔厌有乜办法？（仰天长笑）

阿敏：今次扮边个呀？

周星星：扮个女人嘅老公喎。

阿敏：边鬼个女人嗱？

周星星：你唔好话畀人听。（咬耳仔）八卦周刊成日出现嗰个汤茱迪呀。可以讲嘅嘢系咁多，其他嘅嘢一切保密。你唔介意吖嘛？

（阿敏偷偷地搣周星星大髀，周星星痛到飞起，揽实隔篱个猪扒）

猪扒：使唔使咁惊呀？抑或想搏懵呀？

周星星：绝对系想搏你懵啦，白雪公主！

阿敏（嬲）：慢慢睇啦，我走嘞。借借！

周星星：喂，阿敏，喂！

（戏院外）

周星星（拉住阿敏）：阿敏，喂，你去边啫？

阿敏：做咩啫？

周星星：你去边啊？

阿敏：喂，你应承过我唔再做卧底家嘛，你都冇信用嘅！

周星星：你傻架？呢啲系命令嚟架嘛。我有乜办法啫！

阿敏：听晚系年三十晚。你应承过我去我屋企食饭架。

路人：唔该，借借！

周星星：冇得借！入去屙多涿啦！（推返入去）

周星星：少个人少双筷啫，一样咁好餸嘅。你乖乖哋……

阿敏：好，你去做嗰个汤茱迪嘅老公吖嘛？不男不女，古古怪怪，系咪要瞓埋同一张床添呀？

周星星：我好醒瞓架，绝对唔会做出啲咩事出嚟架。不过饮醉酒就难讲啲。

阿敏：你陪人瞓吖嘛？我就陪男人去街。

周星星：哗，噉你即系打横嚟讲嘅啫，你估我想嘅咩？工作嚟家嘛。

路人：唔该借借！

周星星：冇得借呀！

路人：我已经屙多咗一涿架嘞。

周星星：屙完尿屙屎啦！（推返入去）

阿敏：我唔理，总之你畀我知道你有咩景轰，就你敬我一尺，我敬你一丈。你陪一个人瞓，我就陪十个人瞓。

周星星：哗！你作为我条女讲啲噉嘅嘢，你成咩体统呀？

（恐怖音乐）阿敏：未算！如果你对我唔住，我会好似戏里便个女主角噉，睺你瞓着，绑你喺床头，一冰凿插死你！

（周星星屋企）

周星星（锯床）：绑我喺床头？唔好开玩笑！小心驶得万年船。

阿敏：喂，你做咩呀？

周星星：冇嘢呀。

周星星（揽阿敏）：哎，冲完凉嗱？

阿敏：系。

阿敏：罚你写埋沓挥春先。

周星星：好呀，听日先啦。

阿敏：冇得倾！去啦！

周星星（卒之写完咗啲挥春）：哎吖！好攰呀只手。写住咁多先得唔得呀？

阿敏：只手攰咪用脚啰。

（周星星用脚写挥春）

阿敏：哗！好嘢喎。真系用脚写呀？

周星星：唔系你当我richard呀？

阿敏：真系几叻喎。

周星星：我咁叻，噉你系咪越嚟越爱我啫？

阿敏：如果你真系咁叻，噉用脚食面吖笨！

周星星（用脚食面）：你讲咩话？

（汤茱迪屋企，电话响）

汤茱迪（拎起电话）：喂！

黎sir：喂，王太吓哗？我喺差馆打嚟嘅。我哋喺新界揾到你先生王百万呀。

汤茱迪：系？佢而家喺边嗱？

黎sir：喺差馆，你即刻嚟接佢返屋企啦。

汤茱迪：唔该！

管家婆：少奶，正话有人送咗啲好靓嘅底衫裤嚟呀。

汤茱迪：黐线！系人都知我唔着底衫裤架啦。你攞去啦。

管家婆：系。

汤茱迪：我而家要出去接大少。

管家婆：系，少奶。

（差馆）

黎sir：你系劏猪凳，唔系，汤茱迪系吗？

汤茱迪：叫我judy。你揾到我老公呀？

黎sir：啊，系吖，我哋喺新界揾到佢，佢神智又唔系好清醒，我哋怀疑佢头部受咗重创。身上面一毫子都冇。可能畀人打劫都未定。

汤茱迪：畀女人打劫咋啩？（换一个坐姿）成班男人冇人食烟架？

黎sir：王太，对唔住！呢间屋系唔准食烟嘅。

汤茱迪：食烟使唔使坐监呀？

黎sir：哦，噉又唔使，不过要罚五千文！

汤茱迪（扐出一叠钞票）：呢度有万文，请埋你食。

黎sir：王太，有钱唔系万能嘅。

汤茱迪：钱唔系万能，不过冇钱就好头痕。

（周星星行入嚟，走去汤茱迪身边）

（汤茱迪醒咗周星星一巴）

汤茱迪：你唔系我老公。

周星星：我冇话系吖。

黎sir（走上前）：喂，佢明明系你老公嚟架喎。

汤茱迪：我而家唔认佢吖。滚啦！滚啦！滚到你懵晒呀。

黎sir（同周星星讲）：喂，讲嘢啦。

周星星：讲咩啫？咩都唔记得晒吖嘛。

黎sir：呢个系你老婆嚟架。

汤茱迪：唔系噃。

周星星：我冇话系咯，都话，吖。

黎sir：两夫妻，床头打交床尾和吖嘛。你返去冧吓佢，乜事都冇啦，吓。

汤茱迪：我得闲同佢返屋企吖？！我睇吓佢死得未咋。

周星星：隐约记得我老婆好靓吓架喎。

黎sir：喂，而家佢唔靓咩吓？

周星星：你话呢？

黎sir：虽然系唔靓，但系佢真系你老婆嚟嘅。（对汤茱迪）对唔住，差人唔讲得大话。

周星星：我老婆身材几正吓架喎，听讲。

黎sir：而家佢身材唔正咩？

周星星：我老婆唔兴着底裤架喎！

黎sir：我就系啱啱及到佢冇着底裤。

汤茱迪：啊？

黎sir：估吓架咋。

汤茱迪：死嘢吖，short又short唔晒。把口好似啷过油噉，都唔知好嬲定好笑。

黎sir：系咯，你返屋企至决定好嬲定好笑喇吓。

汤茱迪：你而家吩咐我呀？！

（陈百祥突然间窜出）

陈百祥：啊，我忍咗你好耐嘞，你而家咩态度呀？冇咗个老公就报警，揾返个老公就姿整。信唔信我拉晒你哋返去深圳吖嗱？知唔知返到深圳摆你一年半载唔审你都得呀？

（汤茱迪有啲惊）

陈百祥：望……望咩呀？冇嚟礼貌。望住我！佢保得你几耐吖？97年7月连佢都拉埋返去！

汤茱迪：你系边个呀？

陈百祥（扬一扬自己嘅证件）：中国公安啰！咩呀？啊，睇你几面熟喎，几时返过大陆？

汤茱迪：我冇呀。

陈百祥：冇？你好似个商业罪犯呃咗国家好多钱噉喎。喂，僆仔，同我班架车，冚棒唥搭晒返去！连埋佢！

黎sir：我？！

陈百祥：哎，唔好插口呀，系咪唔合作破坏安定繁荣先？信唔信我锁你老母返去吖嗱？

黎sir（松咗一口气）：哎吖，好彩锁我老母，唔系锁我。

周星星：你哋讲完未吖？你老母！我好眼瞓喎。

陈百祥：喂，唔好乱讲，你唔系我老母。

汤茱迪（拖周星星返屋企）：眼瞓就返屋企啦。嚟，我哋返屋企。

陈百祥：喂喂喂，咪走呀！

汤茱迪：行啦！行啦！

陈百祥：依本子办事！枪呢？

黎sir：走咗咪好啰，由得人走啦嘛。

陈百祥：嗱，乱噏两句就得喇，僆仔！

黎sir：喂，你重叫我僆仔？你知唔知你炖咗冬菇架？你再冒警我随时揾人拉你架。

陈百祥：喂喂喂，唔好咁恶喎。我冒中国警啫，你叫中国人拉我吖。

黎sir：吓！你……

陈百祥：哎，再嘈吖嗱？！我真系上去考公安。97年落嚟砌你老母生猪肉。

黎sir（拍心口）：哎，好在我老母食斋架啫。哎！

（周星星嚟到汤朱迪屋企，见到金碧辉煌嘅屋企，不禁暗自惊叹）

家丁：少爷！

周星星：哗！哗！哗！……

汤茱迪：哗咩啫？间屋系你家嘛。

周星星：我失忆吖嘛。

汤茱迪：失忆大晒呀？

周星星：并唔系话大晒嘅……

（管家婆抽泣）

汤茱迪：你知唔知佢系边个呀？

周星星：阿妈？！

管家婆：少爷，你做乜妈我呀？

汤茱迪：妈你个d呀！呢卷厕子系我哋日本管家嚟架。

周星星：吓？！呢卷系厕纸嚟？！

汤茱迪：呢啲日本名嚟架。

细路（走向周星星）：爸爸！爸爸！爸爸！

周星星（抱起细路）：乖仔！乖仔！乖仔，爸爸好挂住你，乖仔！

汤茱迪：仔你个a呀！佢系花王嘅仔嚟架。

周星星：佢叫我爸爸喎。

汤茱迪：佢系人都叫爸爸架啦。叫人喇。

细路：爸爸！爸爸！爸爸！爸爸！……

（周星星将细路抌埋一边）

老坑（戙喺周星星面前）：你返嚟就好啰。

汤茱迪（指住老坑）：你知唔知佢边个呀？

周星星：系咪整咖喱架？

汤茱迪：佢系你老窦呀！

周星星：吓？！

老坑（展开双手）：乖仔！

周星星：阿爹！

（周星星转头就走，猛然发现一条友企喺身后）

条友：你返嚟真系好喇。

汤茱迪：知唔知佢边个呀？

周星星：花王之类啫吓哗？

汤茱迪：佢系你奶妈呀！

周星星：咩话？

条友：少爷，使唔使我揸杯奶畀你饮呀？

周星星：未口渴，迟啲先。

（突然间出现一条狗）

汤茱迪（指狗）：你知唔知佢边个呀？

周星星：唔会系细佬啩？

汤茱迪：就系。

周星星：吓？！

汤茱迪：你不嬲当佢细佬噉看待架嘛。

周星星：哦，噉样。

汤茱迪：快啲叫佢呀，唔系扑埋嚟咬你呀，话你知吖。

（成班人都走开，剩低周星星一个）

周星星：喂喂喂，唔系吓哗？叫咩名得架？

汤茱迪：用个脑谂吓喇。

周星星：喂喂喂喂！dolly! dolly! dolly! david,peter,maria,rose,gigo! 啫啫阿曼尼，velentino 弗烂事安奴，王晶！吴孟达！陈嘉上！……

（食晚餐）

周星星：呢啲狗应该攞去人道毁灭啦！

汤茱迪：只狗就叫做dolly啰！你自己唔记得人哋个名之嘛！

周星星：喂，我叫咗好多声dolly啦！

汤茱迪：系“dolly啰”，唔系“dolly啦”！就系差个啰字。

周星星（拍凳）：唔怪得系噉追住我个箩啦！

管家：少爷！兽医嚟咗喇。

兽医：边只狗要剥牙呀？

周星星：呢便。唔该晒你呀，医生。（周星星一路行向医生，只狗重一路咬住佢箩柚唔放）

厕子（畀汤茱迪嘈住，瞓唔着觉）：唔好咁大声呀。啊，啊……

（周星星同汤茱迪做紧按摩，周星星咬牙切齿）

汤茱迪：喂，平时你按摩梗系瞓着觉架。今日做咩咁high呀？

周星星：唔知点解好high呀真系。喂，使唔使拗到咁尽呀？

家丁：少爷，你平时好钟意架。

周星星：有噉嘅事咩？

汤茱迪：系吖。

周星星：哦，噉由佢吖！

（按摩完毕）

（周星星对墙上幅相好好奇）

汤茱迪：喂，幅相影咗咁多年啦，重有咩好睇啫？

周星星：家吓我失忆吖嘛。

汤茱迪：失忆大晒呀？

周星星：并唔系话大晒呀。我喺度睇紧点解会着住条底横影张噉嘅相咁奇怪都有架真系。

汤茱迪：哎吖，你重好讲，我“口危”你几耐你先肯着返条裤呀？初初你唔肯着添呀。话噉先系性感喎。睇你个衰样几唔满意吖！

周星星：睇唔出佢系啲噉嘅人。

汤茱迪：吓？！

周星星：我话醒唔起我系啲噉嘅人啫。

汤茱迪：唔系你个样似到十足十呀，我真系有啲怀疑你呀。

周星星：怀咩疑吖！我都咩都唔记得晒嘞。其实我临失踪之前讲过啲咩，做过啲咩？

汤茱迪：点知你做过啲咩，讲过啲咩呀！（走开）厕子！厕子！

周星星：叫佢做咩啫？

汤茱迪：较水畀你冲凉吖嘛。

周星星（转身，发现厕子戙喺自己身后，吓咗一跳）：瞓咗喇人哋。

厕子：少爷！有乜吩咐呀？

周星星：硬系失惊无神噉嘅你真系。

厕子（同汤茱迪讲）：少奶，佢话我失惊无神喎。

汤茱迪：哦，呢间屋啲人个个都失惊无神架啦。

周星星（走去汤茱迪身后拍佢嘅膊头）：咪以为净系你先识失惊无神先得架。

（汤茱迪打电话畀黎sir，黎sir打紧犯人）

黎sir（补多镬）：身痕呀？

手足：诈死呀？

黎sir（听电话）：喂！

汤茱迪：喂！黎sir呀，我系汤茱迪呀。

黎sir：咩事呀？

汤茱迪：你帮我揾嗰个老公呢，唔系我老公嚟架。

黎sir：薄啲，薄啲。（讲返电话）你点知佢唔系你老公呀？

汤茱迪：佢咩都唔认得喎！抱住花王嘅仔当自己嘅仔，重畀狗咬添呀。重有呀，我叫佢去冲凉，佢真系乖乖哋去冲凉喎。佢一年嗱，只系冲四次凉架咋。结婚嗰阵时，我嗌咗佢成个礼拜佢都唔肯冲呀。

黎sir：哦，我哋喺拘留所同佢冲凉，佢冲到上瘾。喂，佢真系你老公嚟架。你对佢好啲吓，如果唔系，我真系唔放过你架。

汤茱迪：哗！你噉讲嘢嘅？你系咪黎sir呀？

黎sir：我唔系黎sir，唔通系黎明呀？死喇！（打咗个犯人一锤）

汤茱迪：喂，你把声都唔似嘅？

黎sir：啱啱嗰把声唔系我架。吖，你打得少呀！

（陈sir办公室，汤茱迪推门入嚟）

汤茱迪：陈sir！

陈sir：王太，有咩贵干啊？

汤茱迪：我屋企个老公唔系我老公嚟架。

陈sir（乸乸哋）：我唔好明喎，你讲清楚啲。

汤茱迪：你哋个黎sir帮我揾返我嘅老公同我老公一模一样嘅呢，但我返到屋企就发觉，同我老公一模一样个老公呢根本就唔系我老公嚟。

陈sir：黎sir帮你揾返个老公个老公样同你老公一样，不过你发觉呢个老公唔系嗰个老公？

汤茱迪：佢根本就唔系我老公。

陈sir：噉你即系怀疑呢个类似你老公嘅物体唔系你老公？

汤茱迪：咁上下啦！

陈sir：噉你应该揾黎sir吖嘛。

汤茱迪：我打过电话揾黎sir。点知有个唔系黎sir嘅黎sir话而家呢个唔系我老公嘅老公系我老公喎。

陈sir：呢个唔系黎sir嘅黎sir扮黎sir话畀你听，呢个唔系你老公嘅老公系你老公？

汤茱迪：咁上下啦！

陈sir：嗱，噉我有一个建议嘞。嗱，你返屋企呢冲返个靓嘅热水凉，然后饮杯热牛奶。听朝瞓醒觉呢揾阿黎sir。你发觉嗰个唔系你老公嘅老公呢，就会呯一声变返你老公架嘞。

汤茱迪：连你都怀疑我呀？！连你都唔信呀？！你以为我发神经架？

陈sir：咁上下啦！

汤茱迪：佢真系假架。

陈sir：我都系假架。其实我刘德华扮架。而家年卅晚嘞，十二点半嘞。（睇表）一点添！年初一，系，总之就新年快乐，大家龙马精神！（推汤茱迪出门）

汤茱迪：你做乜嘢啫，陈sir？

陈sir：系噉先嗱，拜拜！

（“ung2”汤茱迪出门）

汤茱迪：我未讲完架。

陈sir（闩门）：拜拜！

（黎sir喺台底钻出）

黎sir：哦，你真系得嘅，不愧系我嘅同期同学呀。恭喜发财！恭喜发财！

陈sir：你个死仔呢镬一定累死我。佢咁有钱，一定告到我甩裤架嘛。你知唔知呀？

黎sir：喂，而家我哋伸张正义，维持法纪咋喎。

陈sir（揾手指厾黎sir）：你强奸正义，目无法纪呀！

黎sir：哗！你咁大力厾我？！死啦！（打咗陈sir一拳，陈sir揞住块面）

黎sir：唔系咩呀？

陈sir：我揾手指厾你，你打我？我同你搏命！（打作一团）

（汤茱迪返嚟攞返火机）

汤茱迪：陈sir，我漏咗个打火机呀。（陈sir畀打到好似熊猫噉）

汤茱迪：哎呀！做咩你对眼黑晒架？

陈sir：唔够瞓，黑眼圈呀。王太，恭喜发财呀！万事胜意呀！猛财就手呀！学业猛进呀！青春常驻呀！（每讲一句踢台底嘅黎sir一脚）总之，大家happy呀！恭喜发财呀！

汤茱迪：哎吖！成班都黐线架。

（周星星喺汤茱迪屋企周围揾证据）

周星星（听到锯嘢声）：咩声呢？（见到自己企嘅地方就嚟畀锯咗去嘞，赶唔切走成个人跌落去）做咩呀？

周星星（见到陈百祥）：做咩呀你？

陈百祥：你请我做助手吖嘛。

周星星：系吖。

陈百祥：你叫我抬住支炮廿四小时保护你吖嘛。

周星星：系吖。

陈百祥：咪做足啰。

周星星：我冇叫你锯咗人哋天花板呀大佬。

陈百祥：系喎！呢样冇喎。

周星星：行啦，死蠢！

（补返好个竉）

周星星：喂，喺呢度我唔使你保护嘞，你快啲走。

陈百祥：唔系喎！我都要及住你有冇对我表妹唔住吖。

（画外音）

女佣：少奶，你返嚟喇！

汤茱迪：系吖。

（周星星见到汤茱迪行紧入嚟）

周星星：汤茱迪返紧嚟，快啲钻返落去。

陈百祥（揭开个盖，见到下面间房有人）：弊！有条肥佬返咗房添！点算呀？（阿叻唯有扮黄百万张相企住喺度）

（汤茱迪打开门，见到周星星喺度拗头）

周星星：返嚟喇？返嚟喇？去边嚟呀？

汤茱迪：哦，冇，我去食云吞面之嘛。

周星星：哦，食云吞面呀？

汤茱迪：系咯，系咯。

周星星：非常好！非常好！

（周星星转身）

周星星（心想）：为咗完成任务，唯有发挥我玉树临风嘅威力。一于施展眉目传情大法引佢讲出真相。

汤茱迪：为咗揾出真相，我要发挥自己风华绝代嘅魅力，撕开佢嘅假面具。

（两人喺度斗发姣,周星星粒假癦唔小心整甩咗，马上黐返上去）

周星星：茱迪！

汤茱迪：百万！

周星星：茱迪！

汤茱迪：百万！

（相拥，转圈）

（越转越快）

（阿叻畀阿敏张相周星星睇，周星星见到之后一惊就放手，汤茱迪飞出十万八千里。）

（电话响）

周星星：对唔住，今日我有啲攰。我都系返出书房瞓。

（厕子间房）

厕子（跪低祈祷）：仁慈嘅上帝吖，求你赐一个精壮嘅男人到我梦中。（日语）阿里阿多。

（陈百祥不慎跌落去头先锯嘅窿，自食其果）

厕子（好高兴）：真系好粗壮呀！重剥埋衫添！多谢上帝！多谢上帝！我嚟喇！

（年初一）

女佣：做嘢咁慢架？！你哋快手啲啦，啲礼物摆好佢！少爷少奶落嚟喇！

（汤茱迪同周星星落楼）

仆人（拜年）：恭喜少爷一本万利！龙马精神！鸡年顺景！大吉大利！横财就手！

汤茱迪（派利市）：利利市市吓！（见周星星冇派利市）喂，你都派利市啦！

周星星：我冇带添。攞啲嚟呀！（攞咗汤茱迪啲利市）

周星星（派利市）：嚟嚟嚟！恭喜发财！大吉大利呀吓！

仆人：多谢！多谢！多谢！

周星星（见到利市里面原来有好多钱）：喂喂喂，你结咗婚架喇吓哗你？攞返嚟先。（攞返派出去嘅利市）你嗰封呢？

仆人：未吖，少爷，我未结……

周星星：你攞错我嗰封吖嘛。你嗰封喺少奶度。哗！嗰便一人派两封喎嗰便！（收埋利市）发达嘞！

（黎sir嚟拜年）

黎sir：恭喜！恭喜！恭喜！

周星星：哗，黎sir！

黎sir：不成敬意！不成敬意！

汤茱迪：黎sir！

周星星（收咗礼物）：哗！黎sir，咁厚礼呀！

黎sir：嚟探王翁你，使多多钱都要架啦。

汤茱迪：黎sir，恭喜发财喎！

黎sir：闸住！我哋唔发得财架！一发财icac就请我哋饮咖啡架嘞。

汤茱迪：哦，噉步步高升啦！

黎sir：噉就得，噉就得。王翁，你冇事吖嘛？！啊，冚亲个头都要揾些少时间修养吓至得。

汤茱迪：系呀！系呀！你哋坐一阵先。我去攞啲年糕出嚟吓。

周星星、黎sir：好呀！好呀！

（周星星同黎sir坐低）

黎sir：点呀？查到啲咩嘢呀？

周星星：我已经出到美男计，谂住牺牲色相都套唔到咩料喎。

黎sir：吓？

周星星：喂，不如你另请高明好过哩。

黎sir（叉周星星条颈）：你想死吖？

周星星：阿四呀，斟茶！

阿四：系，少爷！

黎sir：我连炖咗冬菇嗰个都揾埋嚟帮你手，你再揾唔到个真凶，你切腹自尽都得喇你！

周星星：我惊未切腹就畀人怼冧咋。

黎sir：边个咁够胆呀？

（炮丈声）

（林大岳过嚟拜年）

林大岳：诈肚痛，去屎坑排长龙。

黎sir：喂，边个嚟架？

周星星：咦，着皮草架喎。咦，女嚟喎。（猛梳头）

林大岳：happy new year! my best friend.

黎sir：哗，你条女光头架？

林大岳（同周星星拥抱）：oh, my brother amigo! happy new year!

周星星：揾边位呀，阿生？

林大岳：咦？

汤茱迪：大岳！

林大岳：judy!

林大岳：喂，judy，百万short咗呀？连我都唔认得？

周星星：都记得啲嘅，大岳吖嘛。

林大岳：唔系，你唔系叫我大岳嘅。你叫我咩？讲！

汤茱迪：讲！

林大岳：讲！

周星星：系咪冚家富贵呀？

林大岳：冚家富贵？！冚家富贵咪就系冚家富贵啰，猪泵兜！

周星星：唔系冚家富贵，系猪泵兜呀？

林大岳：（指自己）唔系，我系冚家富贵！（指汤茱迪）猪泵兜！

周星星：哦，（指汤茱迪）你系猪泵兜！

汤茱迪（指周星星）：你系猪泵兜！

周星星：噉你咪冚家富贵？

汤茱迪（指林大岳）：佢系冚家富贵！

林大岳（指汤茱迪）：系嘞，佢系冚家富贵！

周星星：（指汤茱迪）你系冚家富贵，（指林大岳）你系猪泵兜！

汤茱迪：佢至系冚家富贵吖，冚家铲！

周星星（指自己）：我系冚家铲？

黎sir：好啰，好啰，好啰，大家唔好搞咁复杂嘞，全部都叫仆街！

周星星：哗！新年流流！

林大岳：讲啲噉嘅嘢架？

汤茱迪：累口水讲过！

（黎sir吐口水，中咗林大岳右眼）

周星星、汤茱迪：准呀！

黎sir：sorry, sorry, sorry!

林大岳：呢条懵炳边个嚟架？

汤茱迪：佢就系帮我揾返百万嗰个黎警司吖嘛。

林大岳：哦，噉我不嬲都好少同啲低级嘅巡逻员喺埋一齐嘅！

林大岳（走去周星星身边）：喂喂喂，我今晚个disco呢新开张。你两位一定要早啲到。我叫咗好多女嚟吖。你就最啱嘞。哈哈

汤茱迪：讲咩呀你？

林大岳：讲笑之嘛。哎吖！弊！我唔记得同我老窦拜年添！

周星星：令尊翁佢！

林大岳：佢住喺和合石。

周星星：哦！

汤茱迪：哦！噉你快啲去喇！

林大岳：我赶住去。系噉先。今晚见。

汤茱迪：拜拜！

周星星：唔送咯喎。

黎sir（咬耳仔）：佢系王百万由细到玩到大嘅死党，成日谋住佢副家产，好有嫌疑呀。

（林大岳嘅disco）

周星星：judy呀，出嚟使唔使黐撇须咁牙擦呀？

汤茱迪：唔顺呀？你都整返撇吖。

林大岳：女人之嘛，使沟嘅咩？嘥时间啦！有钱就有女人，揾啲钱掟到佢瞓低，再揾啲钱掟到佢爱我呀！钱，就同白粉一样，会上瘾嘅。

汤茱迪（坐低）：哎，噉你咪好多白粉？！最近又沟紧边个女明星呀？

林大岳：哎，最近唔沟女明星，转咗口味。沟啲啱啱出嚟发梦嘅女强人，重过瘾呀！

友a：喂，点过瘾法先？

林大岳：嗱，我擒日沟咗条女，开花店嘅。

（周星星喷水）

友a：咁啱嘅？！我寻日喐咗条女又系开花店架喎。

（周星星又喷）

友b：我听日约嘅条女又系开花店架喎。

（周星星又喷）

周星星：话时话喇，边间花店呀又？

林大岳（拧转面）：咦，乜你都想排队吖？哈哈哈！问过你老婆未呀？

汤茱迪：哎，唔好望住我呀！我好民主架！百万想话逢场作兴咯喎，有乜所谓啫？我去跳舞！（行开）

林大岳：哎，咪搞我个头！

周星星（坐到林大岳身边）：喂喂喂，学吓嘢学吓嘢，开花店嗰个女仔点正法啫吓？

林大岳：哗！点正法呢我就唔好识讲嘞。总言之呢就眼大大，鼻高高，嘴细细。哗！双峰插云呀！（周星星嘅脑海里便浮现阿敏嘅形象）重有……

周星星：够！叫咩名呀佢？

林大岳：啊，死嘞！年中沟咁多女，我点记得呀？ada? 唔系唔系唔系！patty? 唔系唔系唔系！cindy? 唔系唔系唔系！总言之呢床上功夫一流，由床头搞到床尾，床尾搞返上床头，床上面搞到落地下，厨房搞到出厅，厅又搞返入厨房。哗！够淫贱呀！

周星星：好贱呀真系！

友a：重有添呀，我听条女讲呢，佢有个飞噉一半嘅仔都系做差佬架喎。

周星星（扑向友a，叉住友a条颈）：条女喺边度？快啲介绍我识！快啲啦！

林大岳（拉开周星星）：哎，你咪咁擒青得架。我约咗佢嚟，阵见你咪见到啰。

周星星：系咩？

林大岳：系。

周星星：噉呀，补补妆先吓！

周星星（见到阿敏都喺disco）：真系？

（周星星走去洗手间揾阿敏）

（第一间洗手间，两个基佬）

基佬：baby, give me a kiss!

周星星（将基佬打返入去）：贱格！

（第二间洗手间，两个lesbian）

lesbian：baby, give me a kiss!

周星星：好呀！

lesbian（打周星星，闩门）：贱格！

（第三间洗手间）

程文静：你做咩呀？

周星星：揾人啫。

（阿敏同汤茱迪跳紧辣身舞）

（周星星埋去汤茱迪身边）

周星星：judy，有靓女唔介绍嚟识吓呀？judy! （阿敏走咗去）喂！

汤茱迪：冚家富贵呀，你唔好争食先得架！

周星星：你有靓女唔弹畀啲兄弟不得止，重要松踭？！讲到边度都讲唔通吖你！

汤茱迪：你自己喫饱啦！

程文静：judy!（走埋嚟汤茱迪身边）

程文静：hi!

汤茱迪：喂，文静，等我嚟介绍吓。（向周星星介绍程文静）佢系我公司最帮得手嘅程文静。（向程文静介绍周星星）佢系王生。

程文静：我见过王生一次啦。

周星星：系呀，系。

汤茱迪：公司啲嘢冇咗文静呀，都唔知点算好呀。

周星星：唔知点算呀，真系。

程文静：噉我唔阻两位嘞。

汤茱迪：哦，唔阻！倾多一阵先啦。

程文静：拜拜！

汤茱迪：拜拜！（程文静离开）

汤茱迪：望咩呀？！成日挂住“目及”女。

周星星：噉有乜世艺得架？

汤茱迪：喂，陪我出去跳舞。（拉周星星出去跳舞）

汤茱迪：揾紧边个呀？

周星星：揾紧人。

汤茱迪：揾头先条女吖？

周星星：唔系呀。

汤茱迪：有冇讲大话先？

周星星：冇呀。

汤茱迪：噉你可唔可以投入啲同我跳只舞呀？

（两个欲吻，畀林大岳搞破坏）

林大岳：喂，乜你两个喺度咁亲热呀？

林大岳（问周星星）：你响边嗱？我条女嚟咗，重想介绍你识添。

周星星：家吓呢？

林大岳：家吓咪走咗啰。等第日有机会咪再……哈哈哈！（撇咗去）

汤茱迪：佢头发几有型呀呵？

周星星：系，我好欣赏佢。

（两人返归）

（汤茱迪想入非非）

（梦境）

周星星：大鼻妹，今晚我哋成班友开p，预你咯喎。重企喺度做咩呀？快啲班多几条女嚟吖。

汤茱迪：好呀！

周星星：好咩啫？

汤茱迪：冇嘢，我谂返以前之嘛。嚟，同你玩啲新嘢。

周星星：新嘢？！

周星星（着住校服，呆呆滞滞噉）：我哋今晚成班开p，预咗你呀大鼻妹。碌木企喺度做咩呀？

汤茱迪（着住校服）：哎吖，你畀啲笑容得唔得呀？而家死老窦咩？

周星星（再嚟过）：我哋今晚成班开p，预咗你喇，大波妹。

汤茱迪：大鼻妹吖。

周星星：sorry!

周星星（再嚟过）：我哋今晚成班开p喎，大鼻妹。预咗你架喇。喂，重企喺度做咩呀？快啲班多几条女嚟呀！

汤茱迪：cut! very good!

周星星（抹汗）：哎！真恶捞！

（周星星坐喺汤茱迪隔篱）

汤茱迪：哎！你做乜入我房呀？我妈就返嚟架喇。

周星星：你阿妈？

汤茱迪：我话畀佢知话你同我补习架咋。畀佢知佢实好嬲架。我阿妈话，唔可以立乱畀男仔入我房，唔可以立乱畀男仔惜。唔可以立乱畀男仔……咩架。

周星星：对白系咪到我？

汤茱迪：你讲咩啫？

周星星：咩啫？我都唔知咩。

汤茱迪：你重话唔知咩？上次露营嗰阵嗱，三更半夜走入嚟，惜咗人一啖。

周星星：噉唔惜架嘞，我都系返书房瞓。（欲走）

汤茱迪（拖住周星星）：人哋净系想问你点解今晚唔惜喎。

周星星：噉惜咗你系咪可以返书房瞓呢？

汤茱迪：噉惜先嗱。

（周星星惜咗汤茱迪一啖，想转身走）

汤茱迪（拖住周星星）：哎，上次都唔系惜呢度。

周星星：哗，唔系惜呢度惜边度呀？喂，judy，做人呀咪话得寸进尺好喎。曳吖你。

汤茱迪：系吖，曳吓都唔得呀？嚟吖，嚟吖，……

周星星：死就死啦！

（厕子撞门入嚟）

厕子（手揸鸡毛掸子）：哗！你两个衰嘢作死呀？

周星星：咦，你又有份捞呀？吓！

厕子（一味打周星星）：你两个衰嘢！你两个衰嘢！你两个衰嘢！你两个衰嘢！搞搞震吖嗱，唔打过你都唔得。

周星星：喂喂喂！你咪净系“faak8”我，“faak8”吓佢得架。

厕子：嗰个导演嚟架，唔打得架。（继续打）你两个衰嘢！搞搞震！搞我个女？沟佢上床？你个衰女，你唔知衰，唔知丑，佗衰家呀你！

周星星：你哋家丑不出外传。我行先。（想走）

厕子：我叉！你个衰仔你！跪低！

（周星星同汤茱迪齐齐跪低）

厕子：你个衰仔，唧咗我个女只猪想走？

周星星：伯母铺话法要戒吖。我本身唔食猪肉。

厕子：噉嘅嘢你都讲得出口嘅？你冇人性架你。噍完松？

周星星：我唔玩喇！

厕子：照做呀！照做呀！

厕子（同汤茱迪）：你睇吓喇，呢个人冇人性冇心肝架。哎，我唔理呀，我同你老窦讲呀，你两个下个月结婚喇。

周星星：啊？又结？

厕子：唔好呀？

汤茱迪：结唔结呀？

周星星：结就结喇，嗱嗱声快啲啦！

厕子：噉咪好啰！嗱嗱林！你两个要以后生性做人呀！我有事呀，唔阻你哋呀！

周星星：行啦，爽手啦！

厕子：你两个想做就做啦。

汤茱迪：喂，阿妈准结婚喇，继续啦。

周星星：吓？重未玩完？

汤茱迪：嚟啦！

周星星：喂，够钟嘞，好散场啦。（想走）

汤茱迪：我哋分房瞓咁耐，你一直都冇理过我。你外便有咁多女人我都冇理过你吖。我只系要你一晚啫。噉都唔得？（喊，依偎喺周星星身上）噉都唔得？点解你会变成噉？点解？

周星星：唔好喊啦，我个人唔系噉架喎。我好专一架喎。

汤茱迪：你讲多次。

周星星：我话我个人好专一，老婆，我要一个就够。

（汤茱迪笑逐颜开）

汤茱迪：你话你爱我呀。

周星星：我爱你！

汤茱迪：讲多次。

周星星：我爱你！

汤茱迪：揽住我。

（汤茱迪瞓着咗……）

（周星星擗低汤茱迪，嚟到阿敏嘅花店）

路人：望咩，僆仔？

周星星：望你畀车车死呀！

（周星星不幸言中）

（周星星走入花店）

周星星（睇录像）：转身！拧转身！（用放大镜睇）顶你个肺吖！重咁沙尘着花袜？！

（周星星将一把碎银抌喺地上，踎低身，撩起路人嘅裤脚睇袜）

路人甲：做咩呀，僆仔？

周星星：执嘢啫，大佬。

路人乙：做咩呀，僆仔？

周星星：执嘢啫，大佬。

阿敏：你做咩啫？扫街呀？返入去啦！

周星星：冇，执返啲散纸之嘛。

周星星：有红豆沙食呀。

周星星：啊，乜今日冇乜生意嘅呢？

阿敏：新开张系噉架啦。

周星星：唔系噃，听讲擒日好多人嚟揾你喎。

阿敏：系吖，你又知？喂，你粒癦呢？（粒癦落咗喺碗红豆沙里面）喺呢度呀。

（陈百祥冲入嚟将碗红豆沙食咗，粒癦都食埋）

陈百祥：好嘢！哦，啲红豆几靓。

周星星：你唔觉韧咩？

陈百祥：有一粒呀？

周星星：梗系啦，连我粒癦都食埋！

陈百祥：加粒癦落去煲红豆沙好味啲咩？

阿敏：你哋慢慢倾，我出去呀。

周星星：喂喂喂，去边啫？

阿敏：帮人送花畀老婆呀。似得你呀，人又冇，花又冇，钱又冇，拜拜！

陈百祥：噉你又系嘅。

周星星：你又嚟做咩呀？

陈百祥：我嚟食红豆沙同廿四小时保护你啰。唔啱咪走啰。（转身，周星星拉返）

周星星：喂！林大岳班友今晚话要嚟我度赌“0披”。我思疑可以查到线索出嚟嘅。

陈百祥：你深庆得人嗱，我纪律部队啤王呀。今晚我傍住你，揾到食呀！

（王百万屋企）

（周星星喺台底钻出嚟）

陈百祥：揾咩呀？

周星星：冇嘢。

周星星：咩环境呀？

陈百祥：一切正常。

周星星：有冇带钱呀？

陈百祥：你唔知我叫白头神探咩？

周星星：你有白头发咩？

陈百祥：专赌白头片嘅神探。

林大岳（见到王百万冇咗粒癦）：哎？王翁，你粒癦呢？

周星星：嗯，脱咗。

林大岳：喂，富贵癦嚟架喎。

周星星：系？因为钱多得滞想少减啲啫。

陈百祥：啊，精句！精句！

周星星：吓哗？

林大岳：噉就啱嘞，照老规矩啦。

周星星：咩老规矩？

林大岳：赌现水。

周星星：哦，呢层规矩啦，呢层。

林大岳：最多信廿万。

（周星星攞出一万文）

陈百祥：散纸嚟架？

周星星：全副身家。

boy：一万出part啰呵，王生？

周星星（睇牌）：笈手八呀。

林大岳：九仔都话事呀？五万啦。

周星星：点呀？

陈百祥：五万大十五万。搭part都肥啦。

周星星：吓哗？

林大岳：跟佢。（周星星冇晒钱嘞）喂，攞钱出嚟得架。

周星星：散纸呢？

陈百祥：散纸？

陈百祥：哎！哎！阿边个……

周星星（拉返陈百祥）：喂喂喂，我去揾阿边个啦，你坐喺度。

陈百祥：哦。

（汤茱迪打紧麻将）

周星星：老婆，攞住一千几百万嚟顶住档先啦。

汤茱迪：喂，不嬲都分开荷包赌钱架啦。你唔系有三千万现金喺屋企嘅咩？

周星星：我唔记得咗摆喺边吖嘛。

汤茱迪：咁叻仔实记得返嘅。喂，打边只好呀？

周星星（指九筒）：呢只啦。

汤茱迪：真系？

周星星：信我得架。

汤茱迪（出牌）：九筒！

麻雀脚甲：食糊！

麻雀脚乙：我都系吖！

麻雀脚丙：一炮三响！

（周星星支箭噉标出去）

汤茱迪：死仔吖！

（差馆）

周星星：阿黎sir喺边度？

手足：喺cid房happy紧。

（周星星推门入去，黎sir喺度打紧人）

黎sir：hi!

周星星：hi!

黎sir：你个衰仔！打得少呀你！

周星星：有紧要嘢同你斟喎。

黎sir：有咩紧要事呀？睇唔到我打紧人咩？

周星星：问你攞二百万嚟赶注呀。

黎sir：吓？二百万？有冇搞错呀？

（犯人还拖）

黎sir：你够胆还拖？！

周星星（拉住黎sir）：呢二百万你无论如何冇得悭架喇你！

黎sir：我边度攞二百万畀你呀？

周星星：大岳嚟咗我屋企赌钱，如果冇钱就穿煲！噉就大家死架咋，爽手啲得架。

黎sir：你放手先啦。

周星星：你应承我咪放手啰。

（周星星攞住二百万返到王百万屋企）

陈百祥：去街市买嘢呀？

周星星：唔好意思，啲散纸乱咁擗。畀啲工人踢入工人房。工人房喺元朗。

林大岳：唔使讲咁多喇，梗等埋你嘅。派牌呀！

周星星：派牌！

boy：八一啤话事。

周星星：噉呀，我晒。（谂住抌晒啲钱出去）

陈百祥（阻止）：喂喂喂！泵住鸡先。冇乜特别嘅，话住廿万先。（抌咗廿万出去）

林大岳：廿万呀？大你八十万呀。

boy：跟！

陈百祥：三条八。

周星星：唔使讲，“fing6”晒出去！

陈百祥：报纸？

周星星：“fing6”埋出去啦！

（陈百祥将啲钱掟晒出去）

林大岳：三条八？挑！好少钱啫！跟！

黎sir：返嚟喇？赢定输呀？

周星星：睇我个头就知啦。（指自己头）

黎sir：输晒呀？你又话自己“0披”王？！

周星星：我几时有讲过呀？

陈百祥：我有提过吓。

黎sir：噉点算呀而家？

陈百祥：你揾多一百万嚟翻本啰。我即刻发挥我“0披”王嘅本色！

黎sir：哗！重要攞多一百万添呀？我攞晒差馆啲保证金同保释金返嚟畀你攞晒去赌。而家差馆畀人追债喇。你唔攞返嗰两百万返嚟，买定船飞着草都得嘞！

周星星：噉嗱嗱声借啲钱嚟买船飞嘞。

黎sir（手指指）：你……

陈百祥：喂喂喂，真系揾多一百万嚟吖……

黎sir：睬你都傻。（走）

陈百祥：唔系大家一镬熟架咋。

陈百祥：喂喂喂！

黎sir：你哋输埋嗰一百万点算呀？

陈百祥：横死掂死啦！点都要搏一搏架。

画外音：兄弟，揾餐晏仔食吓啫，唔使抦吓哗？

（两老千伏喺张台上便）

周星星：又打紧咩人嗱？

黎sir：打紧两个老千啰。

陈百祥：啊？老千咁尊贵嘅职业你都乱咁揼？

黎sir：佢呃咗个人两文鸡。

周星星：哦，呃边个人两文鸡呀？

黎sir：佢呃嗰个人系我呀。

陈百祥：咩话？乞儿都呃？耷佢老母！

黎sir：耷佢吖！

（两个老千转身）

周星星：吓？！赌圣嘅克星——洪爷！

洪爷：hello! 你好吗？

周星星：好咩呀？输到着草咁滞呀家吓。

大军：兄弟，你叫佢唔好打我哋。我教你老千速成法。赢梗架。

周星星：得！不过露两招嚟睇吓先！

（老千表演）

（林大岳等到瞓着咁滞）

林大岳（唔耐烦）：有冇搞错呀？咁耐都未返架？

汤茱迪：十六圈都打完啦，重未返！都唔知搞乜鬼。

陈百祥（着件红衫蒲头）：返嚟喇！返嚟喇！各位观众！

（周星星着到赌神噉款）

仆人（鼓掌）：好有型呀！……

（周星星坐正）

林大岳：个款就好熟面口嘞。不过唔知你扮边个啫？

周星星：你估吓。（表演正话学返啲嘢）

陈百祥：登登登登……

林大岳：啊！我知喇！赌圣！

周星星：错！系大卫高柏菲。

林大岳：哗！

周星星：派牌！

林大岳：我三条king！

周星星：我三条烟！

林大岳：同花顺！

周星星：我大你个同花顺！

林大岳；四条烟！

周星星：五条烟！

（赢返好多钱）

陈百祥：喂，嗰两条友教你啲嘢真系得喎。赢尽佢！

周星星：我重要趁呢个机会揾出谋杀王百万嘅真相！

林大岳：一百万！

周星星：跟你！

林大岳：烟啤话事！

周星星：你傻架！同花顺面话事。晒冷！

林大岳（输到冇晒钱，剩返五毫子）：我唔信你系大卫高柏菲，我照跟！得返五毫子，碛住五百万！

周星星：唔使碛！只要你肯回答我一个问题，我咪当你跟咗啰。

林大岳：咩问题呀？

周星星：你曾几何时有冇谂过要杀死我呀？

林大岳：吓……

周星星：答我啦！

林大岳：我……

周星星（大大声）：答我啦嘛！

林大岳（大叫）：啊……唔玩嘞！唔玩嘞！问埋啲噉嘅问题！走！

手下：系！

陈百祥：唔玩就擸钱咯。（咬耳仔）喂，钱就赢尽嘞，真相揾到未？

周星星：真相就系……，（翻牌）我系四仔底，条傻佬居然唔玩！哈哈哈！

（林大岳跣亲）

手下：大佬，冇事吖嘛？有冇跌亲呀，大佬？

（差馆）

黎sir：回水！

陈百祥：啲本畀返啦！赢嗰啲唔使预你吓嘛？

黎sir：借钱唔使畀利息呀？

周星星：哎，照银行同业拆息畀佢。

陈百祥：哗，今日好低咋喎，两厘七五喎。二百万除返365日。25文。（畀黎sir卅文）畀够三条唔使找。

黎sir（收下三十文）：整多条醒吓神啦。

（陈百祥经周星星同意畀多黎sir十文）

黎sir：早系噉唔使咁劳嘈啦。

黎sir：查咁耐，有咩进展呀？

周星星：我发觉呢个汤茱迪越嚟越古怪。我谂佢背后一定有啲不可告人嘅秘密。重有嗰个林大岳呢……

黎sir（摆手）：太肤浅嘞！我喺苏格兰场受训嗰阵，曾经研究过世界所有奇案嘅案件。包括东方快车谋杀案，尼罗河谋杀案，电话情杀案，香港灶底藏尸案等等等等。发现一个重大原则。

陈百祥：咩原则呀？

黎sir：越系嫌疑大嘅人，越唔系凶手。

周星星：挑！

陈百祥：我同意！唔通粤语片话越冇嫌疑就越系凶手呀？

黎sir：可以噉讲！凶手可能表面上唔识死者嘅。相貌平凡，唔高唔矮，孔武有力，有暴力倾向，钟意乱咁打人。极度贪钱，甚至乎三四十文都贪餐饱嘅。

周星星：照你噉讲，凶手系你喎。人嚟，拉佢！

手足：yeah, sir!（拉黎sir）

黎sir（“fing6”甩）：黐咗线咩？short咗呀？

手足：sorry, sir!

黎sir：推理就系噉推理啫。嗱，言归正传嘞！你喺汤茱迪查唔到咩线索，就返写字楼查吓林大岳同王百万喺生意上有咩拗撬而动杀机。

周星星：又话最有嫌疑嗰啲唔会系凶手？

黎sir：随口噏吓啫。重唔快去查？

周星星：等我办完件好紧要嘅事先得唔得呀？

（周星星返屋企）

（见到有人送咗一扎好大嘅畀阿敏，重有一只好大嘅信封添）

周星星（抽出贺卡，读上面啲字）：爱你三百六十年？！

周星星（咬牙切齿）：岂有此理，你当我冇到，你？！

周星星：奸夫淫妇！奸夫淫妇！手起刀落！刀？！（攞错咗）我顶！（喺刀架上便抽咗把刀）门！（闩埋门，钻入床底）

（阿敏同汤茱迪入嚟）

阿敏：随便坐！多谢你啲花喎。

周星星：花袜佬？！

阿敏：唔好噉啦，我有男朋友你知架。虽然佢又冇钱，又自私，又孤寒，又老土。

周星星：唔系话我。

阿敏：但系佢始终都系我男朋友，我唔可以接收你架。喂，唔好呀！唔好呀！……

周星星：我杀你个冚家铲！

汤茱迪（觉得意外）：系你？！

周星星：系你！

阿敏：系你？

周星星（调转枪头，同阿敏讲）：其实我系话……，杀你个冚家铲！

汤茱迪：喂，你唔好难为佢吖！你擸把刀做咩啫？你放低先啦！（放低周星星手上把刀）

周星星：咪住！咪住！你听我讲先。（同汤茱迪讲）我都跟踪得你耐嘞！（手指阿敏）原来就嚟揾呢只狐狸精！

阿敏（手指自己）：我？！

周星星：咩呀？三只手指指住你，重问呀？（闹阿敏）喂，你咩新丝萝卜皮？同我王百万争老婆呀？我家吓问你，你爱我定爱佢？！

汤茱迪：玩吓啫。

周星星（润阿敏）：嗱！玩吓啫！噉样。人哋玩你咋，你狐狸精，你蜘蛛精，佗衰家呀你！你想要钱啫吓哗你？得嘞，钱咋嘛？嚟呀，嚟呀。（拿出一把散纸）嗱，钱呀嗱，钱呀嗱，钱呀嗱，钱呀嗱！咩呀？畀咗钱你重唔扯吖嗱？！

阿敏：你两个……，好，我扯！（行出去）

汤茱迪：阿敏嗱！阿敏！阿敏嗱！阿敏！呢度你屋企嚟架，你去边呀？

阿敏（欲开门，突然醒起）：系喎，呢度我屋企嚟架喎。喂，你两个扯呀！扯呀！

汤茱迪：喂，阿敏，你唔好嬲啦！你听我讲……

周星星：讲咩讲？落去楼下等我！等我闹衰只蜘蛛精两句得！行啦！你做咩呀？

汤茱迪：行咪行！（落楼）

周星星：嗱，我严重警告你呀，你以后唔好再见我老婆呀！如果唔系我见镬打镬你呀！知吗？

阿敏：喂，人都走咗嘞，你重喺度做戏？头先你闹得好过瘾啦！

周星星：噉物梗系噉做架啦！你觉得我头先嘅演出点啫？

阿敏：好“喫”！

周星星：有冇搞错呀？我旧底做话剧攞奖架喎！

阿敏：噉你系“喫”吖嘛！

周星星：我都未问你吖，你点会畀呢个女人沟架？

阿敏：哦，我见佢咁好人，又成日都帮衬。得闲咪陪佢行吓街饮吓茶啰。点知佢出便系女人，入便系男人咋。

周星星：估唔到系佢嘅真系！

阿敏：喂，人哋喺出便等紧你喇！重唔落去？！走啦！

周星星：总之我一办完单案，我就日日陪你啦，好唔好？

阿敏：呣！

（周星星嘴咗阿敏一啖）

阿敏：喂，我买咗啲嘢送畀你呀。

周星星：系？咩嚟架？

阿敏：花袜！

周星星：烧咗佢吖！

（大厦）

接待：王生，早晨！

周星星：啊，早晨！

（周星星嚟到汤茱迪嘅办公室）

周星星：hello!

秘书：王生，早餐！王太行开咗喎。

周星星：我知。

秘书：里便停电嗱！

周星星：唔紧要呀，我入去攞被蒸馏水饮吓啫。

（周星星入办公室揾嘢）

（程文静畀一个信封汤茱迪）

程文静：今朝送嚟架。

（汤茱迪一睇信封里便嘅嘢，即刻变得好紧张）

程文静：有咩事呀？

汤茱迪：冇事，返出去啦！

程文静：你一定有问题。

汤茱迪：都话冇问题咯，有都唔关你事。返出去！

（周星星喺间房度见到一张纸）

周星星（读）：注意，（用火机照住睇）千万不要用打火机睇嘢。咩意思呢？（张纸烧着咗，周星星将张纸随手抌落垃圾桶）

周星星（用白兰地灭火）：白兰地嚟？！

（周星星将个垃圾桶踢开，然之后用西装去冚啲火，适得其反，件西装都烧着咗）

（周星星将件西装抌咗去窗帘度，窗帘都烧着咗，越搞越大镬）

（汤茱迪打电话畀林大岳）

女仆：老世！

林大岳（接电话）：哦！

汤茱迪：喂，大岳呀。

林大岳：喂，点呀？僆仔！

汤茱迪：你点影到我啲相呀？

林大岳：哦，用相机影咪影到啰。我伏咗你好耐架喇。不过估唔到你连呢件都沟埋。啲咁热辣辣嘅相我相信好多八卦杂志都好有兴趣嘅。

汤茱迪：你因住折堕呀！

林大岳：啊，噉我折堕梗架嘞。所以我咪储多啲钱留返我折堕嗰阵用啰。如果你想攞返啲三点尽露嘅相呢，今晚七点嚟我公司啦。

汤茱迪：你想点？

（周星星望火兴叹）

周星星（报火警）：消防局呀唔该！（消防龙头自动喷水，周星星全身湿晒）

消防局：讲啦，咩事呀？呢度系消防局嘞，边位呀？讲啦！

周星星：有冇雨褛卖呀唔该？

消防局：买雨褛去seven-eleven啦死铲！

周星星：边个死铲呀？你咩态度呀？你几号冧巴呀你？你唔好收线呀！喂！喂！喂！

（电话中出现汤茱迪同林大岳嘅对话）

汤茱迪：大岳，你欺人太甚嘞！

林大岳：你唔嚟一定后悔。系噉啦！唔好阻住我做运动呀！

（汤茱迪收线，拿出一把刀猛插台面，好鬼兴噉样）

（周星星行出间房，周身湿晒）

秘书：王生，你做咩呀？

周星星：饮水吖嘛！话咗畀你听架啦！

（周星星跟踪汤茱迪）

（周星星唔小心踩烂咗乞儿仔嘅饭盒）

乞儿仔：啊！你踩我饭盒！踩我消夜！你快啲赔钱呀！

（周星星畀咗几十文个乞儿仔）

（汤茱迪行上楼）

看更：小姐，揾边位呀？

汤茱迪：林大岳生约我嚟嘅。

看更：哦，请跟我嚟吖。

（看更敲门）

林大岳：入嚟！

看更：请！

（汤茱迪行入林大岳办公室）

林大岳：睇见你真系醒神呀！（将份文件交畀秘书）同我揾返上半年嘅file，我咩电话都唔听。

秘书：系！（行出去）

（闩门）

林大岳：请坐！

汤茱迪（坐低）：唔好讲咁多废话，要几多钱，一次过畀返晒啲相我。

林大岳（起身）：哎，你千祈唔好唔会呀。我林大岳虽然就唔系好有钱。不过十亿八亿我都唔放在眼内。你以为我想勒索你呀？

汤茱迪：噉好吖，你开价。

林大岳：哎，大家咁熟，讲钱就失感情。其实我想畀钱你使就真。嗱，我就查到你屋企个王百万就肯定系假架嘞。我家吓帮你噍低佢，一啲手尾都冇。（撩鼻）另外再畀三亿你，买湾仔笪地。

汤茱迪（拍案而起）：哼！你唔好去抢？！嗰笪地值廿亿架！

林大岳：啱呀，你话过十亿我都唔放在眼内，廿亿就差唔多嘞。

汤茱迪：你个冚家铲吖！

林大岳：你唔好讲粗口呀！你讲粗口会破坏你喺我心目中美丽豆腐婆嘅形象架。

（汤茱迪想打林大岳，结果畀打倒在地）

林大岳：贱格！

汤茱迪：你？

林大岳：你咩呀？三日后上律师楼办手续！如果唔系攞晒你啲相去砵兰街周街派同埋登八婆杂志。

保安甲（拍周星星膊头）：喂，你睇咩呀？鬼鬼鼠鼠喺度做咩呀？偷嘢呀？！

周星星：唔系！有靓女冇着衫呀！

保安甲：我唔信！

周星星：你埋嚟睇吓先啦！

保安甲：哎，如果我埋到去你喺后便一嘢啄晕我，噉点算嗱？

周星星：就算你唔埋去我都系一嘢啄晕你嘅啫！（打倒保安甲）

保安乙（扶起保安甲）：喂，咩事呀？

保安甲：正话有条西装友一嘢啄晕我呀！

保安乙：快啲！追！

（周星星除咗西装，扮吸地）

保安乙（问周星星）：喂，见唔见条西装友呀？呢便！

鹦鹉：贼仔！贼仔！（鹦鹉畀周星星吸入吸尘器）

保安乙：咩声呀？

保安甲：有声咩？唔觉呀。

保安乙：畀我见到就打爆佢个头。你去嗰边揾，我喺度及住！

（嗰个女护士过嚟搞镬粥）

女护士（见到周星星）：色……

（周星星吸女护士嘅口，令到佢讲唔到嘢）

女护士：色魔呀！救命呀！（件外套畀周星星吸咗落嚟）我转咗工，点解你重要缠住我？拉佢呀！拉佢呀！

周星星：走啦，八婆！

（周星星同班保安较量）

保安乙（棚牙畀周星星用吸尘器吸咗去）：畀返棚牙我呀！

（周星星嚟到林大岳办公室）

（林大岳喺周星星身后拍周星星膊头）

周星星：喂，系你呀？咦，新款喎。

林大岳：新咩吖？（提起大须）你估吓边个杀我？

周星星：边个呀？

（林大岳倒下）

周星星：喂，畀啲贴士得架！喂！系佢？！（出去追汤茱迪，入咗部lift，好似开跑车噉）

（有人中途想上lift）

周星星：死僆仔，立乱过马路！车死你吖嗱！（踢飞条友）

（乞儿仔嚟揾周星星算帐）

乞儿仔：死仔！97都未到！畀人民币我？！你以为你老母我盲架？掟死你！

（周星星返到屋企，汤茱迪喺屋企打麻将）

汤茱迪：返嚟喇？（周星星企喺汤茱迪身边）气锣气喘噉，你去边度嚟呀？

周星星：我问你去边度嚟？

汤茱迪：我去边度嚟？成晚喺度打牌啰。你话我去边度嚟吖？

周星星：你成晚喺度打牌？！

麻雀脚甲：我哋打咗十六圈架喇！

麻雀脚乙：喂，你老公冇嘢吖嘛？

汤茱迪：佢梗系有嘢啦。（打量周星星）哗！着成噉鬼样架？！你去边度嚟呀？哎吖！呢啲乜嘢嚟架？啊？血呀！你去杀人嚟呀？！

周星星：啤——！

汤茱迪：哈！畀我吹到啤一声呀哩？老夫老妻，你噉都唔玩得？！喂，后日我哋结婚七周年纪念，我想开个舞会庆祝吓。你话好唔好啫？哎吖，你重鼓埋泡腮，惜返啖。（嘴周星星）

（舞会）

贵宾甲：喂！

贵宾乙：畀你吓我一跳呀！

黎sir：哗！

boy：黎sir，随便饮杯酒呀。

（黎sir攞咗底部嗰杯酒，成个塔冧晒）

黎sir（嚟到周星星身边）：林大岳死咗知唔知呀？

周星星：知！

黎sir：噉我就嚟死你知唔知呀？

周星星：都知吖！

黎sir：你再查唔到凶手，连你都就嚟死呀！

周星星：边个系凶手我已经有九成把握。

黎sir：究竟系边个？

周